¶ 1 BEA i he hivagofulu ma hiva ta‘u oe motua o Ebalame nae ha mai a Jihova kia Ebalame, o ne behe kiate ia, Ko au, koe Otua Mafimafi; ke ke eveeva i hoku ao, bea ke haohaoa.

2 Bea teu fai a eku fuakava iate koe mo au, bea teu fakatokolahi aubito koe.

3 Bea to foohifo a Ebalame ki he kelekele: bea folofola ae Otua kiate ia, o behe;

4 Ko au eni, Vakai, oku iate koe eko fuakava, bea te ke hoko koe tamai ki he gaahi buleaga lahi;

5 Bea e ikai toe ui ho higoa ko Ebalame; ka ko Ebalahame ho higoa, he kuou gaohi koe koe tamai ki he gaahi buleaga lahi.

6 Bea teu gaohi koe ke ke tubu o toko lahi aubito, bea teu gaohi ae gaahi buleaga lahi iate koe, bea e tubu ae gaahi tu‘i iate koe.

7 Bea teu fakamau eku fuakava kiate koe, mo ho hako e tubu iate koe amui, i he e nau gaahi toutagata, koe fuakava taegata, keu iate koe, koe Otua, bea ki ho hako ki mui iate koe.

8 Bea teu foaki kiate koe, bea mo ho hako e hoko mo koe, ae fonua oku ke aunofo ki ai, io ae fonua kotoabe o Kenani, koe tofia taegata; bea teu iate kinautolu ko ho nau Otua.

¶ 9 Bea behe e he Otua kia Ebalahame, Koia te ke tauhi ai eku fuakava, akoe mo ho hako e hoko mo koe i ho nau gaahi toutagata.

10 Koeni a eku fuakava, aia te mou tauhi, kiate au mo kimoutolu mo ho hako e tubu amui iate koe; E kamu ae tamajii tagata kotoabe oku iate kimoutolu.

11 Bea te mou kamu ae kili o ho mou botu; bea koe fakailoga ia oe fuakava kiate au mo kimoutolu.

12 Bea ko ia iate kimoutolu oku aho valu hono motua e kamu ia, ae tama tagata kotoabe i ho mou gaahi toutagata, ko ia kuo fanau i ho fale, moia oku ikai i hoo fānau, ka kuo fakatau aki hoo koloa mei he muli.

13 Ko ia e tubu i ho fale, mo ia kuo fakatau aki hoo koloa ke ke kamu ia; bea e i ho mou jino eku fuakava, koe fuakava taegata ia.

14 Bea koe tamajii tae kamu, e motuhi ae laumalie koia mei hono kakai; he kuo ne jiaki eku fuakava.

¶ 15 Bea nae behe e he Otua kia Ebalahame, Bea koeuhi ko Selai ko ho unoho, e ikai te ke ui hono higoa ko Selai, ka ko Sela hono higoa.

16 Bea teu tabuaki ia, o tuku kiate koe ae foha iate ia; io, teu tabuaki ia, bea e hoko ia,  koe fa‘e ki he gaahi buleaga; e tubu iate ia ae gaahi tu‘i oe kakai.

17 Bea to foohifo ai a Ebalahame ki he kelekele bea kata, o ne behe i hono loto, E tubu ha tama iate ia oku teau ta‘u hono motua? bea e feitama a Sela, aia oku hivagofulu hono ta‘u?

18 Bea beheage e Ebalahame ki he Otua, Ofa ke moui a Isimeli i ho ao.

19 Bea behe e he Otua, Koe mooni e fanau‘i e ho unoho ko Sela, ha tama kiate koe; bea te ke ui hono higoa ko Aisake: bea teu fakamau eku fuakava kiate ia, koe fuakava taegata bea mo hono hako e hoko mo ia.

20 Bea koeuhi ko Isimeli, kuou fanogo kiate koe; Vakai, kuou tabuaki ia, bea teu gaohi ke toko lahi aubito ia; te ne fakatubu ae eiki e toko hogofulu ma toko ua, bea teu gaohi ia koe buleaga lahi.

21 Ka ko eku fuakava teu fakamau ia kia Aisake, aia e fanau‘i e Sela kiate koe, i he kuoga totonu i he ta‘u e hoko mai ni.

22 Bea gata ai ene lea kiate ia, bea haele hake ae Otua mei a Ebalahame.

¶ 23 Bea ave e Ebalahame hono foha ko Isimeli, mo kinautolu kotoabe nae faele i hono fale, mo kinautolu kotoabe nae fakatau aki ene koloa: ae tama tagata kotoabe i he fale o Ebalahame; o ne kamu akinautolu i he aho koia, o hage koia nae folofola aki e he Otua kiate ia.

24 Bea nae hivagofulu ma hiva ta‘u ae motua o Ebalahame, i hono kamu.

25 Bea nae hogofulu ma tolu ta‘u hono foha ko Isimeli, i he kamu ae kili o hono botu.

26 I he aho be taha koia nae kamu ai a Ebalahame mo hono foha ko Isimeli,

27 Bea moe tagata kotoabe o hono fale, nae tubu i hono fale, be fakatau aki ene koloa mei he muli, naa nau kamu kotoabe mo ia.