1 Tei aku oki tei a Aberahama te Urima e te Tumima, ta te Atu toku Atua i oronga mai iaku i Ura io te Kaledea;

2 E kite iora au i te au etu, e maata tikai, e ko tetai ia ratou kua vaitata rava ki te terono o te Atua; e manganui te au mea mamaata e vaitata mai ki reira;

3 Kua tuatua maira te Atu kiaku: Ko teia na ratou e akaaere ana; e te ingoa o te mea maata ko Koloba ïa, no te mea e vaitata aia kiaku, ko au oki te Atu toou Atua: Kua iki oki au i teia, nana e akaaere ia ratou katoatoa te ka noo kapiti ki taua akanooanga rai mei tera taau ngai e tu na.

4 E kua tuatua maira te Atu kiaku, na roto i te Urima e te Tumima, e kua tau a Koloba ki te ravenga o te Atu, kia tau ki tona tuatau e te atianga o tona takapinianga; ko tai takapinianga, ko tai ïa rā i te Atu, i tana akamanakoanga, ka riro i reira e tai tauatini mataiti, kia tano ki te tuatau i akatakaia ki taau e tu ra. Ko te tatauanga teia i to te Atu tuatau kia tau ki te tatauanga o Koloba.

5 E kua tuatua maira te Atu kiaku: Ko te ao e iti mai tona mārama, e meangiti rai i te mea te ka tutara i te rā, koia te po, e runga atu, me kare e maata atu i taau e tu ra i tona tatauanga, te taka marie ua ra aia; no te mea te tu ra te reira i runga ake i te enua taau e tu ra, no reira te tatauanga i tona tuatau, kare i maata roa, kia tau ki te numero o tona au rā, te au marama, e te au mataiti.

6 E kua tuatua maira te Atu kiaku: E teianei, e Aberahama, te vai nei teia nga tuatua-mou e rua, e akara to mata kia kite koe; kua orongaia teia kia koe kia kite i te tuatau e tatauiaʼi e te taime tikai, ae, te tuatau tikai o te enua taau e tu ra e te taime o te mārama maata tei akatakaia kia tutara i te rā e te tuatau tikai e tutaraʼi te mārama meangiti, tei akatakaia ei tutara i te po.

7 E teianei te akatakaanga o te taime o te mārama iti e tuatau roa tona kia tau ki tona tatauanga, i to te tatauanga o te enua taau e tu nei.

8 E i te ngai i noo ei teia nga tuatua-mou e rua, te vai nei tetai tuatua-mou i rungaʼo ia raua, koia oki, te vai nei tetai ao ko tona tatauanga e roa atu rai;

9 No reira te vai nei rai tetai tatauanga o te taime o tetai ao i runga ake i tetai, e tae uatu ki te araveianga kia Koloba, ko tei tatauia kia tau ki to te Atu tuatau; koia oki a Koloba tei noo vaitata ki te terono o te Atua ei akaaere i teia au ao tei vai ki taua akanooanga rai mei te ngai taau e tu ra.

10 E kua orongaia mai teia kia koe kia kite i te tuatau tei akatakaia no te au etu tei akanooia kia oronga mai i te mārama, e tae uatu ki toou akavaitataanga mai ki te terono o te Atua.

11 No reira oki au, ko Aberahama, i tuatua ai ki te Atu, te mata e te mata, mei ta te tangata e tuatua ki tetai; e kua akakite mai aia kiaku i te angaanga a tona rima i rave;

12 E tuatua mai aia kiaku: E taku tamaiti, e taku tamaiti (kua atoro atu tona rima ki vao), i na e akaari atu au i teianei au apinga kia koe. E tuku mai i tona rima ki runga i toku mata, kite iora au i te au mea ta tona rima i rave, e manganui uatu rai; te uua ra i mua i toku nga mata, kare au i kite i te openga o te reira.

13 E kua tuatua mai aia kiaku: Ko Siania teia koia te rā. E kua na ko mai aia kiaku: Ko Koloba e etu aia. E kua tuatua mai aia kiaku: Ko Olea ko te marama ïa. E kua tuatua mai aia kiaku: Ko Kokaubiami, koia oki te au etu, me kore ra pouroa te au mārama maata, tei akamouia ki te au rangi ra.

