¶ 1 BEA nae hoko o behe, i he fanogo e Atoni‐seteki koe tu‘i o Jelusalema kuo ma‘u e Josiua a Ai, bea kuo ne fakaauha aubito ia; hage koia naa ne fai ki Jeliko mo hono tu‘i, kuo behe be ene fai ki Ai mo hono tu‘i: bea koeuhi kuo fakalelei mo Isileli ae kakai o Kibione, bea kuo nau nonofo;

2 Naa nau manavahe lahi ai, he koeuhi koe kolo lahi a Kibione, o hage ha kolo oe houeiki, bea koeuhi nae lahi ia ia Ai, bea koe kau tagata kotoabe i ai koe kau malohi.

3 Koia nae fekau ai e Atoni‐seteki koe tu‘i o Jelusalema kia Hoami koe tu‘i a Hebeloni, bea kia Bilami koe tu‘i o Jamuti, bea kia Jafia koe tu‘i o Lakisi, bea kia Tiba koe tu‘i o Ekeloni, o behe,

4 Mou ha‘u ni kiate au, o tokoni au, koeuhi ke tau ta‘i a Kibione: he kuo fakalelei ia mo Josiua bea moe fānau a Isileli.

5 Koia, koe tu‘i e toko nima oe kau Amoli, koe tu‘i o Jelusalema, koe tu‘i o Hebeloni, koe tu‘i o Jamuti, koe tu‘i o Lakisi, koe tu‘i o Ekeloni, nae fakataha akinautolu, o alu hake, akinautolu moe nau tau kotoabe, o abitaga i he ao o Kibione, ko ha nau tau‘i ia.

¶ 6 Bea nae fekau e he kau tagata o Kibione kia Josiua i he abitaga i Kilikali, o behe; Oua naa ke fakatuai ho nima mei hoo kau tamaioeiki; ka ke alu vave hake kiate kimautolu, o fakamoui akimautolu, bea tokoni‘i akimautolu: he koe gaahi tu‘i kotoabe oe kau Amoli oku nofo i he gaahi mouga kuo nau katoa kiate kimautolu ko ho mau tau‘i.

7 Bea nae alu hake ai a Josiua mei Kilikali, aia, moe kakai tau kotoabe mo ia, moe kau tagata malohi kotoabe moe to‘a.

¶ 8 Bea nae folofola a Jihova kia Josiua, Oua naa ke manavahe kiate kinautolu: he kuou tukuage akinautolu ki ho nima: oku ikai ha tagata e toko taha iate kinautolu te ne tuu i ho ao.

9 Koia nae ha‘u o hoko fakafokifa be a Josiua kiate kinautolu, o alu hake i he bouli mei Kilikali.

10 Bea nae veuveuki akinautolu e Jihova i he ao o Isileli, bea nae tamate‘i akinautolu i he ta lahi i Kibione, bea tuli akinautolu i he hala oku alu hake ki Bete‐holoni, bea nae teia akinautolu o a‘u ki Aseka, bea ki Maketa.

11 Bea nae hoko o behe, i he e nau hola mei he ao o Isileli, bea i he hala oku alu hifo ki Bete‐holoni, nae li hifo ai e Jihova mei lagi, ae gaahi maka lahi kiate kinautolu o a‘u ki Aseka, bea naa nau mate ai: nae toko lahi hake akinautolu nae mate i he uha maka iate kinautolu nae tamate‘i e he fānau a Isileli aki ae heleta.

¶ 12 Bea nae toki lea a Josiua kia Jihova i he aho aia nae tukuage ai e Jihova ae kau Amoli i he ao oe fānau a Isileli, bea nae behe eia i he ao o Isileli kotoabe, Laa, ke ke tuu mau koe ki Kibione; bea ko koe, Mahina, i he telea o Ajaloni.

13 Bea nae tuu mau ae laa, bea nae tatali be ae mahina, kae oua ke oji ae fai totogi e he kakai ki ho nau fili. Ikai kuo tohi ae mea ni i he tohi a Jesa? Bea koia nae tuu mau ae laa i he loto lagi, bea nae ikai fakavave ke alu hifo ia i hono tatau nai moe aho kotoa.

14 Bea nae ikai ha aho o hage koia i mu‘a be kimui o ia, koeuhi ke tokaga a Jihova ki he le‘o oe tagata: he nae tau a Jihova koeuhi ko Isileli.

¶ 15 Bea nae liu mai a Josiua, mo Isileli kotoabe mo ia, ki he abitaga i Kilikali.

16 Ka nae hola ae kau tu‘i e toko nima ni, o  nau fufu akinautolu i he ana i Maketa.

17 Bea nae tala kia Josiua, o behe, Kuo ilo ae tu‘i e toko nima kuo nau fufu i he ana i Maketa.

18 Bea behe e Josiua, Teka‘i ae gaahi maka lalahi ki he gutu ana, bea fakanofo ki ai ae kau tagata ke leohi akinautolu:

19 Bea oua naa mou tatali, kae tuli ki ho mou gaahi fili, bea ta‘i ho nau muifonoga; oua naa mou tuku akinautolu ke hu ki he e nau gaahi kolo: he kuo tuku akinatuolu e Jihova ko ho mou Otua ki ho mou nima.

20 Bea nae hoko o behe, i he fakaoji hono ta‘i akinautolu e Josiua moe fānau a Isileli, i he tamate‘i lahi aubito, ke nau auha ai, nae hu akinautolu nae hao ki he gaahi kolo malohi.

21 Bea nae liu mai ae kakai kotoabe ki he abitaga kia Josiua i Maketa i he fiemalie: nae ikai lea kovi ha toko taha ki he fānau a Isileli.

