¶ 1 A E gaahi lagi, mou tokaga, bea teu lea; bea ke fanogo, E mamani, ki he gaahi lea a hoku gutu.

2 E to eku akonaki o hage koe uha, e alu hifo eku gaahi lea o hage koe hahau, o hage koe taumoji ki he akau vaivai, o hage koe uha tuu mo to ki he mohuku:

3 Koe mea i he eku fakaogo atu ae huafa o Jihova: mou tuku ae mafimafi ki ho tau Otua.

4 Koia koe Maka! oku haohaoa a ene gaue: he ko ene ulugaaga kotoabe oku agatonu: koe Otua oe mooni, mo taehalaia, oku agatonu mo maonioni ia.

5 Kuo nau fakahala‘i akinautolu, ko ho nau ila oku ikai koe fakailoga o ene fānau: koe toutagata mio‘i mo bikobiko akinautolu.

6 He oku behe hoo mou totogi kia Jihova, ae kakai vale mo tae boto? ikai ko hoo tamai ia naa ne fakatau koe? ikai naa ne gaohi koe, mo fokotuu mau koe?

7 Manatu ki he gaahi aho i mu‘a, tokaga ki he gaahi ta‘u oe toutagata lahi: fehui ki hoo tamai, bea te ne fakaha ia kiate koe; ki hoo kau mātua, bea te nau tala kiate koe.

8 I he vahe atu e he Fugani Maoluga ki he gaahi buleaga a ho nau tofia, i he ene fakamovetevete ae gaahi foha o Atama, naa ne ai ae fakagataaga ki he kakai o fakatatau ki hono lau oe fānau a Isileli.

9 He koe tofia o Jihova a hono kakai; koe afo o hono tofia a Jekobe.

10 Naa ne ilo ia i he fonua lala, bea i he toafa liaki mo gugulu; naa ne tataki fano ia, o ne akonaki‘i ia, naa ne tauhi ia o hage koe tama o hono mata.

11 Hage koe ue‘i e he ikale hono bunuga, o oofaki ki hono uhiki, o mafola atu hono kabakau, o ne too hake akinautolu, o fua akinautolu i hono kabakau:

12 Nae behe hono tataki ia toko taha be e Jihova, bea nae ikai ha otua kehe mo ia.

13 Naa ne fakaheka ia ke heka ki he gaahi botu maoluga o mamani, koeuhi ke ne kai ae tubu oe goue; bea naa ne gaohi ia ke ne mimiji ae honi mei he maka, moe lolo mei he makaafi;

14 Koe bota mei he faga bulu fefine, moe hua huhu oe sibi, moe gako oe faga lami, moe faga sibi tagata i he faahiga mei Besani, moe faga koji mo hono gako oe gaahi tega‘i uite; bea naa ke inu ae toto totonu oe kalebi.

¶ 15 Ka nae fakaaau o jino a Jesuluni, bea akafiji: kuo ke hoko o jino, kuo ke hoko o matolu, kuo ufiufi koe  e he jino; bea naa ne toki liaki ae Otua aia naa ne gaohi ia, bea naa ne taefakaabaaba ki he Maka o hono fakamoui.

16 Naa nau laga‘i aki hono fuaa ae gaahi otua kehe, naa nau fakatubu hono houhau aki e nau gaahi agakovi.

17 Naa nau feilaulau ki he gaahi tevolo, kae ikai ki he Otua; ki he gaahi otua nae ikai te nau ilo, koe foou nae toki tubu foou hake, aia nae ikai manavahe hoo mou tamai ki ai.

18 Oku ke tae tokaga ki he Maka naa ke tubu ai, bea kuo ke fakagalo‘i ae Otua aia naa ne fakafuofua koe.

19 Bea i he afio a Jihova, naa ne fehia  kiate kinautolu, koe mea i he fakatubu ene houhau e hono gaahi foha, mo hono gaahi ofefine.

20 Bea nae behe eia, Teu fufu hoku fofoga meiate kinautolu, teu vakai, be koeha ho nau gataaga: he koe toutagata agatuu aubito akinautolu, koe fānau oku ikai iate kinautolu ae tui.

21 Kuo nau laga‘i aki eku fuaa aia oku ikai koe otua; kuo nau fakatubu aki eku houhau e nau gaahi mea vaiga: bea teu ue‘i aki e nau fuaa ekinautolu oku ikai koe kakai; teu fakatubu e nau ita aki ae kakai vale.

22 He kuo tutu ae afi i he eku houhau, bea e vela ia o a‘u ki loto heli, bea e fakaauha ai a mamani mo hono tubu, bea e tutu ai ae gaahi tuuga oe gaahi mouga.

23 Teu fokotuutuu ae gaahi kovi kiate kinautolu; teu fakaoji a eku gaahi gahau kiate kinautolu.

24 E vela akinautolu aki ae hoge, bea e fakaoji akinautolu aki ae malalai afi, bea i he fakaauha fakamamahi: teu fekau ae kau nifo oe faga manu kaivao kiate kinautolu, moe kona oe faga gata oe efu.

25 E fakaauha aki ae heleta itua, moe ilifia i loto, ae talavou moe tāuboou fakatouoji, ae tama huhu foki moe tagata uluhina.

