¶ 1 BEA nae tuu hegihegi hake a Josiua i he bogibogi; bea naa nau hiki mei Sitimi, o hoko ki Joatani, aia moe fānau kotoabe a Isileli, o nofo i ai i he teeki ke aa atu.

2 Bea hili ae aho e tolu bea behe, nae alu atu ae kau matābule ki he fakataha oe kau tau:

3 Bea naa nau fekau ki he kakai, o behe, I hoo mou mamata ki he buha oe fuakava a Jihova ko ho mou Otua, moe kau taulaeiki moe kau Livai oku haamo ia, ke mou hiki ai mei ho mou botu, o muimui ki ai.

4 Ka e ai ha vahaa iate kimoutolu mo ia, koe haga e fa afe nai hono fuofua: oua naa mou hoko ke ofi ki ai, koeuhi ke mou ilo ae hala aia oku totonu ke mou alu ai: he oku heeki ai te mou fou i he hala ni.

5 Bea nae behe e Josiua ki he kakai, Fakamaonioni‘i akimoutolu: koeuhi e fai e Jihova abogibogi ae gaahi mana iate kimoutolu.

6 Bea nae lea a Josiua ki he kau taulaeiki, o behe, Too hake ae buha oe fuakava, bea alu muomua i he ao oe kakai. Bea naa nau too hake ae buha oe fuakava, o alu o muomua i he kakai.

¶ 7 Bea nae folofola a Jihova kia Josiua, Koe aho ni teu kamata fakahikihiki koe i he ao o Isileli kotoabe, koeuhi ke nau ilo, o hage ko eku ia Mosese, e behe be eku iate koe.

8 Bea ke fekau ekoe ki he kau taulaeiki oku haamo ae buha oe fuakava, o behe, I hoo mou hoko ki he veevai o Joatani, te mou tuu mau be i Joatani.

¶ 9 Bea nae behe e Josiua ki he fānau a Isileli, Mou ha‘u ki heni, bea fanogo ki he gaahi folofola o Jihova ko ho mou Otua.

10 Bea nae behe e Josiua, Te mou ilo i he mea ni oku iate kimoutolu ae Otua moui, bea koe mooni e kabuji eia mei ho mou ao ae kau Kenani, moe kau Heti, moe kau Hevi, moe kau Belesi, moe kau Keakasa, moe kau Amoli, moe kau Jebusi.

11 Vakai, koe buha oe fuakava a Jihova o mamani kotoabe oku alu muomua i ho mou ao ki loto Joatani.

12 Bea koeni, mou fili ha kau tagata e toko hogofulu ma toko ua mei he gaahi faahiga o Isileli, koe tagata be taha mei he faahiga kotoabe.

13 Bea e hoko o behe, i he hoko ae aofiva‘e oe kau taulaeiki oku haamo ae buha o Jihova, koe Eiki o mamani kotoabe, ke tuu ki he vai o Joatani, e motuhi leva ae vai o Joatani mei he vai oku tafe hifo; bea e tuu fakaeji be ia.

¶ 14 Bea nae behe, i he hiki ae kakai mei ho nau gaahi fale fehikitaki, ke alu ki he kauvai e taha o Joatani, nae alu muomua ae kau taulaeiki i he ao oe kakai, o haamo ae buha oe fuakava;

15 Bea i he hoko ki Joatani akinautolu nae haamo ae buha, bea tuu ki he veevai ae va‘e oe kau taulaeiki nae haamo ae buha, (he nae fonu mahakehake a Joatani, i hono gaahi gutu vai kotoabe i he kuoga kotoabe oe ututa‘u,)

16 Iloage koe gaahi vai nae tafe mai nae tuu, bea tubu hake o fakatafugofuga, o vamamao aubito mei he kolo ko Atama, aia oku i he botu o Salitani: bea koia nae tafe mai ki he tahi oe toafa, aia koe tahi kona, nae mamaha ia, bea motuhi: bea nae aa ai ae kakai o hagatonu ki Jeliko.

17 Bea koe kau taulaeiki aia nae haamo ae buha oe fuakava o Jihova nae tuu mau i he kelekele momoa i loto Joatani, bea nae alu ae kakai Isileli kotoabe i he kelekele momoa, ke oua ke oji ae kakai kotoabe ki he kauvai e taha o Joatani.