14 E po te taime i tuatua mai ei te Atu i teia au mea nei kiaku: Ka akamaata au ia koe e taau uanga a muri ake ia koe, kia aite ki teia; e me rauka ia koe i te tatau i te au one, mei te reira katoa te maata o taau uanga.

15 E kua tuatua maira te Atu kiaku: Aberahama, ka akaari atu au i teia apinga kia koe i mua ake ka aere ei koe ki Aiphiti, kia akakite koe i teia au tuatua katoa.

16 Me vai nga mea e rua, ka riro tetai na runga ake i tetai, ka vai rai tetai au mea mamaata na runga ia raua; no reira ko Koloba tei maata atu i te au Kokaubiami taau e kite nei, no te mea e vaitata rava mai aia kiaku.

17 I teia nei, mei te mea e e rua apinga, tei runga ake tetai i tetai, e ko te marama tei runga ake aia i te enua, ka rauka i reira e e ao, me kore ra e etu kia na runga akera; e kare takiri a te Atu to Atua ka apai ki roto i tona ngakau, mari ra ko tana ka rave.

18 Kua anga aia i te etu maata; e mei te mea ra oki e e rua vaerua, e tetai ra e maata atu tona mārama i to tetai, i na ko teia nga vaerua, noatu e e maata atu to tetai mārama i to tetai kare o raua akamataanga; i vai ana raua i muatangana na, kare o raua openga, ka vai rai raua, no te mea e nolaumu raua, me kore ra e mutukore.

19 E kua tuatua maira te Atu kiaku: I vai ana teia nga tuatuamou e rua, e rua oki vaerua, ko tai mea mārama ake i tetai; te vai katoa ra tetai mea mārama atu ia raua; ko au te Atu ra toou Atua, e maata atu toku mārama ia ratou pouroa.

20 Kua tono mai te Atu ra toou Atua i tana angela ei akaora ia koe mei te rima o te taunga o Elekena.

21 Te noo nei au i rotopu ia ratou pouroa; e kua aere mai au i teianei ki raro nei ia koe, kia akakite kia koe i te au angaanga a toku nga rima i rave, i na oki kua maata atu toku pakari ia ratou pouroa, te tutara nei au i te rangi i runga ra, e i te enua i raro nei, i te pakari e te tuatuatika i rungaʼo i te au kite ravarai, ta to mata i akara mei te akamataanga mai; kua eke mai au ki raro i muatangana i rotopu i te au mea kite taau i kite.

22 E teianei kua akaari mai te Atu kiaku, ko Aberahama, i te au kite tei akapapaia i mua ake i te ao nei; e i rotopu i teia e manganui te au tangata ngateitei e te tangata maata;

23 E kite akera te Atua i teia au vaerua te meitaki ra, e kua tu iora aia i rotopu ia ratou, na ko atura: Ko teia taku ka akariro ei au tutara; i tu oki aia i rotopu ia ratou i te vaerua, e kite akera te meitaki ra; e kua tuatua maira aia kiaku: e Aberahama, ko koe tetai ia ratou nei; kua ikiia koe i mua ake ka anau mai ei koe.

24 Te tu ra tetai i roto ia ratou mei te Atua rai, e kua tuatua atura kia ratou e piri kiaia: Ka aere tatou ki raro, e ngai oki to reira, e ka apai atu tatou i teia au apinga, e ka anga tatou i tetai ao ei ngai nooanga no ratou;

25 Ei reira tatou ka timataʼi ia ratou, kia kite ei me ka rave ratou i te au mea ravarai ta te Atu to ratou Atua ka akaue ia ratou;

26 E ko ratou tei akono i to ratou turanga mua, ka akamaataia atu ki rungaʼo, e ko ratou tei kore i akono i to ratou turanga mua, kare o ratou kakā i taua basileia rai ta te aronga i akono i to ratou turanga mua; e ko ratou tei akono i to ratou turanga rua, ka rauka to ratou kakā kapitiia ki rungaʼo i to ratou upoko e tuatau e tuatau uatu.

27 E kua tuatua maira te Atu: Koai taku e tono? Kua pau atu tetai mei te tu rai o te Tamaiti a te Tangata: Teia au, e tono koe iaku. E kua pau maira tetai na ko maira: Teia au, e tono koe iaku. E kua tuatua maira te Atu: Ka tono au i to mua.

28 Riri akera te rua, e kare atura i akono i tona turanga mua e i taua rā ra, e manganui tei aru iaia.