¶ 1 BEA nae hoko o behe, i he fanogo ae gaahi tu‘i oe kau Amoli, aia nae nofo i he botu o Joatani ki luluga, bea moe gaahi tu‘i oe kau Kenani, aia nae ofi ki tahi, kuo fakamamaha e Jihova ae gaahi vai o Joatani mei he ao oe fānau a Isileli, ka nau hoko atu kotoabe, nae vaivai ai ho nau loto, bea nae ikai jii te nau kei fiemalie, koeuhi koe fānau a Isileli.

¶ 2 Bea i he kuoga koia nae folofola a Jihova kia Josiua, Gaohi maau ae gaahi hele majila, bea toe kamu‘i ae fānau a Isileli ko hono liuga ua.

3 Bea nae gaohi e Josiua ae gaahi hele majila, o ne kamu‘i ae fānau a Isileli, i Kibahalaloti.

4 Bea ko hono uhiga eni nae fai ai e Josiua ae kamu: Koe kakai tagata kotoabe nae ha‘u mei Ijibite, io, ae kau tagata tau kotoabe, nae mate i he hala i he toafa, hili e nau ha‘u mei Ijibite.

5 Bea koeni, nae kamu‘i ae kakai kotoabe nae ha‘u mei Ijibite: ka koe fānau kotoabe nae tubu i he hala i he toafa i he e nau ha‘u mei Ijibite, nae ikai kamu‘i akinautolu.

6 He nae fealuaki fano ae fānau a Isileli i he ta‘u e fagofulu i he toafa, ke oua ke ojiojigamalie ae kau tagata tau kotoabe, aia nae ha‘u mei Ijibite, koeuhi nae ikai te nau fai talagofua ki he le‘o o Jihova: akinautolu nae fuakava ai a Jihova, e ikai te ne fakaha ae fonua kiate kinautalu, aia nae fuakava ai a Jihova ki he e nau gaahi tamai ke ne foaki kiate kitautolu, koe fonua oku mahu tafea i he hua huhu moe honi.

7 Bea koe nau fānau, aia kuo ne fokotuu hake ko ho nau fetogi, ko kinautolu nae kamu‘i e Josiua: he nae teeki kamu‘i akinautolu, he nae ikai te nau kamu‘i akinautolu i he hala.

8 Bea nae hoko o behe, hili e nau kamu‘i o oji ae kakai kotoabe, naa nau nofo be i ho nau gaahi botu i he abitaga ke oua ke nau moui.

9 Bea nae folofola a Jihova kia Josiua, Kuou teka‘i iate kimoutolu he aho ni ae manuki o Ijibite. Koia oku ui ai ae botu koia, ko Kilikali o a‘u ki he aho ni.

¶ 10 Bea nae abitaga ae fānau a Isileli i Kilikali, o nau fai ae  katoaga oe laka‐atu i hono hogofulu ma fa oe aho oe mahina i he efiafi i he gaahi tafagafaga o Jeliko.

11 Bea naa nau kai ae uite motua oe fonua i he bogibogi i he hili ae  katoaga oe laka‐atu, koe ma tae fakalevani, moe uite tunu i he aho be koia.

¶ 12 Bea nae tuku leva ae mana i he bogibogi hili e nau kai ae uite motua oe fonua; bea nae ikai toe ma‘u ae mana e he fānau a Isileli; ka naa nau kai ae fua oe fonua ko Kenani i he ta‘u koia.

¶ 13 Bea nae hoko o behe, i he tuu a Josiua o ofi ki Jeliko, bea haga hake eia hono mata o jio atu, bea vakai, nae tuu mai ha tagata o hagatonu mai kiate ia moe heleta kuo unuhi i hono nima: bea nae alu atu a Josiua kiate ia, o ne behe kiate ia, Oku ke kau mo kimautolu, be ki ho mau gaahi fili?

14 Bea behe mai eia, Ikai, ka kuou ha‘u ni au, koe Eiki oe tau a Jihova. Bea nae fakafoohifo e Josiua a hono mata ki he kelekele, o ne hu, bea ne behe kiate ia, Koeha ae folofola a hoku eiki ki he ene tamaioeiki?

15 Bea behe e he Eiki tau oe tau a Jihova kia Josiua, Vete ho tobuva‘e mei ho va‘e; he koe botu oku ke tuu ai, koe botu maonioni. Bea nae fai ia e Josiua.