Koe Tohi a Josiua

¶ 1 BEA hili ae bekia a Mosese koe tamaioeiki a Jihova, nae hoko o behe, nae folofola a Jihova kia Josiua koe foha o Nuni, koe tauhi o Mosese, o behe,

2 Kuo bekia a eku tamaioeiki ko Mosese; bea koeni, ke ke tuu hake, mo alu ki he kauvai e taha o Joatani, akoe, moe kakai ni kotoabe, ki he fonua aia oku ou foaki kiate kinautolu, io ki he fānau a Isileli.

3 Koe botu kotoabe e tuu ki ai ho mou aofiva‘e, koia kuou foaki kiate kimoutolu, o hage ko eku tala kia Mosese.

4 Mei he toafa mo Lebanoni ni, io o a‘u atu ki he vaitafe lahi, koe vaitafe ko Iufaletesi, ae fonua kotoabe oe kakai Heti, o a‘u atu ki he tahi lahi o haga atu ki he toagalaa, ko hoo mou botu ia.

5 E ikai ha tagata te ne faa tuu i ho ao, i he gaahi aho kotoabe o hoo moui: o hage ko eku ia Mosese, e behe be eku iate koe: e ikai teu fakatukutuku‘i koe, be jiaki koe.

6 Ke ke malohi mo ke loto to‘a; koeuhi te ke tufa ki he kakai ni ae fonua, aia naaku fuakava ai ki he e nau gaahi tamai ke foaki kiate kinautolu ko ho nau tofia.

7 Kae kehe ke malohi be akoe mo ke loto to‘a aubito, koeuhi ke ke tokaga o fai o fakatatau ki he fono kotoabe, aia nae fekau kiate koe e he eku tamaioeiki ko Mosese: oua naa ke tafoki mei ai ki he nima toomatau be ki he toohema, koeuhi ke ke monuia koe i he botu kotoabe oku ke alu ki ai.

8 Koe tohi ni oe fono ke oua naa mahui ia mei ho gutu: ka ke fakalaulauloto ki ai i he aho moe bo, koeuhi ke ke tokaga o fai o fakatatau ki he mea kotoabe kuo tohi i ai: he koia te ke gaohi ke monuia ai ho hala, bea ke toki fai fakabotoboto ai.

9 Ikai ko au kuou fekau‘i koe? Ke ke malohi koe bea ke loto to‘a; oua naa ke manavahe, bea oua naa ke bubutuu: he ko Jihova ko ho Otua oku iate koe ia i he botu kotoabe oku ke alu ki ai.

¶ 10 Bea nae fekau ai e Josiua ki he kau matābule oe kakai, o behe,

11 Mou alu i he vahaa oe kau tau, bea fekau ki he kakai, o behe, Teuteu hoo mou mea kai; koeuhi i he teeki gata ae aho e tolu, te mou hoko atu ki he kauvai e taha oe Joatani ni, ke mou hoko ke ma‘u ae fonua, aia oku foaki kiate kimoutolu e Jihova ko ho mou Otua ke mou ma‘u ia.

¶ 12 Bea nae lea a Josiua ki he faahiga o Lubeni, moe faahiga o Kata, mo hono vaeua oe faahiga o Manase, o behe,

13 Mou manatu ki he lea aia nae fekau e Mosese koe tamaioeiki a Jihova kiate kimoutolu, o behe, Kuo foaki e Jihova ko ho mou Otua ae mālōlāga kiate kimoutolu, bea kuo ne foaki kiate kimoutolu ae fonua ni.

14 E nofo ho mou gaahi unoho, mo hoo mou fānau jii, mo hoo mou faga manu, i he fonua aia nae foaki e Mosese kiate kimoutolu i he kauvai ni o Joatani; ka e alu muomua akimoutolu moe mahafu tau i he ao o ho mou gaahi kaiga, ae kau tagata malohi mo to‘a kotoabe, o tokoni akinautolu;

15 Kae oua ke foaki e Jihova ae mālōlōaga ki ho mou gaahi kaiga o hage ko kimoutolu, bea ke ma‘u ekinautolu foki ae fonua aia oku foaki e Jihova ko ho mou Otua kiate kinautolu: bea hili ia te mou toe ha‘u ki he fonua ko ho mou tofia, o ma‘u ia o fiemalie i ai, aia nae foaki kiate kimoutolu e Mosese koe tamaioeiki a Jihova i he kauvai ni o Joatani o haga atu ki he hoboaga laa.

¶ 16 Bea naa nau talaage kia Josiua, o behe, Koia fulibe oku ke fekau kiate kimautolu te mau fai ia, bea koe botu kotoabe oku ke fekau‘i akimautolu ki ai, te mau alu.

17 Hage koe mau tokaga kia Mosese i he gaahi mea kotoabe, e behe be e mau tokaga kiate koe: kae kehe ke iate koe a Jihova ko ho Otua, o hage ko ene ia Mosese.

18 Iloga ha toko taha oku agatuu ki hoo fekau, bea oku ikai tokaga ia ki hoo gaahi lea i he gaahi mea kotoabe oku ke fekau kiate ia, e tamate‘i ia: ka ke malohi koe mo ke loto to‘a.