¶ 1 BEA nae i ai ae tofia ki he faahiga o Manase; he koe uluaki foha ia o Josefa; kia Mekili koe uluaki foha o Manase, koe tamai a Kiliati: koeuhi koe tagata tau ia, koia naa ne ma‘u ai a Kiliati mo Besani.

2 Bea nae i ai ae tofia ki hono toe oe fānau a Manase i ho nau gaahi faahiga: ki he faahiga a Ebiesa, bea ki he fānau a Eleki, bea ki he fānau a Esileli, bea ki he fānau a Sikemi, bea ki he fānau a Hefeli bea ki he fānau a Simita: koe gaahi fānau tagata eni a Manase koe foha a Josefa i ho nau gaahi faahiga.

¶ 3 Ka ko Sailofitati, koe foha o Hefeli, koe foha o Kiliati, koe foha o Mekili, koe foha o Manase, nae ikai hano foha, ka koe gaahi ofefine: bea koe gaahi higoa eni o hono gaahi ofefine, ko Mala, mo Noa, mo Hokila, mo Milika, mo Tilisa.

4 Bea naa nau ha‘u o ofi ki he ao o Eliesa koe taulaeiki, bea ki he ao o Josiua koe foha o Nuni, bea ki he ao oe houeiki, o behe, Nae fekau e Jihova kia Mosese ke foaki kiate kimautolu ha mau tofia fakataha mo ho mau kaiga. Koia naa ne foaki kiate kinautolu ae tofia fakataha moe kaiga oe nau tamai o fakatatau ki he fekau a Jihova.

5 Bea nae hoko kia Manase ae gaahi koga e hogofulu, ka oku kehe ae fonua o Kiliati mo Besani, aia nae i he kauvai e taha o Joatani;

6 Koeuhi nae ma‘u foki e he gaahi ofefine o Manase ha nau tofia fakataha mo hono gaahi foha: bea ko hono toe oe foha o Manase naa nau ma‘u ae fonua ko Kiliati.

¶ 7 Bea koe gataaga oe botu o Manase nae fai mei Aseli ki Mikimeta, aia oku hagatonu ki Sikemi; bea alu ai hono gataaga i he nima toomatau o hoko ki he kakai o Enitabua.

8 Bea nae ma‘u e Manase ae fonua ko Tabua: ka ko Tabua i he vee fonua o Manase oku oe fānau a Ifalemi ia;

9 Bea nae alu hifo hono gataaga o a‘u ki he vaitafe o Kana, koe botu toga i he vaitafe: koe gaahi kolo ni o Ifalemi, oku tuu fakataha moe gaahi kolo o Manase: koe gataaga foki o Manase nae i he botu tokelau oe vaitafe, bea nae a‘u atu hono gataaga ki tahi:

10 Nae o Ifalemi ae botu toga, bea koe botu tokelau nae o Manase ia, bea ko hono gataaga oona koe tahi: bea na fakataha i Aseli i he botu tokelau, bea i Isaka i he botu hahake.

11 Bea nae ma‘u e Manase i Isaka, bea i Aseli a Bete‐seani mo hono gaahi botu kakai, mo Ibiliami mo hono gaahi botu kakai, bea moe kakai o Toa mo hono gaahi botu kakai, moe kakai o Eni‐toa mo hono gaahi botu kakai, moe kakai o Tenaki mo hono gaahi botu kakai, moe kakai o Mekito mo hono gaahi botu kakai, io koe fonua e tolu.

12 Ka nae ikai faa kabuji e he fānau a Manase ae kakai oe gaahi kolo koia; ka nae loto be ae kau Kenani ke nau nonofo i he fonua.

13 Ka nae hoko e behe, i he fakaaau ke malohi ae fānau a Isileli, naa nau fakamoulaloa ae kau Kenani ke nau tukuhau: ka nae ikai te nau kabuji akinautolu kituaa.

14 Bea nae lea ae fānau a Josefa kia Josiua, o behe, Koeha kuo ke foaki ai kiate au ae tofia be taha keu ma‘u, ka koe kakai toko lahi au, he koeuhi kuo tabuaki au mau ai be e Jihova?

15 Bea nae behe e Josiua kiate kinautolu, Kabau koe kakai lahi koe, bea ke fei mo alu hake ki he fonua akauia, bea ke ta hifo i ai maau, i he fonua oe kau Belesi, bea moe kakai lalahi, o kabau oku abiabi ae mouga ko Ifalemi kiate koe.

16 Bea nae behe e he fānau a Josefa, Oku jii ae mouga kiate kimautolu: bea oku i he kau Kenani kotoabe oku nofo i he telea, ae gaahi jaliote aione, akinautolu oku kau mo Bete‐seani mo hono gaahi botu kakai, mo kinautolu oku kau moe telea o Jesilili.

17 Bea nae lea a Josiua ki he fale o Josefa, io kia Ifalemi mo Manase, o behe, Koe kakai lahi koe, bea oku ke malohi lahi: e ikai te ke ma‘u ae tofia be taha:

18 Ka e oou ae mouga; he oku akauia, bea ke ta hifo ia: bea ko hono gaahi aluaga e omoutolu ia: te ke kabuji ae kau Kenani, ne ogo oku nau ma‘u ae jaliote aione, bea oku nau malohi.