Bok In Ebream

1 Ilo āneen riKaldia, ilo jikin jokwe eo an ro jema, N̄a, Ebream, iaar lo bwe ekar mennin aikuj bwe in bar bōk juon jikin jokwe;

2 Im, kōnke iaar lo bwe eaar ļapļo̧k m̧ōņōņō im aenōm̧m̧an im kakkije n̄an n̄a, iaar kappukot kōjeraam̧m̧an ko an ro jema, im jim̧we eo n̄an e iaikuj kar ekkapit n̄an jerbale ejja in wōt; kōnke n̄a iaar juon riļoore jim̧we, kōnke iaar kōņaan barāinwōt juon eo ej bōk eļap jeļāļo̧kjeņ, im juon riļoore jim̧we, im n̄an bōk eļapļo̧k jeļāļo̧kjeņ, im n̄an juon jemān elōn̄ laļ ko, juon irooj in aenōm̧m̧an, im kōnke iaar kōņaan bōk naan in tōl ko, im n̄an kōjparok kien ko an Anij, iaar erom juon dien rijolōte, juon Pris Eutiej, kabwijere jim̧we eo n̄an juon an ro jemād.

3 Kar likūti e ioō jān ro jemād; e kar wanlaļtak jān ro jemād, jān jinoin iien, aaet, em̧ool jān jinoin, ak m̧okta jān foundasōn an laļ, laļtak n̄an iien in, em̧ool jim̧we eo an m̧aanje eo, ak armej eo m̧oktata, eo ej Adam, ak jemān eo m̧oktata, deblo̧keļo̧k ro jemād tok n̄an eō.

4 Iaar kappukot ijjitōn̄ eo aō n̄an Priesthood eo ekkar n̄an ijjitōn̄ eo an Anij n̄an ro jemād kōn ine eo.

5 Ro jema, kōnke rekar oktakļo̧k jān wānōk eo aer, im jān kien ko rekwōjarjar me Irooj aer Anij ekar liļo̧k n̄an er, n̄an kabun̄-jar n̄an anij ko an ro ripegan, kanooj m̧akoko in eo̧ron̄ ainikiō;

6 Bwe burueer rekar tōt n̄an kōm̧m̧an nana, im rekar lukkuun oktakļo̧k n̄an anij eo an Elkena, im anij eo an Libna, im anij eo an Mamākra, im anij eo an Koras, im anij eo an Pero, kiin̄ an Ijipt;

7 Kōn rekar ukōtļo̧k burueer n̄an katok eo an ro ripegan ilo ajeļo̧k ro nejier n̄an ekjab ko rejarron̄ron̄, im jar eo̧ron̄ n̄an ainikiō, a rekar kijejeto n̄an bōk mour eo aō jān pein pris eo an Elkena. Pris eo an Elkena eaar barāinwōt eaar barāinwōt pris eo an Pero.

8 Kiiō, ilo iien ekar m̧antin pris eo an Pero, kiin̄ in Ijipt, n̄an ajeļo̧k ioon lokatok eo me kar kalōke ilo āneen Kaldia, n̄an katok eo n̄an anij ruwamāejet kein, em̧m̧aan ro, kōrā ro, im ajri ro.

9 Im ālikin men kein pris eo eaar kōm̧m̧ane juon katok n̄an anij eo an Pero, im barāinwōt n̄an anij eo an Shagreel, em̧ool ilo̧kan jekjek eo an riIjipt ro. Kiiō anij eo an Shagreel ekar al.

10 Em̧ool katok in kam̧m̧oolol in juon ajri pris eo an Pero eaar ajeļo̧k ioon lokatok eo me ekar jutak iturin bat eo kar etan Bat an Potipar, ilo jōbbōran meļaaj in Olishem.

