Ana Boki Aberaam

1 N abaia I-Kareria, n aia maeka au bakatibu, Ngai, Aberaam, I nooria bwa e kainnanoaki irou bwa N na karekea au tabo ni maeka teuana.

2 Ao, ni kunean ae iai te kakukurei ae korakora riki ao te rau ao te motirawa ibukiu, I ukoukori aia kakabwaia bakatibu, ao te kariaia are N na kona iai ni katabuaki bwa N na kamwakuria naba; ibukina bwa ngai I irira ae raoiroi, n tangiria naba bwa N na karekea te atatai ae korakora, ao N na riki bwa te tia irira ae raoiroi ae korakora riki, ao ni karekea te atatai ae korakora riki, ao n riki bwa tamaia bootanaomata aika mwaiti, uean te raoi, ao n tangiria ni karekei kaetieti, ao ni kawakin ana tua nako te Atua, I a riki bwa te tia bwaibwai raoi, te Ibonga ae Rietata, n taua te kariaia are aia bwai bakatibu.

3 E bon katokaaki i aou mai irouia bakatibu; e karuoaki rikaaki mai irouia bakatibu, man moanakin te tai, eng, are man te moan tai, ke i mwaain karikan te aonaba, rikaaki nakon te tai aei, are te kariaia nakon te moan nati, ke te moan aomata, are bon Atam, ke te moan karo, rinanoia bakatibu nakoiu.

4 I ukoukora rineakiu nakon te Nakoanibong ni kaineti ma ana rinerine te Atua nakoia bakatibu ni irekereke ma kanoaia.

5 Au bakatibu, a tia n tannako man raoiroia, ao man tua aika tabu are e tia n angania te Uea ae Atuaia, n taromauria atuaia beekan, n rawa raoi n ongo ni bwanaau.

6 Bwa nanoia a bon kamatoai bwa a na karaoa ae buakaka, ao a bon tannako raoi nakon atuan Erekana, ao atuan Ribena, ao atuan Mamakura, ao atuan Korati, ao atuan Bwarao, uean Aikubita.

7 Ngaia are a katannakoa nanoia nakon aia anga karea beekan ni kareania natiia nakoia atuaia aika aki kona n taetae, ao a aki ongo ni bwanaau, ma a kataia n anaa maiu ni bain ana ibonga Erekana. Ana ibonga Erekana bon ana ibonga naba Bwarao.

8 Ngkai, n te tai aei bon katein ana ibonga Bwarao, uean Aikubita, bwa e na anga i aon te baonikarea are e kateaki n te aba ae Kareria, mwaane, aine, ao ataei, bwa te karea nakoia taian atua aika ianena.

9 Ao e koro bukina bwa te ibonga e anga te karea nakon atuan Bwarao, ao nakon naba atuan Takurira, n aron kateia I-Aikubita. Ao atuan Takurira bon taai.

10 E anga te karea ni karabwarabwa ae te ataei ana ibonga Bwarao i aon te baonikarea are e tei i rarikin te tabuki ae aranaki bwa ana Tabuki Botiba, i moan te tabo ae aoraoi ae Oritem.

11 Ao, te ibonga aei e a tia n anga i aon te baonikarea aei teniman kibono n te tai teuana, ake bon natin Onita aine, temanna ae te kanoa n uea raoi man ana kariki Am. Kibono aikai a bon kareanaki ibukin raoiroia; a rawa ni bobaraki n taromauriia atua aika kaai ke atibu, ngaia are a bon kamateaki i aon te baonikarea aei, ao e karaoaki n aron kateia I-Aikubita.

12 Ao e koro bukina bwa ibonga a tauai ma te iowawa, bwa aonga ni kamateai naba, n aron are a karaoia nakoia kibono akekei i aon te baonikarea aei; ao bwa kam aonga ni karekea ataakin te baonikarea aei, N na kaoti nakoimi tamneia ni moan te rongorongo aei.

13 E karaoaki n aron tein te kainiwene, n aron are iai irouia I-Kareria, ao e tei imataia atuan Erekana, Ribena, Mamakura, Korati, ao te atua naba ae katootongan atuan Bwarao, uean Aikubita.

14 Bwa kam aonga ni karekea te atatai ibukiia atua aikai, I a tia n angani ngkami katootongaia n taian tamnei mai moana, ae aron tamnei ake a aranaki irouia I-Kareria bwa Rarenoti, are kaota kanikina ake a kabonganaaki n te koroboki.

