¶ 1 TAUHI ho va‘e oka ke ka alu ki he fale oe Otua, bea lahi hake hoo fiefanogo i hoo fai ae feilaulau ae vale: he oku ikai te nau tokaga ki he kovi oku nau fai.

2 Oua naa ke oho noa aki ho gutu, bea oua naa vave ho loto ke fakaha ha mea i he ao oe Otua: he oku i he lagi ae Otua, ka oku ke i mamani koe: koia ke jii ai hoo lea.

3 He oku tubu ae miji mei he femouekina ki he gaue; bea oku ilo ae le‘o oe vale i he lahi o ene lea.

4 Oka ke ka fuakava ki he Otua, oua naa ke fakatuai hoo fai ki ai; he oku ikai te ne leleiia i he vale; fai koe ki he mea kuo ke fuakava ki ai.

5 Oku lelei hake ke oua aubito naa ke fuakava, i hoo fuakava kae ikai fai ki ai.

6 Oua naa tuku ke fakahala‘i koe e ho gutu; bea oua naa ke behe i he ao oe agelo, ko hoo fai hala: koeha oku ke fakahouhau‘i ae Otua aki ho le‘o, bea te ne fakaauha ae gaue a ho nima?

7 He oku lahi ae vaiga foki i he lahi oe miji moe lea oku lahi: ka ke manavahe koe ki he Otua.

¶ 8 Kabau oku ke mamata ki he fakamalohi‘i oe majiva, bea moe mioi fakamalohi ae fakamāu moe fai totonu i ha vahe fonua, oua naa ke ofo ai: he ko ia oku maoluga taha i he maoluga kotoabe oku ne afio‘i ia; koeuhi oku ai aia oku maoluga hake iate kinautolu.

¶ 9 Kae umaa foki koe tubu oe kelekele, koe mea ma ae kakai kotoabe: naa moe tu‘i oku tauhi ia mei he goue.

10 Ko ia oku manako ki he siliva e ikai ke ne fiemalie i he siliva; be ko ia oku manako ki he koloa i he tubulaki o ene mea: koe vaiga foki eni.

11 Koeuhi i he tubulekina ae mea, oku tubu foki akinautolu oku nau kai ia: bea koeha hono lelei kiate kinautolu oku anautolu ia, ka koe nau mamata be ki ai aki ho nau mata?

12 Oku fiemalie ae mohe ae tagata gaue, ne ogo be oku jii be oku lahi a ene kai: ka koe lahi oe mea ae koloaia koia oku ikai ke nau faa mohe ai.

13 Oku ai ae kovi lahi kuou mamata ki ai i he lalo laa, aeni, ae tauhi koloa ke kovi ai akinautolu oku anautolu be ia.

14 Ka oku maumau ae koloa koia i he feiga kovi; bea oku tubu iate ia ae foha, ka oku ikai ha mea i hono nima.

15 O hage ko ene ha‘u mei he mānava o ene fa‘e, e behe a ene alu telefua atu o hage ko ene ha‘u, bea e ikai ha tubu o ene gaue te ne ma‘u ke ave i hono nima.

16 Bea koe kovi foki eni oku lahi, a ene alu o tatau i he mea kotoabe mo ene ha‘u: bea koeha ae lelei oku ma‘u eia oku gaue ki he matagi?

17 Oku kai eia i he fakabouli i he aho kotoabe, bea oku lahi ae mamahi moe tautea oku hoko kiate ia i hono mahaki.

¶ 18 Vakai ki he mea kuou mamata ki ai: oku lelei mo totonu ki he tagata ke kai mo inu, bea ke fiefia i he lelei kotoabe o ene gaue, aia oku ne fai i he lalo laa, i he aho kotoabe o ene moui, aia kuo foaki e he Otua kiate ia; he ko hono inaji ia.

19 Bea koe tagata kotoabe aia oku foaki ki ai e he Otua ae ma‘umea moe koloa lahi, bea moe malohi ke ne kai mei ai, bea ke ma‘u hono inaji, bea ke fiefia i he ene gaue; koe foaki ia ae Otua.

20 Bea e ikai te ne tokaga mamahi ia ki he gaahi aho o ene moui; koeuhi oku tauhi ia e he Otua, bea koia oku fiefia ai hono loto.