¶ 1 KOE gaahi fekau eni, moe tuutuuni, moe gaahi fakamāu, aia nae fekau e Jihova ko ho mou Otua ke ako aki kiate kimoutolu, koeuhi ke mou fai ki ai i he fonua aia oku mou alu ki ai ke ma‘u:

2 Koeuhi ke ke manavahe kia Jihova ko ho Otua, ke tauhi ene gaahi tuutuuni kotoabe, mo ene gaahi fekau, aia oku ou fekau ai kiate koe, akoe, mo ho foha, moe foha o ho foha, i he gaahi aho kotoabe o hoo moui; bea koeuhi ke fakatologa ai ho gaahi aho.

¶ 3 Koia ke ke fanogo, E Isileli, bea tokaga ke fai ki ai: koeuhi ke hoko ai ae lelei kiate koe, bea ke mou tubu o toko lahi aubito, o hage koe talaofa kiate koe mei a Jihova koe Otua o hoo gaahi tamai, i he fonua oku mahutafea i he hua huhu moe honi.

4 Fanogo, E Isileli: Ko Jihova ko ho tau Otua ko Jihova tafataha be ia

5 Bea te ke ofa kia Jihova ko ho Otua aki ho loto kotoa, mo hoo moui kotoa, mo ho malohi kotoa.

6 Bea koe gaahi lea ni, aia oku ou fekau kiate koe he aho ni, e i ho loto ia:

7 Bea te ke faa ako aki ia ki hoo fānau, bea te ke talanoa aki ia oka ke ka nofo i ho fale, bea oka ke ka alu i he hala, bea oka ke ka tokoto hifo, bea oka ke ka tuu hake.

8 Bea te ke nonoo ia ki ho nima koe fakailoga, bea e hoko ia koe bale i he vahaa o ho mata.

9 Bea te ke tohi ia ki he gaahi bou o ho fale, bea ki ho gaahi mataba.

10 Bea e behe, oka hili hono omi koe e Jihova ko ho Otua ki he fonua aia naa ne fuakava ai ki hoo gaahi tamai, kia Ebalahame, kia Aisake, bea kia Jekobe, ke foaki kiate koe ae gaahi kolo lahi mo lelei, aia nae ikai te ke laga,

11 Moe gaahi fale kuo fonu i he gaahi mea lelei, aia nae ikai te ke fakafonu, moe gaahi vai keli, nae ikai te ke keli, ae gaahi goue vaine moe gaahi olive aia nae ikai te ke to; hili hoo kai bea ke makona;

12 Vakai telia naa ke fakagalo‘i a Jihova, aia naa ne omi koe mei he fonua ko Ijibite, mei he fale fakabobula.

13 Ke ke manavahe kia Jihova ke ho Otua, o tauhi ia, bea ke fuakava i hono huafa.

14 Oua naa mou muimui ki he gaahi otua kehe, i he gaahi otua oe kakai aia oku nofo takatakai iate kimoutolu;

15 (He ko Jihova ko ho Otua koe Otua fuaa ia iate kimoutolu,) telia naa tubu ae houhau o Jihova ko ho Otua kiate koe, o ne fakaauha koe mei he fuga o mamani.

¶ 16 Oua naa mou ahiahi kovi kia Jihova ko ho mou Otua, o hage ko ho mou ahiahi kovi i Masa.

17 Ke mou tauhi manavakavakava ae gaahi fekau a Jihova ko ho mou Otua, mo ene gaahi fakamooni, mo ene gaahi tuutuuni, aia kuo ne fekau kiate koe.

18 Bea te ke fai totonu mo lelei i he ao o Jihova: koeuhi ke hoko ai ae lelei kiate koe, bea koeuhi ke ke hoko o ma‘u ae fonua lelei aia nae fuakava ki ai e Jihova ki hoo gaahi tamai,

19 Ke kabuji kituaa a ho gaahi fili mei ho ao, o hage koe folofola a Jihova.

20 Bea ka fehui e ho foha kiate koe amui, o behe, Koeha hono uhiga oe gaahi fakamooni ni, moe gaahi tuutuuni, moe gaahi fakamāu, aia kuo fekau e Jihova ko ho tau Otua kiate kimoutolu?

21 Te ke toki behe ki ho foha, Naa mau nofo koe kau bobula a Felo i Ijibite: bea nae omi akimautolu e Jihova mei Ijibite aki ae nima malohi:

22 Bea nae fakaha e Jihova ae gaahi fakailoga, moe gaahi mea mana, nae lahi mo fakamamahi ki Ijibite, bea kia Felo, bea ki hono kakai, i ho mau ao:

23 Bea naa ne omi akimautolu mei ai, koeuhi ke ne omi akimautolu ki heni, ke foaki kiate kimautolu ae fonua aia naa ne fuakava ki ai ki he e mau gaahi tamai.

24 Bea nae fekau e Jihova ke mau fai ae gaahi tuutuuni ni, ke manavahe kia Jihova ko ho tau Otua, ke tau lelei ai mau ai be, hoeuhi ke ne fakatologa e tau moui, o hage koia he aho ni.

25 Bea e hoko ia koe tau maonioni, o kabau te tau tokaga o fai ki he gaahi fekau ni kotoabe i he ao o Jihova ko ho tau Otua, o hage ko ene fekau kiate kitautolu.