¶ 1 BEA kuo fuoloage moe tuku e Jihova ae fiemalie ki Isileli mei ho nau gaahi fili nae tuu takatakai, mo ene fakaaau o motua a Josiua, bea lahi hono ta‘u.

2 Bea nae fekau e Josiua ke ha‘u a Isileli kotoabe, ae nau kau mātua, mo ho nau gaahi eiki, mo ho nau kau fakamāu, bea mo ho nau kau matābule, o ne behe kiate kinautolu, Kuou motua bea lahi hoku ta‘u:

3 Bea kuo mou mamata ki he gaahi mea kotoabe kuo fai e Jihova ko ho mou Otua ki he gaahi buleaga ni koeuhi ko kimoutolu; he ko Jihova ko ho mou Otua, koia ia kuo ne tau koeuhi ko kimoutolu.

4 Vakai, kuou vahevahe kiate kimoutolu i he talotalo ae gaahi buleaga ni oku toe, koe tofia ki ho mou gaahi faahiga, mei Joatani, moe gaahi buleaga kotoabe aia kuou fakaauha, io o a‘u atu ki ke Tahi Lahi i luluga.

5 Bea ko Jihova ko ho mou Otua, e kabuji eia akinautolu mei ho mou ao, o fakahe‘i akinautolu mei ho mou mata; bea te mou ma‘u ho nau fonua, o hage koe talaofa kiate kimoutolu e Jihova ko ho mou Otua.

6 Koia mou loto malohi aubito ke tauhi, bea ke fai aia kotoabe kuo tohi i he tohi oe fono a Mosese, ke oua naa mou tafoki mei ai ki he nima toomatau be ki he toohema;

7 Koeuhi ke oua naa mou kau mea moe gaahi buleaga ni, aia oku toe iate kimoutolu; bea oua naa lea ki he higoa o ho nau gaahi otua, be fekau ke fuakava ki ai, be ke tauhi akinautolu, be bunou hifo akimoutolu kiate kinautolu:

8 Ka mou bikitai kia Jihova ko ho mou Otua, hage koia kuo mou fai o a‘u ki he aho ni.

9 He kuo kabuji atu e Jihova mei ho mou ao ae gaahi buleaga lahi mo malohi: ka ko kimoutolu, nae ikai mafai e ha tagata ke tuu i ho mou ao o a‘u ki he aho ni.

10 E tuli e ho mou toko taha ae toko afe: he ko Jihova ko ho mou Otua, koia ia oku tau maa moutolu o hage ko ene fakaha kiate kimoutolu.

11 Koia mou vakai lahi kiate kimoutolu ke mou ofa kia Jihova ko ho mou Otua.

12 Telia i hoo mou tafoki ki mui i ha mea e taha, o bikitai ki hono toe oe gaahi buleaga ni akinautolu oku toe o nofo kiate kimoutolu, bea mali unoho mo kinautolu, o fealuaki fakafelatani mo kinautolu:

13 Bea ke ilo bau ekimoutolu, e ikai toe kabuji e Jihova ko ho mou Otua ha buleaga e taha mei ho mou ao: ka te nau hoko koe gaahi hele, moe gaahi luo kiate kimoutolu, moe gaahi mea ta ki ho mou vakavaka, moe gaahi tala‘i akau i ho mou mata, ke mou auha ai mei he fonua lelei ni aia kuo foaki e Jihova ko ho mou Otua kiate kimoutolu.

14 Bea vakai, koe aho ni oku ou alu i he hala o mamani kotoabe: bea oku mou ilo i ho mou loto kotoabe, bea i ho mou laumalie kotoabe, i he gaahi mea lelei kotoabe aia nae folofola ai a Jihova ko ho mou Otua kiate kimoutolu oku ikai liaki ha mea e taha; kuo fakahoko kotoabe kiate kimoutolu, bea oku ikai liaki hano mea e taha.

15 Koia e hoko o behe, o hage kuo hoko kiate kimoutolu ae gaahi mea lelei aia nae talaofa e Jihova ko ho mou Otua kiate kimoutolu; e behe ae omi kiate kimoutolu e Jihova ae gaahi mea kovi, kae oua ke oji ene fakaauha akimoutolu mei he fonua lelei ni aia kuo foaki e Jihova ko ho mou Otua kiate kimoutolu.

16 I hoo mou fai talagataa ki he fuakava a Jihova ko ho mou Otua, aia kuo ne fekau kiate kimoutolu, bea kuo mou alu o tauhi ae gaahi otua kehe, o fakabunou hifo akimoutolu ki ai: e tubu ai ae houhau a Jihova kiate kimoutolu, bea te mou auha vave mei he fonua lelei aia kuo ne foaki kiate kimoutolu.