¶ 1 BEA nae folofola a Jihova kia Josiua, Oua naa ke manavahe, bea oua naa ke ilifia: ave ae kau tau kotoabe, bea tuu hake, o alu hake ki Ai: vakai, kuou tuku ki ho nima ae tu‘i o Ai, mo hono kakai, mo ene kolo, mo hono fonua:

2 Bea ke fai ki Ai mo hono tu‘i o hage koia naa ke fai ki Jeliko mo hono tu‘i; ka koe vete o ia, moe faga manu i ai te mou ma‘u maa moutolu: ke toka ae malumu ki he botu tua oe kolo.

¶ 3 Bea nae tuu ai a Josiua, moe kau tau kotoabe, ke nau alu hake ki Ai: bea nae fili e Josiua ae kau tagata e toko tolu mano, koe kau malohi mo to‘a, o ne fekau ke nau alu i he bouli.

4 Bea naa ne fekau kiate kinautolu, o behe, Vakai, te mou toka malumu o haga ki he kolo, io i he tua kolo ki mui: oua naa mou alu mamao fau mei he kolo, ka mou talitali teu be kotoabe:

5 Bea ko au, moe kakai kotoabe oku iate au, te mau unuunu o ofi ki he kolo: bea e hoko o behe, i he e nau ha‘u kitua kiate kimautolu, o hage koe uluaki fai, te mau hola mei ho nau ao,

6 (He te nau ha‘u ko ho mau tuli,) kae oua ke mau tautoho mai akinautolu mei he kolo: he te nau behe, Oku nau hola i ho tau ao, o hage koe fuofua fai: koia te mau hola ai i ho nau ao.

7 Bea mou toki tuu hake ae malumu, bea ma‘u ae kolo: he ko Jihova ko ho mou Otua te ne tukuage ia ki ho mou nima.

8 Bea e behe, i hoo mou lava‘i ae kolo, te mou tutu leva ae kolo aki ae afi; o hage koe fekau a Jihova e behe hoo mou fai. Vakai, kuou fekau kiate kimoutolu.

¶ 9 Koia nae fekau e Josiua ke nau alu atu: bea naa nau alu ke toka ae malumu, bea naa nau nofo i he vahaa o Beteli mo Ai, i he botu luluga ki Ai: ka nae mohe a Josiua i he bo koia moe kakai.

10 Bea nae tuu hegihegi hake a Josiua i he bogibogi, o ne lau ae kakai, bea ne alu hake, aia moe kau mātua o Isileli, i he ao oe kakai ki Ai.

11 Bea koe kakai kotoabe, ae kau tau nae iate ia, nae alu hake, bea unuunu, o hoko ki he ao oe kolo, o nau nofo i he botu tokelau o Ai: ka nae ai ae fuu luo i ho nau vahaa mo Ai.

12 Bea naa ne fili ae kau tagata e toko nima afe nai, o ne tuku akinautolu ke toka malumu, i he vahaa o Beteli mo Ai, i he botu luluga oe kolo.

13 Bea hili e nau fakanofo ae kakai, io ae tau kotoabe nae i he botu fakatokelau oe kolo, moe malumu oku fakamohe i luluga oe kolo, nae alu a Josiua i he bo koia ki he loto luo.

¶ 14 Bea nae hoko o behe, i he mamata ki ai ae tu‘i o Ai, naa nau fakatootoo bea tuu hegihegi hake, bea koe kau tagata oe kolo ne alu kitua ke tau‘i a Isileli, aia mo hono kakai kotoabe i he feituu nae tuutuuni, i he ao oe toafa; bea nae ikai mahalo eia oku ai ha malumu kuo tokoto i he tua kolo.

15 Bea nae fai e Josiua mo Isileli kotoabe o hage kuo teia akinautolu i ho nau ao, bea naa nau hola i he hala oe toafa.

16 Bea nae ui ke fakataha ae kakai kotoabe nae i Ai ke nau tuli kiate kinautolu: bea naa nau tuli a Josiua, bea kuo tohoaki‘i ai akinautolu mei he kolo.

17 Bea nae ikai toe ha tagata i Ai be i Beteli nae ikai alu kitua ke tuli a Isileli: bea naa nau tuku liaki be ae kolo, o nau tuli ki Isileli.

18 Bea nae folofola a Jihova kia Josiua, Mafao atu ae tao oku i ho nima o haga ki Ai; he teu tuku ia ki ho nima. Bea nae mafao atu e Josiua ae tao nae i hono nima o haga atu ki he kolo.

