E Tataanga Tika Tikai Teia Mei Roto Mai I Te Puka A Aberahama
Numero 2
Akamaramaanga
Nu. 1. Koloba, tona aiteanga te kapuaanga, vaitata atu ki te basileia tiretiera, koia te nooanga o te Atua. Ko te kavamani mua teia, e te openga ra ko te vaito tuatau ïa. Ko te vaitoanga kia tau ki te taime tiretiera, ko taua taime tiretiera e tai ïa rā i te kupiti. E ko tai rā ia Koloba e tau ïa ki te tauatini mataiti, kia tau ki te vaito o te ao nei, ta te Aiphiti e tuatua ana e, Ia-o-e.
Nu. 2. Te tu ra ïa i te pae ia Koloba, ta te Aiphiti ingoa ko Olipiliti, ko tetai teia o te tumu akaaereanga o te kapuaanga vaitata atu ki te basileia tiretiera me kare ra ki te ngai e noo ra te Atua; te mou katoa ra i te mana, no runga i tetai atu au ao; tei eeuia mai e te Atua kia Aberahama, i tona orongaanga atinga i runga i te atarau, tei patuia e ïa na te Atu.
Nu. 3. Kua angaia ei mata no te Atua i te nooanga i runga i tona terono, kakauia ki te mana e te kakā; ma te korona o te mārama mutukore ki rungaʼo i tona upoko; ei mata katoa no te Taviri o te Kautaunga Tapu, mei tei eeuia kia Adamu i roto i te Kainga i Edene, e kia Seta katoa, Noa, Melekizedeka, Aberahama e te aronga katoa i orongaia te Kautaunga mei tei eeuia.
Nu. 4. Ei pau atu ki te reo Ebera Raukiangi, te aiteanga akamaata, e kare ra te mareva o te au rangi; e reta numero katoa tetai, i te reo Aiphiti e tai tauatini; ei pau atu i te vaitoanga tuatau o Opiliti, kua aiteite aia kia Koloba i ta raua takapinianga e ta raua vaitoanga tuatau.
Nu. 5. Ta te Aiphiti Eniteko-one-dota; ko tetai ao akaaere rai teia, e tuatua ana te Aiphiti e e Rā, e karanga ana te Aiphiti e, e rave mai ana aia i te mārama mei ia Koloba na roto ia Kae-e-vanarati, koia oki te Taviri maata, me kare ra i tetai reo te mana akaaere, tei akaaere e tai ngauru ma rima ao, me kare, etu mamaata, Peroeete koia te Marama, te Enua e te Rā i to ratou takaanga mataiti. Kua rauka mai te mana o teia ao nei no roto ia Kiliporotite e me kore ra ko A-ko-kau-bema, koia te au etu akaaere numero 22 e 23, kua rauka mai tona kakā no ko mai i te takaanga o Koloba.
Nu. 6. E mata teia no nga akoko e ā o te enua nei.
Nu. 7. E mata teia no te Atua e noo ra i runga i tona terono, i te eeuanga mai na roto i te au rangi i te Taviri maata o te Kautaunga; pera katoa te akairo o te Vaerua Tapu kia Aberahama, na roto i te tutu o te kukupa.
Nu. 8. Tetai au tataanga te kare e rauka kia eeuia mai ki to te ao nei; mari ua ra, ki roto i te Iero Tapu o te Atua.
Nu. 9. Kare e tika kia eeuia mai i teia tuatau nei.
Nu. 10. Pera katoa teia.
Nu. 11. Pera katoa teia. Me ka rauka i to te ao nei kia marama teia numero, kia pera rai. Amene.
Nu. 12, 13, 14, 15, 16, 17, 18, 19, 20, e te 21, ka orongaia mai teia me kua tau i te Atu.
Kua orongaia mai te akaurianga i runga nei, mei te mea ra e, e tikaanga to tatou kia rave i teia tuatau i teianei.