¶ 1 BEA nae motua a Ebalahame, bea lahi aubito a hono gaahi aho; bea nae tabuaki e Jihova a Ebalahame i he mea kotoabe.

2 Bea behe e Ebalahame ki ke motua tamaioeiki i hono fale, aia nae bule ki he ene mea kotoabe, Oku ou kole ke ke ai ho nima i hoku lalo tega:

3 He ko hoku loto, ke ke fuakava ia Jihova koe Otua oe lagi, bea koe Otua o mamani, ke oua naa ke fili ha unoho ki hoku foha i he gaahi ofefine oe kakai Kenani, aia oku ou aunofo ki ai.

4 Ka te ke alu ki hoku fonua, ki hoku kaiga, mo ke fili mai ha unoho ki hoku foha ko Aisake.

5 Bea beheage e he tamaioeiki kiate ia, Kabau e ikai fie ha‘u mo au ae fefine ki he fonua ni; e fefe, teu toe ave ho foha ki he fonua naa ke ha‘u mei ai?

6 Bea talaage e Ebalahame kiate ia, Vakai, oua aubito naa ke toe ave hoku foha ki ai.

7 Ko Jihova koe Otua oe lagi, aia nae omi au mei he fale o eku tamai, moe fonua o hoku kaiga, bea naa ne lea kiate au mo ne fuakava kiate au, o behe, Teu foaki ki ho hako ae fonua ni: te ne fekau ene agelo ke muomua iate koe, bea te ke omi mei ai ha unoho ki hoku foha.

8 Bea kabau e ikai loto ae fefine ke ha‘u mo koe, te ke ataatā ai mei he e ta fuakava ni: kae oua naa ke toe ave hoku foha ki ai.

9 Bea nae ai e he tamaioeiki hono nima ki he lalo tega o hono eiki ko Ebalahame, bea ne fuakava kiate ia, koeuhi koe mea ni.

¶ 10 Bea nae fili mai e he tamaioeiki ae kameli e hogofulu i he faga kameli a ene eiki, bea alu; he nae iate ia ae gaahi mea kotoabe a ene eiki, bea tuu hake ia o alu ki Mesobotemia, ki he kolo o Nehoa.

11 Bea naa ne fakatuulutui ene faga kameli i he tuaa kolo i he vee vaikeli, i he feituulaa efiafi, io, i he feituulaa oku alu ai ae kau fefine ke utu vai.

12 Bea behe eia, E Jihova koe Otua o eku eiki ko Ebalahame, oku ou kole kiate koe, ke ke fakamonuia au he aho ni, bea ke fakaha hoo ofa ki he eku eiki ko Ebalahame.

13 Vakai, oku ou tuu i heni, i he vee vaikeli; bea e ha‘u ae gaahi ofefine oe kakai oe kolo ke utu vai.

14 Tuku ke hoko o behe, ke iloga ae taahine, aia teu behe ki ai, Oku ou kole kiate koe, tuku hifo hoo hina, keu inu; bea te ne behe mai, Inu, bea teu fakainu hoo faga kameli foki; koia ia kuo ke fili maa hoo tamaioeiki ko Aisake: bea teu ilo ai kuo ke fakaha ae ofa ki he eku eiki.

¶ 15 Bea nae hoko, o behe, i he heeki ai oji ene lea, vakai nae ha‘u mo ene hinavai i hono uma, a Lebeka aia nae tubu ia Betueli, koe tama a Milika, koe unoho o Nehoa, koe taokete o Ebalahame.

16 Bea nae hoihoifua ae taahine ke jio ki ai, bea koe tāuboou ia, he nae heeki ilo‘i ia e ha tagata; bea ne alu hifo ia ki he vai, o fakafonu ene hina bea toe alu hake.

17 Bea lele ae tamaioeiki ke fakafetaulaki kiate ia, o ne behe kiate ia: Oku ou kole keu inu ha vai jii i hoo hina.

18 Bea beheage eia, Ko eku eiki ke ke inu; bea fakatootoo ia o tuku hifo ae hina ki hono nima, o ne fakainu ia.

19 Bea hili ene fakainu ia, bea behe eia, Teu utu ki hoo faga kameli foki ke oua ke nau fiu.

20 Bea fakatootoo ia, bea ligi ae vai mei he hina ki he tukuaga vai, bea toe lele ki he vai ke utu, bea naa ne utu ki he ene faga kameli kotoabe.

21 Bea nae ofo ae tagata kiate ia, kae fakalogo be, ko ene vakai be kuo fakamonuia e Jihova hono fonoga be ikai.

22 Bea nae hoko o behe, i he hili ae inu ae faga kameli, nae too e he tagata ae hau koula, koe vaheua oe sikeli siliva hono mamafa, bea moe lelu koula e ua ki hono nima, koe sikeli e hogofulu hono mamafa.