22 Bea toki behe ai e Josiua, Too ae gutu ana, o omi ae tu‘i na e toko nima kiate au mei he ana.

23 Bea naa nau fai ia, o omi kitua kiate ia ae tu‘i koia e toko nima mei he ana, koe tu‘i o Jelusalema, moe tu‘i o Hebeloni, moe tu‘i o Jamuti, moe tu‘i o Lakisi, moe tui o Ekeloni.

24 Bea nae hoko o behe, i he e nau omi ae gaahi tu‘i na kia Josiua, nae fekau e Josiua ki he kau tagata kotoabe o Isileli, o ne behe ki he gaahi eiki oe kau tau aia nae alu mo ia, Mou unuunu mai, bea ai ho mou va‘e ki he kia oe gaahi tu‘i ni. Bea naa nau unuunu mai bea nae ai ho nau va‘e ki ho nau kia.

25 Bea nae behe e Josiua kiate kinautolu, Oua naa mou manavahe, bea oua naa mou lilika, ka mou malohi, bea loto to‘a: he koeuhi e fai behe be e Jihova ki ho mou gaahi fili aia oku mou tau‘i.

26 Bea hili ia nae ta‘i e Josiua akinautolu, o tamate‘i, bea ne tautau akinautolu ki he akau e nima: bea nae tautau ai be akinautolu ki he akau o a‘u ki he efiafi.

27 Bea nae hoko o behe, i he feituu efiafi oe to ae laa, nae fekau e Josiua, bea naa nau tuku hifo akinautolu mei he gaahi akau, bea nae li akinautolu ki he ana aia nae fufu ai akinautolu, bea nae hili ae gaahi maka lalahi ki he gutu ana, bea oku kei ai ni.

¶ 28 Bea nae kaba e Josiua i he aho koia a Maketa, o ne ta‘i aki ia ae mata oe heleta, moe tu‘i o ia naa ne fakaauha, akinautolu, moe kakai kotoabe nae i ai; nae ikai tuku eia ha toko taha ke toe: bea nae fai eia ki he tu‘i o Maketa o hage ko ene fai ki he tu‘i o Jeliko.

29 Bea nae alu ai a Josiua mei Maketa, mo Isileli kotoabe mo ia, ki Libina, o ne tau‘i a Libina:

30 Bea nae tukuage foki ia e Jihova, mo hono tu‘i ki he nima o Isileli; bea ne ta‘i aki ia ae mata oe heleta, moe kakai kotoabe nae i ai; nae ikai tuku eia ha niihi ke toe i ai; ka nae fai ki hono tu‘i o hage koia nae fai ki he tu‘i o Jeliko.

¶ 31 Bea nae alu a Josiua mei Libina, mo Isileli kotoabe mo ia, ki Lakisi, o ne abitaga ki ai, o ne tau‘i ia:

32 Bea nae tukuage e Jihova a Lakisi ki he nima o Isileli, aia naa ne kaba ia i hono ua oe aho, o ne ta‘i aki ia ae mata oe heleta, moe kakai kotoabe nae i ai, o hage koia kotoabe naa ne fai ki Libina.

¶ 33 Bea nae ha‘u a Holami koe tu‘i o Kesa ke tokoni a Lakisi; bea ta‘i ia e Josiua mo hono kakai, bea nae ikai tuku eia ha niihi kiate ia ke toe.

¶ 34 Bea nae alu a Josiua mei Lakisi ki Ekeloni, mo Isileli kotoabe mo ia: bea nau abitaga ki ai, o tau‘i ia:

35 Bea naa nau lava‘i ia i he aho koia o ta‘i aki ia ae mata oe heleta, moe kakai kotoabe nae i ai, naa ne fakaauha akinautolu i he aho koia, o hage koia kotoabe naa ne fai ki Lakisi.

36 Bea nae alu a Josiua mei Ekeloni, mo Isileli kotoabe mo ia, ki Hebeloni; bea nau tau‘i ia;

37 Bea nau lava‘i ia, o ta‘i aki ia ae mata oe heleta, mo hono tu‘i, mo hono gaahi holo, moe kakai kotoabe nae i ai: nae ikai tuku eia ha niihi ke toe, kae hage koia naa ne fai ki Ekeloni; nae fakaauha aubito ia, moe kakai kotoabe nae i ai.

¶ 38 Bea nae liu mai a Josiua, mo Isileli kotoabe mo ia, ki Tiba; o tau‘i ia:

39 Bea naa ne lava‘i ia, mo hono tu‘i, moe gaahi kolo kotoabe i ai; bea naa nau ta‘i akinautolu aki ae mata oe heleta, bea fakaauha ae kakai kotoabe nae i ai; nae ikai tuku eia ha niihi ke toe: hage koia naa ne fai ki Hebeloni, nae behe ene fai ki Tiba, bea ki hono tu‘i; hage koia foki naa ne fai ki Libina, bea ki hono tu‘i.

¶ 40 Nae behe ae ta‘i e Josiua ae fonua kotoabe oe gaahi mouga, bea moe botu toga, bea moe tafagafaga, moe gaahi matavai, bea mo ho nau gaahi tu‘i kotoabe: nae ikai tuku eia ha niihi ke toe, ka nae fakaauha akinautolu kotoabe nae manava, o hage koe fekau a Jihova koe Otua o Isileli.

41 Bea nae ta‘i akinautolu e Josiua mei Ketesi‐bania o a‘u ki Kesa, moe fonua kotoabe o Koseni o a‘u ki Kibione.

42 Bea koe gaahi tu‘i ni mo ho nau fonua nae ma‘u e Josiua i he kuoga be taha, he ko Jihova koe Otua o Isileli naa ne tau ma a Isileli.

43 Bea nae liu mai a Josiua, mo Isileli kotoabe mo ia, ki he abitaga i Kilikali.