15 Ao ngke a tabeki baia n tauai, bwa aonga ni kareanai ao n anaa maiu, nooria, I tabekarake bwanaau nakon te Uea ae Atuau, ao te Uea e kakauongo ao e ongo, ao e kaonai ma te kaotioti mai iroun are Moan te Mwaaka, ao te anera are imatana e tei irarikiu, ao e waekoa ni kabwarai kabaeau;

16 Ao bwanaana e roko irou: Aberaam, Aberaam, nooria, arau bon Iehova, ao I a tia n ongo bwanaam, ao n tia n ruo bwa N na kamaiuko, ao ni kairiko nako man bataia am bakatibu, ao mai irouia ni kabane am koraki, nakon te aba ae kaokoro are ko aki ataia.

17 Ao aio ibukina bwa a tia ni katannakoi nanoia mai irou, n taromauria atuan Erekana, ao atuan Ribena, ao atuan Mamakura, ao atuan Korati, ao atuan Bwarao, uean Aikubita; ngaia are I a tia n ruo bwa N na kawariia, ao ni kamauna are e tia n tabeka baina ni kaaitarako, Aberaam, ae natiu, bwa a na anaa maium.

18 Nooria, N na kairiko ni baiu, ao N na anaiko, ni katoka arau i aom, are ana Nakoanibonga tamam, ao mwaakau e na mena i aom.

19 N aron are iroun Noa e na ti te arona naba ma ngkoe; ma n rinanon am mwakuri e na ataaki arau i aon te aonaba n aki toki, bwa boni Ngai Atuam.

20 Nooria, ana Tabuki Botiba e mena n te aba ae Ura, i Kareria. Ao te Uea e urua ana baonikarea Erekana, ao atuan te aba, ao e kamaunai raoi, ao e orea te ibonga n te aro are e a mate; ao e bon korakora te tang i Kareria, ao n ana tabo Bwarao; te ara ae Bwarao nanona bon te uea man raraana ni uea.

21 Ngkai uean Aikubita aei bon kanoan ana kariki Ham, ao iai raraana ni I-Kanaan man rikina.

22 Man te kanoa aei a riki iai I-Aikubita ni kabane, ao ngaia are raraaia I-Kanaan e bon kateimatoaki n te aba.

23 Te aba ae Aikubita e moan kuneaki iroun te aine, are bon natin Am, ao natin Aikubitati, are n te taetae n I-Kareria e tei ibukin Aikubita, are tei ibukin are e tabuaki;

24 Ngke e kunea te aba te aine aei e bon mena i aan tari, are i mwina e kamaekaia natina mwaane iai; ao, mai iroun Am, e bwebwerake te reeti are kateimatoa te maraia n te aba.

25 Ngkai ana moan tautaeka Aikubita e kateaki iroun Bwarao, ana moan nati te mwaane Aikubitati, ae natin Am te aine, ao e baireaki n aron ana tautaeka Am, are mai iroun te tama nakon natina te mwaane.

26 Bwarao, ibukina bwa te aomata ae raoiroi, e katea ueana ao e motikitaekaia ana aomata ma te wanawana ao te motiraoi n ana bong ni kabane, n ukeuke ma nanona ni koaua ni katootonga te waaki are e kateaki irouia bakatibu n te moan roro, ni bongin aia moan tautaeka tamanuea, n ana tautaeka Atam naba, ao Noa naba, are tamana, are e kakabwaia ma kakabwaia n te aonaba, ao ma kakabwaia n te wanawana, ma e kamaraia ni kaineti ma te Nakoanibonga.

27 Ngkai, Bwarao ibukina bwa bon kaain te kanoa are e aki kona n reke irouia te kariaia n te Nakoanibonga, e ngae ngke taian Bwarao a rangi n tauraoi n anaia mai iroun Noa, rinanon Am, ngaia are tamau e a kairaki nako n taromaurian bouananti irouia;

28 Ma N na kataia, man te tai aei, n anga rongorongon bwaai aika riki ngkoa mai irou ni karokoa moan karikan bwaai, bwa a tia n reke rongorongo i nanon baiu, ake iai irou ni karokoa te tai aei.

29 Ngkai, i mwin orean ana ibonga Erekana n te aro are e mate, e roko kakoroan nanon bwaai akekei ake a taekinaki nakoiu ni kaineti ma te aba ae Kareria, bwa e na iai te rongo n te aba.

30 Ai ngaia are te rongo e teimatoa ni kabuta aban Kareria ni kabane, ao tamau e rangi ni kammarakaki ibukin te rongo, ao e raira nanona man te buakaka are e tia ni baireia ibukiu, bwa e na anaa maiu.

31 Ma aia rongorongo bakatibu, ake taian tamanuea, ni kaineti ma te inaomata n te Nakoanibonga, te Uea ae Atuau e kawakini n oin baiu, ngaia are te atatai ibukin moan karikan bwaai, ao taian buraneti naba, ao taian itoi, n aron are a kaotaki nakoia bakatibu, I a tia ni kawakini ni karokoa te bong aei, ao N na kataia ni koroi tabeua bwaai aikai n te rongorongo aei, ibukin kabwaiaia kanoau ake a na roko imwiiu.