23 Bea ne behe, Koe ofefine ohai koe? Oku ou kole ke ke tala mai, be oku ataatā ae abi o hoo tamai ke mau abitaga ai.

24 Bea ne behe kiate ia, Koe ofefine au o Betueli koe tama a Milika, aia naa ne faele‘i kia Nehoa.

25 Bea ne behe foki kiate ia, Oku mau ma‘u ae mohuku moe meakai lahi, bea oku ataatā ho mau abi ke  mou abitaga ki ai.

26 Bea tulolo hifo ae tagata hono ulu, bea hu ia kia Jihova.

27 O ne behe, Oku monuia a Jihova koe Otua a eku eiki ko Ebalahame, aia oku ikai te ne fakamajiva eku eiki i he ene aloofa mo ene mooni; naaku i he hala, bea kuo tataki au e Jihova ki he fale oe kaiga o eku eiki.

28 Bea nae lele ae taahine, o fakaha ki he fale o ene fa‘e, ae gaahi mea ni.

¶ 29 Bea nae i ai ae tuogaane o Lebeka ko Lebani hono higoa; bea lele kitua a Lebani ki he tagata, i he vaikeli.

30 Bea nae hoko o behe, i he ene mamata ki he hau, moe lelu i he nima o hono tuofefine, bea mo ene fanogo ki he gaahi lea a Lebeka ko hono tuofefine, o behe, Nae lea behe mai ae tagata kiate au; bea ha‘u leva ia ki he tagata; bea vakai nae tuu ia o ofi ki he faga kameli i he vee vaikeli.

31 Bea behe eia, Ha‘u ki heni, akoe koe monuia o Jihova; koeha oku ke kei tuu ai ituaa? he kuo oji eku teu ae fale, moe botu ki he faga kameli.

¶ 32 Bea nae hu ae tagata ki he fale; bea ne vete ae faga kameli, bea ne atu ae mohuku moe meakai ki he faga kameli, moe vai ke fufulu ai hono va‘e, moe va‘e oe kau tagata nae iate ia.

33 Bea nae tuku i hono ao ae meakai: ka nae behe eia, E ikai teu kai, kae oua mu‘a keu fakaha eku fekau, Bea ne behe, Ke ke lea.

34 Bea ne behe eia, Koe tamaioeiki au a Ebalahame,

35 Bea kuo tabuaki lahi e Jihova a eku eiki; bea kuo hoko ia o lahi: bea kuo ne foaki kiate ia ae faga sibi, moe faga manu, moe siliva, moe koula, moe kau tamaioeiki moe kau kaunaga, moe faga kameli, moe faga asi.

36 Bea ko Sela, koe unoho o eku eiki, naa ne fanau‘i ki he eku eiki ae tama i he ene motua; bea kuo ne tuku a ene mea kotoabe kiate ia.

37 Bea nae fekau e he eku eiki kiate au keu fuakava, o behe, E ikai te ke fili ha unoho ki hoku foha mei he gaahi ofefine oe kakai Kenani, aia oku o nautolu ae fonua oku ou nofo ai;

38 Ka ke alu ki he fale o eku tamai, mo hoku kaiga, o omi mei ai ha unoho ki hoku foha.

39 Bea naaku behe ki he eku eiki, Ka e fefe oka ikai fie ha‘u ae fefine mo au?

40 Bea behe mai eia kiate au, Ko Jihova aia oku ou alu i hono ao, te ne fekau ene agelo  ke alu mo koe o fakamonia hoo alu; bea te ke omi ha unoho ki hoku foha mei hoku kaiga moe fale o eku tamai:

41 Bea te ke ataatā mei he eku fuakava ni, oka ke ka hoko ki hoku kaiga, bea kabau e ikai te nau tuku ha toko taha kiate koe, bea te ke ataatā mei he e ta fuakava ni.

42 Bea naaku ha‘u he aho ni ki he vaikeli beau behe, E Jihova koe Otua o eku eiki ko Ebalahame, kabau oku ke fakamonuia hoku hala, aia oku ou alu ai:

43 Vakai oku ou tuu i he vee vaikeli; bea teu behe, oka ha‘u ha taahine ke utu vai, teu behe kiate ia, Oku ou kole kiate koe, tuku mai ha vai jii i hoo hina keu inu:

44 Bea kabau te ne behe mai kiate au, Inu koe, bea teu utu ha vai ki hoo faga kameli foki, ofa koe fefine koia kuo fili e Jihova ki he foha o eku eiki.

