Vahe 15
1 Oku tokoni e he Otua a Ebalame, 2 Oku lāuga a Ebalame koeuhi oku ikai hano fohā e hoko, 4 Oku fakailo e he Otua kiate ia e i ai hono foha, bea e fakatokolahi hono hako. 6 Oku tonuhia a Ebalame i he tui. 7 Oku toe talaofa ki Kenani, bea oku fakamooni aki ae fakailoga moe mea ha mai.
¶ 1 BEA hili ae gaahi mea ni, nae ha‘u ae folofola a Jihova kia Ebalame i he mea ha mai o behe, Oua naa ke manavahe Ebalame: ko ho ugaaga au, mo ho totogi lahi aubito.
2 Bea beheage e Ebalame, E Jihova koe Otua, koeha te ke foaki kiate au, he oku ou majiva fānau, bea koe tauhi o hoku abi, koe Eliesa ni o Tamasikusi?
3 Bea behe e Ebalame, Vakai, nae ikai te ke foaki kiate au ha hako; bea vakai, koe taha nae fanau i hoku fale, ko hoku hoko ia.
4 Bea iloage, nae folofola mai a Jihova kiate ia, o behe, Oku ikai ko ho hoko ia: ka ko ia e tubu mei ho fatu oou ko ho hoko ia.
5 Bea ne taki atu ia kituaa, o ne behe, Haga hake ni ki he lagi, o lau ae gaahi fetuu, o kabau te ke faa lau ia; bea ne behe kiate ia, E tatau mo ia ho hako.
6 Bea nae tui ia kia Jihova; bea nae lau ia kiate ia, koe maonioni.
7 Bea naa ne behe kiate ia, Ko au ko Jihova, naaku omi koe mei Ua, i Kalitia, ke foaki kiate koe ae fonua ni, ke ke ma‘u moou.
8 Bea ne behe eia, E Jihova koe Otua, teu ilo i he ha teu ma‘u ia?
9 Bea ne behe kiate ia, Too mai maaku ae bulu fefine mui oku tolu ta‘u hono motua, moe koji fefine oku tolu ta‘u hono motua, moe sibi tagata oku tolu ta‘u hono motua, moe kulukulu moe lube mui.
10 Bea ne too ae gaahi mea ni kotoabe, o ne fahiua akinautolu, o tuku fakaholo ae gaahi koga kotoabe, ka nae ikai te ne fahi‘i ae faga manu buna.
11 Bea i he lolofa mai ae faga manu buna ki he gaahi agaaga, nae fakaheehee ia e Ebalame.
12 Bea i he kamata to ae laa, nae hoko ae mohe mau kia Ebalame: bea vakai nae to kiate ia ae fuu manavahe oe fakabouli lahi.
13 Bea nae behe kia Ebalame, Ke ke ilo bau eni, e nofo aunofo ho hako i ha fonua oku ikai o nautolu, bea te nau tauhi akinautolu; bea te nau fakamamahi akinautolu i he ta‘u e fageau.
14 Bea koe buleaga koia te nau gaue ki ai, teu fakamāu‘i foki: bea hili ia te nau ha‘u mei ai moe koloa lahi.
15 Bea te ke alu koe ki hoo gaahi tamai i he fiemalie: e bekia koe oka ke ka motua lelei.
16 Bea i hono fa oe toutagata te nau toe ha‘u ki heni; he oku heeki ai fonu ae agahala ae kakai Amoli.
17 Bea i he to ae laa bea bouli, vakai, nae i ai ae afi kakaha kuo kohu, moe māma ulo nae alu i he vahaa oe gaahi koga manu.
18 I he aho koia nae fai e Jihova ae fuakava mo Ebalame, o behe, Kuou tuku ki ho hako ae fonua ni, mei he vaitafe o Ijibite o a‘u ki he vaitafe lahi, aia koe Iufaletisi.
19 Koe kakai Kena, moe kakai Kenisai moe kakai Katimona.
20 Moe kakai Heti, moe kakai Belisi, moe kakai Lifeime,
21 Moe kakai Amoli, moe kakai Kenani, moe kakai Kilikesa, moe kakai Jebusi.