¶ 1 BEA nae hoko o behe, i he fanogo a Jabini koe tu‘i o Hasoa ki he gaahi mea ni, nae fekau ia kia Jobabi koe tu‘i o Matoni, bea ki he tu‘i o Similoni, bea ki he tu‘i o Akisafi,

2 Bea ki he gaahi tu‘i oku i he botu tokelau oe gaahi mouga, bea i he gaahi toafa o Kineloti, bea i he telea, bea i he gaahi botu o Toa ki he botu hihifo,

3  Bea ki he kakai Kenani i he botu hahake, bea ki luluga, bea ki he kakai Amoli, moe kakai Heti, moe kakai Belesi, moe kakai Jebusi i he gaahi mouga, bea ki he kakai Hevi i lalo i Heamoni i he fonua ko Misiba.

4 Bea naa nau alu kituaa, akinautolu moe nau gaahi tau kotoabe, koe fuu kakai lahi, o hage hono toko lahi koe oneone oku i he matātahi, moe gaahi hose moe gaahi jaliote lahi aubito.

5 Bea i he fakakatoa ae gaahi tu‘i ni, naa nau ha‘u o abitaga i he gaahi vai o Melomi, ke nau tau‘i a Isileli.

¶ 6 Bea nae folofola a Jihova kia Josiua, Oua naa ke manavahe koeuhi ko kinautolu: he koe feituulaa ni abogibogi teu tuku ke tamate‘i akinautolu kotoabe i he ao o Isileli: te ke tutuu ae uoua  oe va‘e oe nau faga hose, bea tutu e nau gaahi jaliote i he afi.

7 Koia nae ha‘u fakafokifa ai a Josiua moe kakai tau kotoabe mo ia, kiate kinautolu ki he gaahi vai o Melomi; bea naa nau oho atu kiate kinautolu.

8 Bea nae tukuage e Jihova akinautolu ki he nima o Isileli, bea nau ta‘i akinautolu, bea nae tuli akinautolu ki Saitoni lahi, bea ki Misilefoti‐meimi, bea ki he telea o Misiba ki he botu hahake; bea naa nau ta‘i akinautolu, o ikai tuku ha niihi ke toe.

9 Bea nae fai e Josiua kiate kinautolu o hage koe fekau a Jihova kiate ia: ne ne tutuu ae uoua oe va‘e oe nau faga hose, bea ne tutu e nau gaahi jaliote aki ae afi.

¶ 10 Bea nae liu mai a Josiua i he kuoga koia, o ne ma‘u a Hasoa, o ne ta‘i hono tu‘i aki ae heleta: he ko Hasoa koe ulu ia i mu‘a ki he gaahi buleaga ni kotoabe.

11 Bea naa nau ta‘i ae kakai kotoabe nae i ai aki ae mata oe heleta, o fakaauha akinautolu: nae ikai ha niihi ke toe ke moui: bea naa ne tutu a Hasoa aki ae afi.

12 Bea koe gaahi kolo kotoabe oe gaahi tu‘i koia, bea mo ho nau gaahi tu‘i, nae ma‘u e Josiua, o ne ta‘i akinautolu aki ae mata oe heleta, o ne fakaauha akinautolu, o hage koe fekau a Mosese koe tamaioeiki a Jihova.

13 Ka koeuhi koe gaahi kolo nae kei tuu be i ho nau malohi, nae ikai tutu ia e Isileli, ka ko Hasoa be: koia ia nae tutu e Josiua.

14 Bea koe mea vete kotoabe oe gaahi kolo ni, moe faga manu, nae too e he fānau a Isileli koe koloa kiate kinautolu; ka naa nau ta‘i ae tagata kotoabe aki ae mata oe heleta, ke oua ke nau auha iate kinautolu, bea nae ikai te nau tuku ha niihi ke moui.

¶ 15 Hage koe fekau a Jihova ki he ene tamaioeiki ko Mosese, nae behe be hono fekau‘i e Mosese a Josiua, bea nae fai ia e Josiua: nae ikai tuku eia ha mea e taha tae fai, i he mea kotoabe nae fekau e Jihova kia Mosese.

16 Koia nae ma‘u e Josiua ae fonua kotoabe, koe gaahi mouga, moe gaahi fonua ki he botu toga, moe fonua kotoabe ko Koseni, moe telea, moe toafa, moe mouga o Isileli, bea moe tafagafaga o ia;

17 Io, mei he mouga ko Halaki, oku alu hake ki Seia, io o a‘u atu ki Beali‐kata i he telea o Lebanoni i lalo i he mouga ko Heamoni: mo ho nau gaahi tu‘i naa ne ma‘u, o ta‘i, mo tamate‘i akinautolu.

18 Nae fai fuoloa e Josiua ae tau moe gaahi tu‘i koia.

19 Nae ikai ha kolo nae fakalelei moe fānau a Isileli, ka koe kakai Hevi oku nofo i Kibione: ko hono toe kotoabe naa nau lava‘i i he tau.

20 He nae ia Jihova ke fakafefeka ho nau loto, koeuhi ke nau ha‘u agatuu ki Isileli ke tau, koeuhi ke ne fakaauha aubito akinautolu, bea ke oua naa nau ma‘u ae ofa, ka koeuhi ke ne fakaauha akinautolu, o hage koe fekau a Jihova kia Mosese.

¶ 21 Bea nae ha‘u a Josiua i he kuoga koia, o ne motuhi ae kau Anaki mei he gaahi mouga, mei Hebeloni, mo Tiba, mo Anabi, bea mei he mouga kotoabe o Juta, bea mei he gaahi mouga kotoabe o Isileli: nae fakaauha aubito akinautolu e Josiua moe nau gaahi kolo.

22 Nae ikai hano toe oe kau Anaki i he fonua oe fānau a Isileli: ka nae toe  ha niihi i Kesa, mo Kati, bea i Asitoti.

23 Koia, nae ma‘u e Josiua ae fonua kotoa, o hage koia nae folofola ai a Jihova kia Mosese; bea nae foaki ia e Josiua ki Isileli ko ho nau tofia, a fakatatau ki he vahevahe o ho nau gaahi faahiga. Bea nae mālōlō ae fonua mei he tau.