45 Bea nae heeki ai oji eku lea i hoku loto, mo ene hoko mai a Lebeka mo ene hina i hono uma: bea hifo ia ki he vai, o utu, bea neu behe kiate ia, Oku ou kole kiate koe tuku mai keu inu.

46 Bea nae fakatootoo ia o tuku hifo ene hina mei hono uma, o ne behe, Inu, bea teu fakainu hoo faga kameli foki; beau inu, bea naa ne fakainu ae faga kameli foki.

47 Bea naaku fehui kiate ia o behe, koe ofefine ohai koe? Bea behe eia, koe ofefine o Betueli, koe foha o Nehoa aia nae fanau‘i e Milika kiate ia: bea naaku ai ae hau ki hono mata, moe lelu ki hono nima.

48 Bea bunou hifo hoku mata o hu mo fakafetai kia Jihova, koe Otua o eku eiki ko Ebalahame, aia nae tataki au i he hala totonu ke ave ae ofefine oe tokoua a eku eiki ki hono foha.

49 Bea koeni, kabau te mou fai ofa mo totonu, ki he eku eiki, tala mai, bea ka ikai, tala mai, koeuhi keu afe ki he nima toomatau, be ki he toohema.

50 Bea lea a Lebani mo Betueli, o beheage, Oku ha‘u ae mea ni mei a Jihova; bea oku ikai te ma faa lea aki kiate koe ae kovi be koe lelei;

51 Vakai, oku i ho ao a Lebeka, too ia, bea alu, bea ke hoko ia koe unoho ki he foha o hoo eiki, o hage koe folofola a Jihova.

52 Bea i he fanogo ae tamaioeiki a Ebalahame ki he gaahi lea ni, nae hu ia kia Jihova, o ne bunou ki he kelekele;

53 Bea too e he tamaioeiki ae gaahi teuga siliva, moe gaahi teuga koula, moe gaahi kofu, o ne foaki ia kia Lebeka; bea ne foaki ae gaahi mea mahuiga ki hono tuogaane, mo ene fa‘e.

54 Bea naa nau kai mo inu, koia moe kau tagata nae iate ia, bea nau mohe i he bo koia: bea nau tuu hake i he bogibogi, bea naa ne behe, Tuku au keu alu ki he eku eiki.

55 Bea beheage e hono tuogaane mo ene fa‘e, tuku mu‘a ke mau nonofo moe taahine i he aho niihi, ae aho e hogofulu nai; bea hili ia e toki alu atu.

56 Bea beheage eia kiate kinaua, Oua te mo taofi au, he kuo fakamonuia e Jihova hoku hala: tuku au keu alu ki he eku eiki.

57 Bea naa na behe, te ma ui ae taahine o fehui mei hono gutu.

58 Bea naa na ui a Lebeka, o behe kiate ia, Te ke alu moe tagata ni bea beheage eia, Teu alu.

59 Bea naa nau tuku a Lebeka ko ho nau tuofefine ke ne alu mo hono fefine tauhi, moe tamaioeiki a Ebalahame, mo ene kau tagata.

60 Bea naa nau tabuaki a Lebeka o behe kiate ia, Ko ho mau tuofefine koe, ofa ke ke hoko koe koe fa‘e oe gaahi toko afe taefaalaua, bea ke ma‘u e ho hako ae mataba onautolu oku fehia kiate koe.

¶ 61 Bea nae tuu hake a Lebeka mo hono kau fefine, bea nau heka i he faga kameli e muimui ki he tagata; bea ave a Lebeka e he tamaioeiki, bea fonoga i hono hala.

62 Ka nae ha‘u a Aisake i he hala mei he vai ko Lehai‐loai; he naa ne nofo i he botu toga.

63 Bea alu atu a Aisake ki he goue i he efiafi, ke ne lotu; bea ne haga hake hono mata o jio, bea vakai oku ha‘u ae faga kameli.

64 Bea haga hake e Lebeka hono mata, bea i he ene mamata kia Aisake, nae alu hifo ia mei he kameli.

65 He kuo oji ene fehui ki he tamaioeiki, o behe, Kohai ae tagata koia oku ha‘u i he goue ke fakafetaulaki mai kiate kitautolu? Bea nae beheage e he tamaioeiki, Ko eku eiki ia: koia naa ne too ai ae bulubulu, o fakabulou aki ia.

66 Bea nae fakamatala e he tamaioeiki kia Aisake ae gaahi mea kotoabe naa ne fai.

67 Bea nae omi ia e Aisake ki he fale fehikitaki o ene fa‘e ko Sela, bea ne ma‘u a Lebeka, bea hoko ia ko hono unoho: bea ofa ia kiate ia; bea nae fiemalie a Aisake i he hiliage  ae bekia o ene fa‘e.