26 Neu behe, Teu fakahe‘i akinautolu ki he gaahi tuliki, teu fakaoji ae fakamanatu kiate kinautolu mei he lotolotoga oe kakai:

27 Ka ne taeoua eku manavahe ki he ita ae fili, telia naa fai fakafielahi e ho nau gaahi fili, bea telia naa nau lea o behe, Ko ho tau nima maoluga, ka oku ikai ko Jihova kuo ne fai ae mea ni kotoabe.

28 He koe buleaga majiva fakakaukau boto akinautolu, bea oku ikai ha loto faa ilo foki iate kinautolu.

29 Taumaia kuo nau boto, koeuhi ke nau ilo ae mea ni, koeuhi ke nau tokaga ki ho nau ikuaga!

30 He e fefe‘i ha tulia e he toko taha ae toko afe, bea e he toko ua ae toko mano, o ka ne ikai fakatau akinautolu e ho nau Maka, bea tabuni akinautolu e Jihova?

31 He ko ho nau maka oku ikai hage ko ho tau Maka, io, naa mo ho tau gaahi fili, oku nau fakamooni ki ai.

32 He koe nau vaine oku mei he vaine o Sotoma, bea oku mei he goue o Komola: ko ho nau gaahi kalebi, koe kalebi oe ahu, oku kona ho nau gaahi fuhi:

33 Koe nau uaine koe kona oe faga gata lalahi, moe kona malohi oe faga gata kovi aubito.

34 Ikai kuo fokotuu ae mea ni iate au o talifaki be, bea buluji mau ia fakatahmo eku gaahi koloa?

35 Oku aaku ae tautea moe totogi; e hekea ho nau va‘e i hono kuoga: he oku ofi ae aho oe nau tuutamaki, bea koe gaahi mea e to kiate kinautolu oku fakatootoo.

36 Koeuhi e fakamāu e Jihova a hono kakai, bea e lolou ia koeuhi ko ene kau tamaioeiki, i he ene afio‘i kuo oji ho nau malohi, bea oku ikai ha niihi kuo tabuni, be toe.

37 Bea e behe eia, Kofaa koa ho nau gaahi otua, ko ho nau maka naa nau falala ki ai,

38 Aia nae kai ae gako oe nau gaahi feilaulau, bea inu ae uaine oe nau gaahi feilaulau inu? tuku ke nau tuu hake o tokoni akimoutolu, bea hoko ko ho mou kalofaga!

39 Mou vakai ni ko Au, io ko Au ia, bea oku ikai ha otua mo au: oku ou tamate‘i, bea oku ou fakamoui; oku ou ta‘i, bea oku ou fakamoui: bea oku ikai ha toko taha oku faa fakamoui mei hoku nima.

40 He oku ou hiki hake hoku nima ki lagi, beau behe, Oku ou moui o taegata.

41 Kabau teu fakamajila a eku heleta gigila, bea buke e hoku nima ae fakamāu; teu atu ae tautea ki hoku gaahi fili, bea teu totogi kiate kinautolu oku fehia kiate au.

42 Teu fakakona eku gaahi gahau aki ae toto, bea e kai kakano e he eku heleta; i he toto oe kakai kuo tamate‘i, bea i he kau bobula, mei he kamataga oe gaahi tautea ki he fili.

43 Ae gaahi buleaga, mou fiefia mo hono kakai: koeuhi e totogi eia ae toto o ene kau tamaioeiki, bea te ne atu ae totogi ki hono gaahi fili, bea e fai aloofa ia ki hono fonua, bea mo hono kakai.

¶ 44 Bea nae ha‘u a Mosese o ne lea aki kotoabe ae hiva ni i he teliga oe kakai, aia mo Josiua koe foha o Nuni.

45 Bea nae fakaoji e Mosese ae lea aki ae gaahi lea ni kotoabe ki Isileli kotoabe:

46 Bea behe eia kiate kinautolu, Fakatokaga‘i ho mou loto ki he gaahi lea kotoabe aia oku ou fakababau kiate kimoutolu he aho ni, aia te mou fekau ki hoo mou fānau kotoabe ke tokaga bea fai ki he gaahi lea kotoabe oe fono ni.

47 He oku ikai koe mea vaiga ia kiate kimoutolu; ka ko hoo mou moui ia: bea koe mea eni te mou fakatologa ai ho mou gaahi aho i he fonua, aia oku mou alu ai ki he tua Joatani ke ma‘u ia.

48 Bea nae folofola ai a Jihova kia Mosese i he aho be koia, o behe,

49 Ke ke alu hake ki he mouga ni ko Abalimi, ki he mouga ko Nibo, aia oku i he fonua ko Moabe, aia oku hagatonu atu ki Jeliko; bea vakai ki he fonua ko Kenani, aia oku ou foaki ki he fānau a Isileli ko ho nau tofia:

50 Bea ke mate i he mouga aia oku ke alu hake ki ai, bea fakataha koe mo ho kakai; o hage koe mate a ho taokete ko Elone i he mouga ko Hoa, moe tanaki ia ki hono kakai:

51 Koe mea i hoo mo fai hala kiate au i he lotolotoga oe fānau a Isileli i he vai i Meliba‐Ketesi, i he toafa o Sini; koe mea i hoo mo taefakaabaaba kiate au i he lotolotoga oe fānau a Isileli.

52 Te ke mamata ki he fonua i ho ao; ka e ikai te ke alu ki ai ki he fonua aia oku ou foaki ki he fānau a Isileli.