¶ 1 BEA fekau eia ki he tauhi o hono fale, o behe, Fakabito aki ae meakai ae gaahi tagai ae kau tagata ni, o fakatatau mo ia te nau faa fua, bea ai ae baaga ae tagata taki taha ki he gutu o ene tagai.

2 Bea ai eku ibu, ae ibu siliva ki he gutu‘i tagai ae kimui, bea moe baaga totogi o ene koane. Bea ne fai eia o hage koe fekau a Josefa.

3 Bea bogibogi hake i he maa ae aho, nae tuku ae kau tagata ke alu, akinautolu moe nau faga asi.

4 Bea kuo nau alu mei he kolo, bea nae heeki ai mamao fau, bea behe e Josefa ki he ene tauhi, Tuu, o tuli ae kau tagata; bea oka ke ka ma‘u akinautolu, bea ke lea behe kiate kinautolu, Koeha kuo mou totogi kovi ai ki he lelei?

5 Ikai koia ia oku inu mei ai a eku eiki, moia oku ne fai ai ene ilo mea? kuo mou fai kovi i he mea ni.

¶ 6 Bea naa ne ma‘u akinautolu, o ne lea aki kiate kinautolu ae gaahi lea koia.

7 Bea nau beheage kiate ia, Koeha oku lea behe ai ho mau eiki? ke mamao aubito mei hoo kau tamaioeiki ae fai ha mea behe.

8 Vakai, koe gaahi baaga naa mau ilo i he gutu oe mau tagai, kuo mau toe omi ia kiate koe, mei he fonua ko Kenani: bea e fefe‘i e mau kaihaa ha siliva be ha koula mei he fale o ho mau eiki?

9 Koia te ke ilo ia ki ai i hoo kau tamaioeiki, tuku ke mate ia, bea te mau nofo koe kau bobula ki he e mau eiki foki.

10 Bea behe eia, Koeni, ke noko o tatau mo hoo mou lea: koia e ilo ai ia, ko eku tamaioeiki ia, bea e taehalaia akimoutolu.

11 Bea naa nau fakatootoo o tuku hifo, taki taha ae tagata a ene tagai ki he kelekele, bea too taki taha a ene tagai.

12 Bea ne kumi ia, o kamata i he uluaki, o a‘u ki he kimui; bea nae ilo ae ibu i he tagai a Benijimani.

13 Bea naa nau haehae ho nau kofu, o toe ai ae kavega taki taha ae tagata ki he asi, o nau foki ki he kolo.

¶ 14 Bea nae ha‘u a Juta mo hono gaahi tokoua ki he fale o Josefa; he nae kei i ai ia; bea nau foohifo i hono ao ki he kelekele.

15 Bea behe e Josefa kiate kinautolu, Koeha ae mea ni kuo mou fai? he nae ikai te mou mahalo, koe tagata hage ko au, teu faa ilo‘i.

16 Bea beheage e Juta, Koeha te mau lea aki ki ho mau eiki? bea te mau behe koeha? bea e fefe e mau fakatonuhia akimautolu? kuo afio‘i e he Otua ae halaia o hoo kau tamaioeiki; vakai, koe kau tamaioeiki akimautolu a ho mau eiki, akimautolu mo ia foki kuo ilo ki ai ae ibu ni.

17 Bea behe eia, Tabu moe Otua a eku fai behe: ka koe tagata kuo ilo i hono nima ae ibu ni, ko eku tamaioeiki ia; ka ko kimoutolu, mou alu fiemalie be ki hoo mou tamai.

¶ 18 Bea nae unuunu mai a Juta kiate ia, o ne behe, Ko eku eiki, oku ou kole kiate koe, ke ke tuku ke lea jii be a hoo tamaioeiki ki he fofoga o hoku eiki, bea oua naa ke tubutamaki mai ki hoo tamaioeiki: he oku ke tatau mo Felo.

19 Nae fehui a ho mau eiki ki he ene kau tamaioeiki, o behe, Oku ai hoo mou tamai, be ha tehina?

20 Bea naa mau tala ki ho mau eiki, Oku ai e mau tamai koe tagata motua, bea moe tama o ene motua, koe tamajii jii; bea kuo bekia hono tokoua, bea koia toko taha be kuo toe i he ene fa‘e, bea oku ofa ene tamai kiate ia.

21 Bea naa ke behe ki hoo kau tamaioeiki, Omi ia ki heni kiate au, koeuhi keu jio fakababau kiate ia.

22 Bea naa mau tala ki he e mau eiki, E ikai faa mavae ae tama mo ene tamai: he kabau te ne tuku ene tamai, e bekia ai ene tamai:

23 Bea naa ke behe ki hoo kau tamaioeiki, Kabau e ikai iate kimoutolu ho mou tehina, e ikai te mou toe mamata ki hoku mata.

24 Bea i he e mau hoko ki hoo tamaioeiki koe mau tamai, naa mau fakaha kiate ia ae gaahi lea a ho mau eiki.

25 Bea behe e he e mau tamai, Toe alu o fakatau e tau meakai jii.

26 Bea naa mau behe, E ikai te mau faa alu: kabau e iate kimautolu ho mau tehina, te mau alu hifo: koeuhi e ikai te mau mamata ki he mata oe tagata, o kabau e ikai iate kimautolu ho mau tehina.

27 Bea nae behe e hoo tamaioeiki koe mau tamai, kiate kimautolu, Oku mou ilo nae fanau‘i kiate au e hoku unoho ae tama e toku ua:

28 Bea nae alu ae toko taha iate au, bea naaku behe, Koe mooni kuo haehae ke ikiiki ia; bea talu mei ai nae ikai teu toe mamata kiate ia:

29 Bea kabau te mou ave eni iate au foki, bea hoko ha kovi kiate ia, te mou e hifo hoku ulu hina i he mamahi ki he faitoka.

30 Bea koeni, oka hoko a hoo tamaioeiki ko au ki he eku tamai, bea ikai iate kimautolu ae tama; koe mea i he feohi fakataha ene moui moe moui ae tama;

31 E hoko o behe, oka mamata ia oku ikai iate kimautolu ae tama, e bekia ia; bea ko hoo kau tamaioeiki te mau fakahifo ae ulu hina o hoo tamaioeiki koe mau tamai i he mamahi, ki he faitoka.

32 He nae hoko a hoo tamaioeiki, koe fetogi oe tama ki he ene tamai, o behe, Kabau e ikai teu toe omi ia kiate koe, bea ke iate au hono kovi ki he eku tamai o taegata.

33 Bea koeni, oku ou kole kiate koe, tuku ke nofo a hoo tamaioeiki koe bobula ki he eku eiki, koe fetogi oe tama; kae tuku ke alu ae tama mo hono gaahi taokete.

34 He koeuhi, e fefe‘i eku faa alu ki he eku tamai, kae ikai iate au ae tama? telia naaku mamata ki he kovi e hoko ki he eku tamai.