¶ 1 BEA koe kakai kotoabe oe fānau a Isileli naa nau fakakatoa akinautolu i Sailo, o nau fokotuu i ai ae fale fehikitaki oe kakai. Bea nae fakavaivai ae fonua i ho nau ao.

2 Bea nae kei toe i he fānau a Isileli ae faahiga e fitu, oku teeki ma‘u ho nau tofia.

3 Bea nae behe e Josiua ki he fānau a Isileli, E tuku afe hoo mou fakatuai o ikai alu ke ma‘u ae fonua, aia kuo foaki kiate kimoutolu e Jihova koe Otua o hoo mou gaahi tamai?

4 Fili meiate kimoutolu ha tagata e toko tolu mei he faahiga kotoabe: bea teu fekau‘i akinautolu, bea ke nau tuu hake o alu o aji i he fonua, ke fakaha ia o fakatatau ki ho nau tofia; bea te nau toe ha‘u kiate au.

5 Bea ke nau vahe ia ki he vahega e fitu: e nofo a Juta i ho nau tofia i he botu toga, bea ke nofo mau ae fale o Josefa i ho nau tofia i he tokelau.

6 Koia ke mou fakaajiaji ae fonua o vahe fitu, bea omi kiate au hono tohi fakailoga ki heni, koeuhi keu fai ae talotalo kiate kimoutolu i heni i he ao o Jihova ko ho mou Otua.

7 Ka koe kau Livai oku ikai ha nau tofia iate kimoutolu; he koe gaue ae taulaeiki o Jihova ko ho nau tofia: bea ko Kata mo Lubeni, mo hono vaeuaaga oe faahiga o Manase, kuo nau ma‘u ho nau tofia i tua Joatani i he botu hahake, aia nae foaki e Mosese koe tamaioeiki a Jihova kiate kinautolu.

¶ 8 Bea nae tuu hake ae kau tagata, o alu atu; bea nae fekau e Josiua kiate kinautolu nae alu ke tohitohi ae fonua, o behe, Alu o ojiki ae fonua, bea tohi ia, bea toe ha‘u kiate au, koeuhi keu fai ae talotalo kiate kimoutolu i he ao o Jihova i Sailo.

9 Bea nae alu ae kau tagata o mole o aji i he fonua, o tohi vahevahe ia i he tohi koe vahe fitu, o  nau toe ha‘u kia Josiua ki he fakataha ki Sailo.

¶ 10 Bea nae fai e Josiua ae talotalo moo nautolu i he ao o Jihova i Sailo: bea nae vahevahe i ai e Josiua ae fonua ki he fānau a Isileli o fakatatau ki ho nau gaahi vahevahe.

¶ 11 Bea koe tofia oe faahiga o Benijimani nae alu hake o fakatatau ki ho nau gaahi faahiga: bea koe gataaga o ho nau tofia nae hoko atu i he vahaa oe fānau a Juta moe fānau a Josefa.

12 Bea ko ho nau gataaga, i he botu tokelau nae fai mei Joatani; bea nae alu hake ae matafonua ki he botu o Jeliko i he botu tokelau, bea alu o mole i he gaahi mouga i he botu luluga: bea ko hono gaahi aluaga kituaa nae i he toafa o Bete‐aveni.

13 Bea mole hono gataaga mei ai o haga ki Lusa, ki he botu o Lusa aia ko Beteli i he botu toga; bea alu hifo ai hono gataaga ki Ataloti‐ata, o ofi ki he mouga oku tuu i he botu toga ki Bete‐holoni i lalo.

14 Bea nae fai atu mei ai ae gataaga, o ne alu fakatakatakamilo ki he botu tahi o haga ki toga, mei he mouga oku tuu i he ao o Bete‐holoni, ki toga; bea nae a‘u atu hono gataaga ki Keja‐beali aia ko Keja‐jialimi, koe kolo ae fānau a Juta: ko hono botu luluga ia.

15 Bea ko hono gataaga ki toga, nae fai mei he botu a Keja‐jialimi, bea alu atu kitua i he botu luluga, o mole atu ki he vai o Nefitoa:

16 Bea nae alu hifo hono gataaga ki he muileleu oe mouga aia oku tuu i he ao oe telea oe foha o Henomi, aia koe telea oe kakai lalahi i he botu tokelau, bea alu hifo ki he telea o Henomi, ki he botu o Jebusi i he botu toga, bea alu hifo ki Eni‐lokeli.

17 Bea nae fai atu mei he tokelau, o alu atu ki Eni‐semesi, bea alu atu o haga ki Kililote, aia oku hagatonu atu ki he hakeaga ki Atumima, bea nae alu hifo ki he maka o Bohani koe foha o Lubeni,

18 Bea alu ai be o haga ki he botu oku hagatonu atu ki Alaba ki tokelau, bea alu hifo ki Alaba:

19 Bea nae alu ai be ae gataaga ki he botu o Bete‐hokila ki tokelau; bea ko hono gataaga oe matafonua, nae i he botu koko fakatokelau oe Tahi Kona i he botu fakatoga o Joatani: ko hono gataaga eni oe botu ki toga.

20 Bea ko hono gataaga o ia i he botu hahake ko Joatani. Ko eni ae tofia oe fānau a Benijimani, i hono gataaga fakatakamilo, o fakatatau ki ho nau gaahi faahiga.

21 Bea koeni, koe gaahi kolo oe faahiga oe fānau a Benijimani o fakatatau ki ho nau gaahi faahiga, ko Jeliko, mo Bete‐hokila, moe telea ko Kesisi,

22 Mo Bete‐alaba, mo Semaleimi, mo Beteli,

23 Mo Avimi, mo Bala, mo Ofili,

24 Mo Kifa‐oe‐fānau‐o‐Amoni, mo Ofini, mo Keba; koe kolo e hogofulu ma ua, mo ho nau gaahi botu kakai:

25 Ko Kibione, mo Lama, mo Biheloti,

26 Mo Misiba, mo Kifila, mo Mosa,

27 Mo Lekimi, mo Ilibeli, mo Talela.

28 Mo Sela, mo Elefi, mo Jebusi, aia ko Jelusalema, mo Kibea, mo Keaja; koe kolo e hogofulu ma fa, mo ho nau gaahi botu kakai. Ko eni ae tofia oe fānau a Benijimani o fakatatau ki ho nau gaahi faahiga.