¶ 1 BEA nae fekau e Josiua ke ha‘u ae faahiga o Lubeni moe faahiga o Kata, mo hono vaeuaaga oe faahiga o Manase,

2 Bea behe eia kiate kinautolu, Kuo mou fai aia kotoabe nae fekau e Mosese koe tamaioeiki a Jihova kiate kimoutolu, bea kuo mou fai talagofua kiate au i he gaahi mea kotoabe naaku fekau kiate kimoutolu:

3 Nae ikai te mou liaki ho mou kaiga i he gaahi aho lahi o a‘u ki he aho ni, ka kuo mou tauhi ae eginaki oe fekau a Jihova ko ho mou Otua.

4 Bea koeni, kuo foaki e Jihova ko ho mou Otua ae mālōlō ki ho mou kaiga o hage ko ene talaofa kiate kinautolu; koia ke mou liu atu ni, o alu ki ho mou gaahi fale fehikitaki, bea ki he fonua o ho mou tofia, aia nae foaki e Mosese koe tamaioeiki a Jihova kiate kimoutolu i he kauvai e taha o Joatani.

5 Ka mou faa vakai o fai ki he fekau moe fono, aia nae fakababau e Mosese koe tamaioeiki a Jihova kiate kimoutolu, ke mou ofa kia Jihova ko ho mou Otua, bea ke aeva i hono gaahi hala, bea ke tauhi ene gaahi fekau, bea ke mou bikitai kiate ia, bea ke mou tauhi ia aki ho mou loto kotoa, bea mo ho mou laumalie kotoa.

6 Nae behe ae tabuaki‘i akinautolu e Josiua, o ne fekau akinautolu ke alu: bea naa nau alu ki ho nau gaahi fale fehikitaki.

¶ 7 Bea nae foaki e Mosese ki hono vaeuaaga e taha oe faahiga o Manase ae tofia i Besani; ka ki hono vaeuaaga e taha nae foaki e Josiua fakataha mo ho nau kaiga i he kauvai ni o Joatani ki he botu luluga. Bea i he fekau akinautolu e Josiua ke alu foki ki ho nau gaahi fale fehikitaki, naa ne toki tabuaki‘i akinautolu,

8 Bea lea eia kiate kinautolu, o behe, Toe alu moe koloa lahi ki ho mou gaahi fale fehikitaki, moe faga manu lahi, moe siliva, moe koula, moe balasa, moe aione, bea moe gaahi kofu lahi: mou vahevahe ae vete o ho mou gaahi fili ki ho mou kaiga.

¶ 9 Bea nae alu ae fānau a Lubeni moe fānau a Kata mo hono vaeuaaga oe faahiga o Manase, o nau alu mei he fānau a Isileli i Sailo, aia oku i he fonua ko Kenani, ke nau alu ki he fonua o Kiliati, ki he fonua o ho nau tofia, aia naa nau ma‘u, o fakatatau ki he folofola a Jihova i he nima o Mosese.

¶ 10 Bea i he e nau hoko ki he vee Joatani, aia oku i he fonua ko Kenani, nae fokotuu i ai e he fānau a Lubeni moe fānau a Kata mo hono vaeuaaga oe faahiga o Manase ae ejifeilaulau ofi ki Joatani, ae ejifeilaulau lahi ke vakai ki ai.

¶ 11 Bea nae fanogo e he fānau a Isileli ki he lau, Vakai, kuo laga ae feilaulauaga e he fānau a Lubeni moe fānau a Kata mo hono vaeuaaga oe faahiga o Manase o haga atu ki he fonua ko Kenani, i he vee Joatani, i he aaaga oe fānau a Isileli.

12 Bea i he fanogo ki ai ae fānau a Isileli, nae fakataha ae fānau kotoabe a Isileli i Sailo, koeuhi ke nau alu o tau‘i akinautolu.

13 Bea nae fekau e he fānau a Isileli ki he fānau a Lubeni, moe fānau a Kata, bea ki he vaeuaaga oe faahiga o Manase, i he fonua ko Kiliati, a Finiasi koe foha o Eliesa koe taulaeiki,

14 Bea nae alu mo ia ae eiki e toko hogofulu, ae eiki e taha i he fale eiki taki taha i he gaahi faahiga o Isileli; bea naa nau taki taha eiki ia i he fale oe nau gaahi tamai i he gaahi toko afe o Isileli.

¶ 15 Bea naa nau ha‘u ki he fānau a Lubeni, bea ki he fānau a Kata, bea ki hono vaeuaaga oe faahiga o Manase, ki he fonua ko Kiliati, bea naa nau lea kiate kinautolu, o behe,

16 Oku behe mai e he fakataha kotoabe a Jihova, Koeha ae mea hala ni kuo mou fai ki he Otua o Isileli, ke tafoki he aho ni mei he muimui ia Jihova, i hoo mou laga kiate kimoutolu ha feilaulauaga, koeuhi ke mou fai agatuu he aho ni kia Jihova?

17 He kuo jii fau kiate kitautolu ae hia a Beoli, (aia oku teeki fakamaa akitautolu mei ai he aho ni, ka koe mooni nae ai ae mahaki lahi i he fakataha a Jihova,)

18 Kuo mou tafoki ai akimoutolu he aho ni mei he muimui ia Jihova? bea e behe, i hoo mou agatuu he aho ni kia Jihova, e houhau ia abogibogi ki he kakai fakataha kotoabe o Isileli.