11 Kiiō, pris in ekar ajeļo̧k ioon ļotaktok in jilu virgin ro ilo juon iien, ro rekar kōrā ro nejin Onita, juon iaan ļeātōktōk ro lukkuun bwijjin lo̧jeen Ham. Virgin rein rekar katok kake er kōnke erreo eo aer; reban kar bun̄badik n̄an kabun̄-jar n̄an anij aļaļ ak anij dekā, kōn menin rekar m̧ane er ioon lokatok in, im ekar kōm̧m̧an ilo̧kan jekjek eo an riIjipt.

12 Im ālikin men kein bwe pris ro rekar jibwe ilo aer kōmetak eō, bwe ren maron̄ m̧ane eō barāinwōt, āinwōt aer kar kōm̧m̧an n̄an virgin ro ioon lokatok in; im bwe en wōr ami jeļāļo̧kjeņ kōn lokatok in, inaaj jitōn̄ļo̧k kom̧ n̄an annan̄ eo ilo jinoin ļo̧o̧k in.

13 Ekar kōm̧m̧an ilo̧kan jekjek in juon aowej, āinwōt ko rekar pād ilubwiljin riKaldia ro, im ekar jutak im̧aan anij ko an Elkena, Libna, Mamākra, Koras, im barāinwōt juon anij āinwōt ko an Pero, Kiin̄ in Ijipt.

14 Bwe kom̧in maron̄ wōr ami meļeļe kōn anij kein, iaar lewōj n̄an kom̧ jekjek eo aer ilo annan̄ ko ilo jinoin, jekjek in annan̄ ko me kar etaer jān riKaldia ro Rahleenos, ko rej bōk jikin jeje pija ko.

15 Im ke rekar kotak peier ioō, bwe ren maron̄ katok kake eō im bōk mour eo aō, lo, iaar kotak ainikiō n̄an Irooj aō Anij, im Irooj eaar eo̧ron̄ im ron̄jake, im Eaar kobrak eō kōn visōn in eo Ekajoor Bōtata, im enjeļ eo jān im̧aan mejān eaar jutak iturū, im em̧ōkaj an rōļo̧k korak ko aō;

16 Im Ainikien eaar n̄an eō: Ebream, Ebream, lo, Eta ej Jeova, im Iaar ron̄jake eok, im kar wanlaļtak n̄an kōtļo̧k eok, im n̄an bōkļo̧k eok jān m̧weo im̧ōn jōmam̧, im jān aolep ro nukūm̧, ļo̧k ilo juon laļ eruwamāejet me kwōj jab jeļā kake;

17 Im men in kōnke rekar ukōtļo̧k burueer jān Eō, n̄an kabun̄-jar n̄an anij eo an Elkena, im anij eo an Libna, im anij eo an Mamākra, im anij eo an Koras, im anij eo an Pero, kiin̄ in Ijipt; kōn menin Iaar wanlaļtak n̄an loļo̧k er, im n̄an ko̧kkure e eo ekar kotak pein ņae eok, Ebream, nejū m̧aan, n̄an bōk mour eo am.

18 Lo, I naaj tōl eok kōn Peiū, im I naaj bōk eok, n̄an likūt ioom̧ Eta, em̧ool Priesthood eo an Jōmam̧, im Aō kajoor enaaj pād ioom.

19 Āinwōt ekar ippān Noa āindein enaaj ippam̧; ak kōn jerbal in am Eta naaj jeļā kake ilo laļ indeeo, bwe N̄aij am̧ Anij.

20 Lo, Bat eo an Potipar ekar pād ilo āneen Ōr, in Kaldia. Im Irooj eaar ruprupe laļļo̧k lokatok eo an Elkena, im eo an anij ko an āneo, im kanooj ko̧kkure er, im kar m̧an pris eo bwe e en kar mej; im eaar wōr juon liaajlo̧ļ eļap ilo Kaldia, im barāinwōt ilo wōrwōr ko an Pero; Pero eo ej kakōļļeen kiin̄ jān bōtōktōkin rajimjim.

