¶ 1 HE naaku tokaga i hoku loto ki he mea ni kotoabe keu fakaha kotoabe ia, oku i he nima oe Otua ae maonioni, moe boto, bea moe nau gaue: oku ikai ilo e he tagata be koe ofeina ia be koe fehianekina i he mea oku hoko mai kiate ia.

2 He oku hoko tatau ae mea fulibe ki he kakai kotoabe: koe mea e taha oku hoko ki he maonioni moe agahala; ki he agalelei mo ia kuo fakamaa, bea ki he tae maa; kiate ia oku feilaulau, mo ia oku ikai fai ha feilaulau: oku hage ko ia oku agalelei, oku behe aia oku agahala, bea ko ia oku fuakava, o hage ko ia oku manavahe ki he fuakava.

3 Koe kovi eni e taha i he mea kotoabe oku fai i he lalo laa, ae hoko tatau ae mea ki he kakai kotoabe: io, oku fonu i he kovi ae loto oe fānau ae tagata, oku i ho nau loto ae vale i he e nau kei moui, bea hili ia oku nau alu ki he mate.

¶ 4 He oku ai ae amanaki lelei kiate ia oku kei kau ki he moui: he oku lelei hake ae kuli oku moui i ha laione kuo mate.

5 He oku ilo e he kakai moui te nau mate: ka oku ikai jii ilo ha mea e he mate, bea oku ikai te nau kei ma‘u ha totogi: he kuo galo a ho nau fakamanatu.

6 Bea koe nau ofa, moe nau fehia, moe nau meheka, kuo oji ia; bea oku ikai te nau kei ma‘u ho nau tufakaga i ha mea oku fai i he lalo laa o taegata.

¶ 7 Alu koe i ho hala, bea kai hoo ma i he fiefia, bea inu hoo uaine i he loto fiemalie; he kuo ma‘u e he Otua hoo gaahi gaue.

8 Ke hinehina mau ai be ho gaahi kofu; bea oua naa majiva ho ulu i he bani.

9 Ke ke moui fiefia mo ho unoho, aia oku ke ofa ai i he aho kotoabe o hoo moui vaiga, aia kuo ne foaki kiate koe i he lalo laa, ae gaahi aho kotoabe o hoo vaiga: he ko ho inaji ia i he moui ni, moe gaue kuo ke fai i he lalo laa.

10 Koia kotoabe oku ilo e ho nima ke fai, fai ia aki ho malohi kotoabe; he oku ikai ha gaue, be ha filioi, be ha ilo, be ha boto i he faitoka, aia oku ke alu ki ai.

¶ 11 Naaku tafoki mai, beau mamata i he lalo laa, koe bue oku ikai kiate ia oku vee vave, be koe tau kiate ia oku malohi, be koe mea kai kiate ia oku boto, be koe koloa ki he kakai oku faa fakakaukau, be koe ogoogolelei ki he kakai boto; he oku ma‘u taki taha kotoabe hono aho mo hono tuutuuni.

12 He oku ikai ilo foki e he tagata a hono aho: oku hage koe ma‘u fakafokifa oe ika i he kubega, bea hage koe ma‘u ae manu buna i he tauhele; oku behe ae tauhele‘i ae fānau ae tagata i he aho oe kovi, oka hoko fakafokifa ia kiate kinautolu.

¶ 13 Koe boto ni foki kuou mamata ki ai i he lalo laa, bea nae matamata lahi ia kiate au.

14 Nae ai ae kihi‘i kolo, bea toko jii ae kau tagata nae i ai; bea nae ha‘u ae tu‘i lahi ke ne tau‘i ia, bea naa ne kabui ia, bea lahi aubito a ene tanu buke ki ai.

15 Ka koeni, nae ilo i ai ae tagata majiva mo boto, bea koe mea i he ene boto nae hao ai ae kolo; ka nae ikai manatu‘i e ha toko taha ae tagata majiva koia.

16 Bea naaku toki behe ai, Oku lelei hake ae boto i he malohi: ka oku manuki‘i ae boto oe tagata majiva, bea oku ikai ogo‘i ene gaahi lea.

17 Oku ogo lahi mai ae fanafana ae boto i he kalaga oia oku bule i he lotolotoga oe vale.

18 Oku lelei hake ae boto i he mahafu tau: ka oku maumau‘i e he agahala e toko taha ae lelei lahi.