19 Bea nae tuu hake leva ae malumu mei ho nau botu, bea i he ene mafao atu hono nima, naa nau lele leva: bea naa nau hu ki he kolo, o ma‘u ia, bea nae fakatootoo leva o tutu ae kolo aki ae afi.

20 Bea i he jio kimui ae kau tagata o Ai, bea nau mamata, bea vakai, koe ohuafi oe nau kolo oku alu hake ki lagi, nae ikai ha nau mafai ke hola i he hala ni, be i he hala na: bea koe kakai nae holaage ki he toafa, naa nau tafoki mai ki ho nau kau tuli.

21 Bea i he mamata a Josiua mo Isileli kotoabe kuo ma‘u ae kolo e he malumu, bea kuo alu hake ae ohuafi oe kolo, naa nau tafoki leva, o teia ae kau tagata o Ai.

22 Bea nae oho mai  ae kau tau e taha mei he kolo kiate kinautolu; koia naa nau moua i he vahaa o Isileli mei mui bea i ho nau ao: bea naa nau teia akinautolu, bea nae ikai ha toko taha e hao.

23 Bea naa nau buke moui ae tu‘i o Ai, bea omi ia kia Josiua.

24 Bea nae hoko o behe, i he fakaoji e Isileli hono teia ae kakai kotoabe o Ai i he goue, bea moe toafa aia naa nau tuli akinautolu ki ai, bea i he oji e nau higa ki he mata oe heleta, bea nau auha, nae toki ha‘u ae kakai Isileli kotoabe ki Ai, bea ta aki ia ae mata oe heleta.

25 Bea nae behe, ko kinautolu nae to i he aho koia, ae tagata moe fefine, koe toko taha mano, moe toko ua afe, ae kau tagata kotoabe o Ai.

26 He nae ikai toe too mai e Josiua hono nima, aia naa ne mafao ai ae tao, kae oua ke ojiojigamalie hono fakaauha ae kakai kotoabe o Ai.

27 Ka koe faga manu moe vete oe kolo koia, nae too ia e Isileli koe koloa kiate kinautolu, o hage koe fekau a Jihova aia naa ne fekau kia Josiua.

28 Bea nae tutu e Josiua a Ai, o ne gaohi ia koe eji o taegata, io koe botu liaki o a‘u ki he aho ni.

29 Bea nae tautau eia ae tu‘i o Ai o a‘u ki he efiafi: bea i he alu hifo ae laa, nae fekau e Josiua ke nau tuku hifo hono agaaga mei he akau, o li ia ki he tefito‘i mataba oe kolo, bea nae fokotuu ki ai ae fuu eji maka, aia oku i ai o a‘u ki he aho ni.

¶ 30 Bea nae fokotuu e Josiua ae feilaulauaga kia Jihova koe Otua o Isileli i he mouga ko Ibale,

31 O hage koe fekau a Mosese koe tamaioeiki a Jihova ki he fānau a Isileli, o hage koia kuo tohi i he tohi oe fono a Mosese, koe feilaulauaga oe gaahi maka katoa, aia kuo ikai hiki e ha tagata ha ukamea ki ai: bea naa nau atu i ai ae gaahi feilaulau tutu kia Jihova, moe gaahi feilaulau fakalelei.

¶ 32 Bea nae tohi eia i ai ki he gaahi maka hono hiki oe fono a Mosese, aia naa ne tohi i he ao oe fānau a Isileli.

33 Bea ko Isileli kotoabe, moe nau kau mātua, moe kau matābule, moe kau fakamāu, naa nau tutuu fakataha moe muli, mo ia nae tubu iate kinautolu i he botu toomatau oe buha, moe botu toohema, i he ao oe kau taulaeiki koe kau Livai, aia nae haamo ae buha oe fuakava o Jihova; ko ho nau vaeuaaga e taha nae haga ki he mouga ko Keli-simi, mo ho nau vaeuaaga e taha nae haga ki he mouga ko Ibale; o hage koe tomua fekau a Mosese koe tamaioeiki a Jihova kiate kinautolu, koeuhi ke nau tabuaki‘i ae kakai o Isileli.

34 Bea hili ia naa ne lau ke oji ae gaahi lea kotoabe oe fono, koe gaahi tabuaki, moe gaahi fakamalaia, o fakatatau mo ia kotoabe kuo tohi i he tohi oe fono.

35 Bea nae ikai ha foi lea e liaki i he mea kotoabe nae fekau e Mosese, aia nae ikai lau e Josiua i he ao oe kakai fakataha kotoabe o Isileli, moe kau fefine moe gaahi fānau jii, bea moe kau muli nae nofo fiemalie mo kinautolu.