¶ 1 BEA nae hoko o behe, i he lava atu ae kakai kotoabe ki he kau vai e taha o Joatani nae folofola a Jihova kia Josiua, o behe,

2 Fili ha kau tagata e toko hogofulu ma toko ua mei he kakai, koe tagata e toko taha mei he faahiga kotoabe,

3 Bea mou fekau kiate kinautolu, o behe, Mou too mai mei loto Joatani, mei he botu nae tuu mau ai ae va‘e oe kau taulaeiki, ae maka e hogofulu ma ua, bea mou fua ia o ave o tuku i ho mou abitaga, aia te mou mohe ai i he bo ni.

4 Bea fekau e Josiua ke ha‘u ae kau tagata e toko hogofulu ma toko ua, akinautolu naa ne fili i he fānau a Isileli, koe tagata be taha mei he faahiga kotoabe:

5 Bea nae behe e Josiua kiate kinautolu, Mou muomua i he buha tabu o Jihova ko ho mou Otua ki loto Joatani, bea mou too hake taki taha ae tagata ene maka ki hono uma, o fakatatau ki hono lau oe faahiga o Isileli.

6 Koeuhi ke hoko ia koe fakailoga, oka fehui e hoo mou fānau ki he e nau mātua amui, o behe, Koeha hono uhiga oe gaahi maka ni?

7 Bea te mou tala kiate kinautolu, Nae motuhi ae vai o Joatani mei he ao oe buha oe fuakava a Jihova; i he ene aa i Joatani, nae motuua ae vai o Joatani: bea koe gaahi maka ni koe mea fakamanatu tuu mau ki he fānau a Isileli o taegata.

8 Bea nae fai e he fānau a Isileli o hage koe fekau a Jihova, o nau too hake ae maka e hogofulu ma ua mei loto Joatani, o hage koe folofola a Jihova kia Josiua, o fakatatau ki hono lau oe gaahi faahiga o Isileli, bea naa nau fua o ave ia ki he botu naa nau mohe ai, o tuku ia i ai.

9 Bea nae fokotuu e Josiua ae maka e hogofulu ma ua i loto Joatani, i he botu nae tuu ai ae va‘e oe kau taulaeiki aia nae haamo ae buha oe fuakava: bea oku i ai ia o a‘u ki he aho ni.

¶ 10 He koe kau taulaeiki nae haamo ae buha nae tuu i loto Joatani, ke oua ke oji hono fai aia kotoabe nae folofola ai a Jihova kia Josiua ke ne fekau ki he kakai, o fakatatau ki he mea kotoabe nae fekau e Mosese kia Josiua: bea nae fai fakatootoo ae kakai o nau aa atu.

11 Bea nae hoko o behe, hili ae aa o lava atu kotoabe ae kakai, nae toki haamo atu e he kau taulaeiki ae buha o Jihova, i he ao oe kakai.

12 Bea koe fānau a Lubeni, moe fānau a Kata, mo hono vaeua oe faahiga o Manase, naa nau alu muomua moe mahafu tau i he ao oe fānau a Isileli, o hage koe fekau a Mosese kiate kinautolu:

13 Koe toko fa mano nai, nae too mahafu tau nae alu muomua i he ao o Jihova ki he tau, i he gaahi tafagafaga o Jeliko.

¶ 14 Nae fakahikihiki e Jihova a Josiua i he aho koia i he ao o Isileli kotoabe: bea naa nau manavahe kiate ia, o hage koe nau manavahe kia Mosese, i he aho kotoabe o ene moui.

15 Bea nae folofola a Jihova kia Josiua, o behe,

16 Fekau ki he kau taulaeiki oku naamo ae buha oe fakamooni, koeuhi ke nau alu hake mei Joatani.

17 Koia nae fekau ai e Josiua ki he kau taulaeiki, o behe, Mou alu hake mei Joatani.

18 Bea nae hoko o behe, i he alu hake ae kau taulaeiki aia nae haamo ae buha oe fuakava a Jihova mei loto Joatani, bea kuo hiki ae aofiva‘e oe kau taulaeiki ki he kelekele momoa, nae toe tafe mai leva ae gaahi vai o Joatani ki ho nau botu, bea toe lofia hono gaahi matavai o hage ko ene aga.

¶ 19 Bea nae alu hake ae kakai mei Joatani i hono hogofulu  oe aho o hono uluaki mahina, bea abitaga i Kilikali, i he feituu hahake o Jeliko.

20 Bea koe maka e hogofulu ma ua aia nae too mei Joatani, nae to ia e Josiua i Kilikali.

21 Bea naa ne lea ki he fānau a Isileli, o behe, Oka fehui e hoo mou fānau ki he e nau gaahi tamai amui, o behe, Koeha hono uhiga oe gaahi maka ni?

22 Te mou fakaha ki hoo mou fānau, o behe, Nae aa a Isileli i he Joatani ni i he kelekele momoa.

23 He ko Jihova ko ho mou Otua nae fakamomoa ae gaahi vai o Joatani mei ho mou ao, ke mou hoko atu ki he kau vai e taha o hage koia nae fai e Jihova ko ho mou Otua ki he Tahi Kulokula, aia naa ne fakamomoa i ho mau ao, ke oua ke mau lava atu ki he kau vai e taha:

24 Koeuhi ke hoko o ilo ae nima o Jihova e he kakai kotoabe o mamani, mo hono mafimafi: bea ke mou manavahe kia Jihova ko ho mou Otua o taegata.