19 Ka koeuhi, kabau oku tae maa ae fonua o ho mou tofia, bea mou hiki mai ki he fonua ki he tofia o Jihova, aia oku tuu ai ae fale fehikitaki o Jihova, bea ma‘u ae tofia fakataha mo kimautolu: kae oua te mou agatuu kia Jihova, bea agatuu kiate kimautolu, i he fokotuu ae feilaulauaga moo moutolu, kae tuku ae feilaulauaga o Jihova ko ho tau Otua.

20 Ikai nae fai hala e Akani koe foha o Sela i he mea fakamalaia, bea nae to ai ae houhau ki he kakai fakataha kotoabe o Isileli? bea nae ikai malaia toko taha be ae tagata koia i he ene hia.

¶ 21 Bea nae lea ai ae fānau a Lubeni moe fānau a Kata mo hono vaeuaaga oe faahiga o Manase, o tali, o nau behe ki he gaahi eiki oe gaahi toko afe o Isileli,

22 Ko Jihova koe Otua oe gaahi otua, ko Jihova koe Otua oe gaahi otua, oku ne afio‘i, bea e ilo ia mo Isileli foki; kabau kuo fai eni i he agatuu, bea kabau oku fai i he talagataa kia Jihova, (oua naa fakamoui akimautolu he aho ni,)

23 E mau laga ho mau feilaulauaga ke tafoki mei he e mau muimui ia Jihova, bea kabau koe mea ke fai ki ai e mau gaahi feilaulau tutu, be koe feilaulau meakai, bea ke atu i ai ae gaahi feilaulau fakalelei, tuku ke totogi ia e Jihova be;

24 Bea kabau nae ikai te mau fai ia koe manavahe ki he mea ni, o behe, E lea nai e hoo mou fānau amui ki he e mau fānau, o behe, Koeha oku mou kau ai akimoutolu kia Jihova koe Otua o Isileli?

25 He kuo gaohi e Jihova a Joatani koe gataaga vahevahe iate kimautolu mo kimoutolu, akimoutolu ae fānau a Lubeni moe fānau a Kata; oku ikai ha mou tofia ia Jihova; koia e fai e hoo mou fānau ke taofi e mau fānau i he e nau manavahe kia Jihova.

26 Koia naa mau alea ai, o behe, Ke tau tokonaki o laga haa tau feilaulauaga, oku ikai ki he failaulau tutu, be ki he feilaulau:

27 Ka koeuhi ke hoko koe fakamooni ia kiate kimautolu mo kimoutolu, bea ki ho tau gaahi toutagata kimui iate kitautolu, koeuhi ke mau fai ae gaue a Jihova i hono ao aki e mau gaahi feilaulau tutu, moe mau gaahi feilaulau, moe mau gaahi feilaulau fakalelei; ke oua naa lau e hoo mou fānau ki he e mau fānau amui, Oku ikai te mou kau kia Jihova.

28 Koia naa mau behe, e hoko o behe, Kabau te nau lau kiate kimautolu, be ki ho mau toutagata kimui, bea te mau tali, o behe, Vakai ki hono fakatātā oe feilaulauaga o Jihova, aia nae gaohi e he e mau gaahi tamai, nae ikai ki he feilaulau tutu, be ki he gaahi feilaulau: ka koe mea fakamooni kiate kimautolu mo kimoutolu.

29 Ke taofi e he Otua ke oua aubito naa mau agatuu kia Jihova, o tafoki he aho ni mei he muimui ia Jihova, ke laga ae feilaulauaga ki he gaahi feilaulau tutu, be ki he gaahi feilaulau meakai, be ki he gaahi feilaulau, kae tuku ae feilaulauaga o Jihova ko ho tau Otua aia oku i he mata fale fehikitaki oona.

¶ 30 Bea i he fanogo e Finiasi koe taulaeiki, moe gaahi eiki oe kakai fakataha, moe eiki oe gaahi toko afe o Isileli aia nae iate ia, ki he gaahi lea nae lea aki e he fānau a Lubeni moe fānau a Kata, moe fānau a Manase, naa nau fiemalie ai.

31 Bea nae lea a Finiasi koe foha o Eliesa koe taulaeiki ki he fānau a Lubeni, bea ki he fānau a Kata, bea ki he fānau a Manase, Oku mau mamata he aho ni oku iate kitautolu a Jihova, koeuhi oku ikai te mou fai ae mea hala ni kia Jihova; ko eni kuo mou fakamoui ae fānau a Isileli mei he nima o Jihova.

¶ 32 Bea nae liu mai a Finiasi koe foha o Eliesa koe taulaeiki, moe gaahi eiki, mei he fānau a Lubeni, bea mei he fānau a Kata, mei he fonua ko Kiliati, ki he fonua ko Kenani, ki he fānau a Isileli, o nau omi ae ogoogo kiate kinautolu.

33 Bea nae fiemalie ai ae fānau a Isileli; bea nae fakafetai ki he Otua e he fānau a Isileli, bea nae ikai te nau loto ke alu ke tau‘i akinautolu, ke fakaauha ae fonua nae nofo ai ae fānau a Lubeni, mo Kata.

34 Bea nae ui e he fānau a Lubeni moe fānau a Kata ae feilaulauaga, Koe fakamooni eni iate kitaua ko Jihova koe Otua.