¶ 1 BEA ha‘u a Josefa o fakaha kia Felo, o behe, Kuo ha‘u eku tamai mo hoku gaahi kaiga moe nau faga sibi, moe faga manu, moe nau mea kotoabe, mei he fonua ko Kenani; bea vakai oku nau i he fonua ko Koseni.

2 Bea naa ne ave ae niihi o hono gaahi tokoua, io, ae kau tagata e toko nima, o ne fakaha akinautolu kia Felo.

3 Bea nae behe e Felo ki hono gaahi tokoua, Koeha hoo mou faiva? Bea nau talaage kia Felo, Koe tauhi sibi a hoo kau tamaioeiki, akimautolu moe mau gaahi tamai foki.

4 Bea naa nau behe foki kia Felo, Kuo mau ha‘u ke mau aunofo i he fonua; he oku ikai i hoo kau tamaioeiki ha meakai ki he e mau faga manu; he kuo lahi aubito ae hoge i he fonua ko Kenani, koia oku mau kole ai tuku ke nofo a hoo kau tamaioeiki i he fonua ko Koseni.

5 Bea lea a Felo kia Josefa o behe, Kuo ha‘u kiate koe a hoo tamai mo ho gaahi kaiga:

6 Oku i ho ao ae fonua, kotoabe ko Ijibite; i he botu lelei oe fonua ke ke tuku ke nofo ai hoo tamai mo ho gaahi tokoua: tuku ke nau nofo i he fonua ko Koseni: bea kabau oku ke ilo ha kau tagata boto iate kinautolu, bea ke fakanofo akinautolu ke nau bule‘i eku faga manu.

7 Bea omi e Josefa ene tamai ko Jekobe, o tuku ia ki he ao o Felo; bea nae tabuaki e Jekobe a Felo.

8 Bea nae fehui a Felo, kia Jekobe, o behe, Oku fiha ho ta‘u?

9 Bea behe e Jekobe kia Felo, Koe gaahi aho oe ta‘u o hoku fonoga, koe ta‘u e teau moe ta‘u e tolugofulu: kuo jii mo kovi be ae gaahi aho oe gaahi ta‘u o eku moui, bea oku teeki ai a‘u ia ki he gaahi aho oe gaahi ta‘u oe moui a eku gaahi tamai, i he gaahi aho o ho nau fonoga.

10 Bea nae tabuaki e Jekobe a Felo, bea alu ia mei he ao o Felo.

¶ 11 Bea nae tuku e Josefa ene tamai mo hono gaahi tokoua o ne foaki kiate kinautolu ae nofoaga i he fonua ko Ijibite, i he botu lelei i he fonua ko Lamesisi, o hage koe fekau a Felo.

12 Bea nae tauhi e Josefa ene tamai, mo hono gaahi kaiga, moe kau nofoaga kotoabe o ene tamai aki ae ma, o fakatatau mo ho nau gaahi abi.

¶ 13 Bea nae ikai ha ma i he fonua kotoa; he nae lahi ae hoge, bea nae vaivai ae fonua kotoa o Ijibite, mo Kenani, koeuhi koe hoge.

14 Bea nae tanaki e Josefa ae baaga kotoabe nae ilo i he fonua kotoabe ko Ijibite, moe fonua ko Kenani, koe totogi oe koane naa nau fakatau; bea omi e Josefa ae gaahi baaga ki he fale o Felo.

15 Bea kuo oji ae gaahi baaga i he fonua ko Ijibite, moe fonua ko Kenani, bea ha‘u ae kakai Ijibite kotoabe kia Josefa o nau behe, Tuku mai haa mau ma; he koeha te mau mate ai i ho ao? he kuo ikai ha baaga.

16 Bea beheage e Josefa, Tuku mai hoo mou faga manu: bea teu atu ae ma koeuhi ko hoo mou faga manu, o kabau kuo oji ae baaga.

17 Bea naa nau omi e nau faga manu kia Josefa; bea atu e Josefa kiate kinautolu ae ma, koe fetogi oe nau faga hose moe faga sibi, moe nau faga manu lalahi moe faga asi; bea ne fafaga akinautolu i he ta‘u koia, koeuhi koe nau faga manu.