21 Kiiō kiin̄ in Ijipt in ekar juon bwijjin jān lo̧jeen Ham, im ekar juon ribōk jān bōtōktōkin riKeinan ro jān ļotak.

22 Jān bwij in eaar jebar aolep riIjipt, im āindein bōtōktōkin riKeinan ekar pād wōt ilo āneo.

23 Āneen Ijipt kōnke kar lo m̧oktata jān juon kōrā, eo ekar nejin Ham, im nejin Ijiptōs, eo ilo kajin Kaldia ej bōk jikin Ijipt, eo ej bōk jikin men eo kar kōmo̧iki;

24 Ke kōrā in eaar lo āneo ekar pād ium̧win dān, eo tokālik ekar kōjokwe ļōm̧aro nejin ilo e; im āindein, jān Ham, eaar jebar jowi eo me ekar dāpij lia eo ilo āneo.

25 Kiiō kien eo m̧oktata an Ijipt ekar jutak jān Pero, ļeo erūttotata nejin Ijiptōs, kōrā eo nejin Ham, im ekar ilo̧kan jekjek in kien eo an Ham, eo ekar jān em̧m̧aan.

26 Pero, kōnke ekar juon em̧m̧aan ejim̧we, eaar kajutak aelōn̄ in kiin̄ eo an im eaar ekajet armej ro an ilo mālōtlōt im ilo jejjet aolepān raan ko an, im kanooj kappukot n̄an anōke ekkar eo kajutake jān ro jemād ilo epepen ko im̧aan, ilo iien tōl ko jān lain eo an ro jemād m̧oktata, em̧ool ilo iien tōl eo an Adam, im barāinwōt eo an Noa, jemān, eo ekar kōjeraam̧m̧an e kōn kōjeraam̧m̧an ko an laļ, im kōn kōjeraam̧m̧an ko in mālōtlōt, a kaliaiki e āinwōt n̄e ekkejelļo̧k n̄an priesthood eo.

27 Kiiō, Pero kōnke ekar jān bwij in eo me eban kar wōr an jim̧we n̄an Priesthood eo, jekdo̧o̧n n̄e Pero ro renaaj kar kijejeto abņōņō kōn ijo aer ie jān Noa, kōn Ham, kōn menin jema kar tōlļo̧k jān kabun̄ n̄an ekjab eo aer;

28 A inaaj kate eō, tokālik, n̄an tepiiake iien ko eaar waļo̧k men kein ettōrlikļo̧k jān n̄a make n̄an jinoin kōm̧anm̧an laļ, bwe ļo̧o̧k ko em̧ōj aer kar itok ilo peiū, ko me ij kabwijeri n̄an iien in.

29 Kiiō, ālikin kar den̄ļo̧ke pris eo an Elkena bwe en kar mej, eaar itok juon kūrm̧ool in men ko me kar ba n̄an eō kaki kōn āneen Kaldia, bwe enaaj wōr juon n̄ūta ilo āneo.

30 Ejja āinwōt juon n̄ūta eaar bwiltōn̄tōn̄ iaolepān āneen Kaldia, im jema eaar kanooj en̄taan kōnke n̄ūta eo, im eaar ukeļo̧k jān nana eo me eaar karōke ņae eō, n̄an bōk mour eo aō.

31 A ļo̧o̧k ko an ro jema, em̧ool petriak ro, kake jim̧we eo n̄an Priesthood eo, Irooj aō Anij eaar dāpiji wōt ilo peiū make; kōn menin jeļā eo kōn jinoin kōm̧anm̧an laļ, im barāinwōt kōn planet ko, im kōn iju ko, āinwōt kar kōjjeļāik ro jema kaki, iaar dāpiji em̧ool n̄an rainin, im inaaj kijejeto n̄an jeje jet ian men kein ioon ļo̧o̧k in, n̄an em̧m̧anļo̧k eo an ro bwijjū im renaaj itok ālikū.