¶ 1 BEA nae folofola a Jihova foki kia Josiua, o behe,

2 Ke ke lea ki he fānau a Isileli, o behe, Fili moo moutolu ae gaahi kolo ke hufaga ki ai, aia naaku lea ai kiate kimoutolu i he nima o Mosese:

3 Koeuhi ke hola ki ai ae fakabo aia oku ne tamate‘i lavenoaia ha toko taha o tae loto ki ai: bea e iate kimoutolu ia ko ho mou hufaga mei he totogi toto.

4 Bea ka tuu i he mataba o ha kolo e taha i he gaahi kolo ni, aia oku ne hola ki ai, o ne fakamatala ene mea i he teliga oe kau mātua oe kolo koia, te nau ave ia ki he kolo kiate kinautolu, o nau tuku kiate ia ha botu, ke ne nofo ai mo kinautolu.

5 Bea kabau oku tuli ia e he totogi toto, e ikai ai te nau tukuage ae fakabo ki hono nima; koeuhi naa ne ta lavenoaia hono kaugaabi, ka nae ikai tomua fehia kiate ia.

6 Bea e nofo ia i he kolo koia, ke oua ke tuu ia i he ao oe fakataha i he fakamāu, bea ke oua ke bekia ae taulaeiki lahi aia e i he gaahi aho koia: bea e toki liu mai ae tamate fainoa, o ha‘u ki he ene kolo, bea ha‘u ki hono fale, ki he kolo nae hola ia mei ai.

¶ 7 Bea naa nau fili a Ketesi i Kaleli i he mouga o Nafitalai, mo Sikemi i he mouga o Ifalemi, mo Keja‐aliba, aia ko Hebeloni, i he mouga o Juta.

8 Bea i he kauvai e taha o Joatani ofi ki Jeliko i he botu hahake, naa nau fili a Beseli i he toafa ki he botu oe faahiga o Lubeni, mo Lemoti i Kiliati mei he faahiga o Kata, mo Kolani Besani mei he faahiga o Manase.

9 Ko eni ae gaahi kolo nae fili ki he fānau kotoabe a Isileli, bea ki he muli oku aunofo iate kinautolu, koeuhi koia oku ne tamate lavenoaia ha toko taha, ke hola ia ki ai, ke oua naa mate ia i he nima oe totogi toto, kae oua ke tuu ia i he ao oe fakataha.