18 Bea i he oji ae ta‘u koia, bea nau toe ha‘u kia Josefa i hono ua oe ta‘u, o nau behe kiate ia, E ikai te mau fakafufu mei ho mau eiki, kuo oji e mau baaga; bea kuo ma‘u foki e ho mau eiki e mau faga manu: oku ikai toe ha mea i he ao o ho mau eiki, ka ko ho mau jino be mo ho mau gaahi fonua.

19 Koeha te mau mate ai i ho ao, akimautolu mo ho mau fonua? ke ke fakatau akimautolu mo ho mau fonua aki ae ma, bea te mau hoko, mo ho mau fonua, koe kau tamaioeiki kia Felo; bea tuku kiate kimautolu ae tega, koeuhi ke mau moui, kae ikai mate, bea ke oua naa lala ae fonua.

20 Bea nae fakatau e Josefa ae fonua kotoabe o Ijibite, kia Felo; he nae taki taha fakatau e he kakai Ijibite a ene goue; he koeuhi nae fakavaivai‘i akinautolu e he hoge; bea nae ma‘u e Felo ae fonua kotoabe.

21 Bea koeuhi koe kakai, naa ne tuku akinautolu ki he gaahi kolo mei he gataaga e taha o Ijibite o a‘u ki hono gataaga e taha.

22 Ka koe fonua oe kau taulaeiki nae ikai te ne fakatau; he nae atu ae inaji ki he kau taulaeiki mei a Felo, bea naa nau kai aia nae foaki e Felo kiate kinautolu; koia nae ikai ai te nau fakatau ho nau fonua.

23 Bea nae behe e Josefa ki he kakai, Vakai, kuou fakatau akimoutolu he aho ni, m ho mou fonua, ma a Felo: vakai mai, koe tega eni kiate kimoutolu, bea te mou tūtū‘i aki ae fonua.

24 Bea e hoko o behe, i hono tubu te mou omi hono vahe nima kia Felo, ka koe vahe e fa e iate kimoutolu ia, koe tega ki hoo mou goue, moe mea kai kiate kimoutolu, mo kinautolu i ho mou kau nofoaga, moe meakai ki hoo mou fānau.

25 Bea naa nau behe, Kuo fakahaofi e mau moui; ofa ke mau ilo ae ofa i he ao o ho mau eiki, bea mau nofo koe kau tamaioeiki kia Felo.

26 Bea nae fokotuu ia e Josefa koe fono ki he fonua kotoabe o Ijibite o a‘u ki he aho ni, koeuhi ke ma‘u e Felo hono vahe nima; ka nae ikai behe ki he fonua oe kau taulaeiki aia nae ikai ma‘u e Felo.

¶ 27 Bea nae nofo a Isileli i Ijibite, i he fonua ko Koseni; bea naa nau ma‘u ae gaahi fonua, bea naa nau tubu o toko lahi aubito.

28 Bea nae moui a Jekobe i he fonua ko Ijibite i he ta‘u e hogofulu ma fitu; bea koe ta‘u kotoabe o Jekobe, koe ta‘u e teau moe ta‘u e fagofulu ma fitu.

29 Bea nae ofi ae aho ke bekia ai a Isileli; bea ui ia ke ha‘u hono foha ko Josefa, o ne behe kiate ia, Koeni, kabau kuou ma‘u ae ofa i ho ao, bea ke ai ho nima i hoku lalo tega, mo ke fai agalelei mo mooni kiate au; oku ou kole kiate koe, oua naa ke tanu au i Ijibite.

30 Ka teu tokoto au mo eku gaahi tamai, bea te ke fata au mei Ijibite, o tanu au i ho nau tanuaga. Bea nae behe eia, Teu fai o hage ko hoo lea.

31 Bea naa ne behe, Fuakava mai kiate au. Bea ne fuakava kiate ia. Bea nae bunou a Isileli ki he ulu‘i mohega.