’Ua aro vau nō te upo’oti’a i ni’a i te hōho’a faufau. Nō te aha ïa ’aita ’ōna ?

’Ua tāpe’ahia te i’oa

I tō’u ’itera’a ē e fifi tō tō’u hoa arapae nō te hōho’a faufau, ’ua rave au mai tā’u e nehenehe nō te tauturu iāna ’ia ani i te tauturu i te Fa’aora.

Fa’ata’ara’a a te ta’ata nene’i : E fa’a’ino te hōho’a faufau i te aura’a o te here i ni’a e rave rahi feiā ’āpī pa’ari ’ōtahi nā roto e rave rau rāve’a. Te mau ’ohipa tā mātou e fa’a’ite atu i roto i te tuha’a feiā ’āpī paʼari nō teie ’āva’e, e fa’a’itera’a ïa nō te huru ’e te mau fa’aotira’a iho a te ta’ata pāpa’i tāta’itahi. ’Ua pūpūhia mai te reira ’ei hi’ora’a ’a ’imi ai ’outou i tā ’outou iho heheura’a nō tō ’outou orara’a.

Tē ora nei te ta’ata pāpa’i i Tuatemara.

’Ua arapae au i te hō’ē taure’are’a tamāroa ’o tā’u i here roa fātata e hō’ē matahiti. ’Ua mana’o roa vau ē, e fa’aipoipo vau iāna ! ’Aita roa vau i mana’o a’e ē nā roto i te arapaera’a iāna ē, e fa’aruru atu vau i te hō’ē fifi tā’u i tāfifi nā mua atu ’e tā’u i upo’oti’a ma tō’u pūai ato’a.

I tō’u fa’aineinera’a nō te haere i te misiōni, ’ua haere atu vau e fārerei i tō’u ’episekopo nō te fā’i atu ē, ’ua tāfifi na vau i te hōho’a faufau. I muri iho i tō’u tātarahapara’a ’e te ’īritira’a i teie teimaha mai ni’a i tō’u vārua, ’aita roa vau i mana’o ē e ha’afifi fa’ahou mai te hōho’a faufau i tō’u orara’a. ʼUa hape rā vau.

I tō’u ’itera’a ē, te ta’ata tā’u i mana’o e fa’aipoipo tē fa’a’ohipa ra ’oia i te hōho’a faufau, ’ua hina’aro rahi roa vau i te tauturu iāna ’e i te pa’epa’e iāna nō te upo’oti’a i ni’a i te reira. ’Ua nā roto a’ena vau i te ’ohipa tātarahapara’a ’e te tauto’ora’a e upo’oti’a i ni’a i te hōho’a faufau, ’e ’ua ’ite ho’i au i te mea tā te Fa’aora e nehenehe e rave nōna. E au ra ē, i te mau taime ato’a e tāmata vau i te arata’i iāna i te tauturu tītauhia nō te upo’oti’a i ni’a i tōna fifi, ’aita roa atu te mau mea i tupu maita’i. E au ra ē, ʼaita ʼoia i hina’aro i te tauturu. I te hō’ē taime i muri a’e, ’ua tae mai te mana’o ē e ’ere hō’ē ā mana’o tō māua nō ni’a i te hōho’a faufau. ’Oia, e melo māua to’opiti nō te ’Ēkālesia, e au ra ē, e ’ere hō’ē ā aura’a te mau ha’api’ira’a o te ’evanelia nō māua.

’Ua ’ino’ino vau. ’Ua here au iāna ’e ’ua mana’o vau ē nā roto i te tauturu, e ti’a iāna ’ia fa’atītī’aifaro i teie fifi. ’Ua noa’a ato’a tō’u pāruru ’ore inaha e fa’aruru atu vau i te hō’ē fifi tā’u i tauto’o rahi na nō te upo’oti’a mai. I te hō’ē pō, ’ua fa’aoti au e pure nō te tītau i te pa’ari o tō’u Metua i te Ao ra, e aha tē rave nō te haere i mua, inaha ho’i tītauhia te mana nō te pāto’i i te ’umera’a ’ia hara, ’e ’ua hina’aro ato’a vau ’ia ’ite nāhea i te pāturu i te ta’ata ’o tā’u i mana’o e ora i piha’i iho.

I te taera’a mai te pāhonora’a, ’ua tae mai te mana’o hau ’e ’ua ’ite au ē, tītauhia iā’u ’ia paraparau i te ta’ata tā’u e arapae ra ma te ’ōpuara’a i tō’u ferurira’a. ’Ua hina’aro vau ’ia ’ite ’ōna i te mea tā’u e tīa’i ra i te ta’ata tā’u e arapae, ’oia ho’i te fa’aipoipora’a i roto i te hiero ’e te fānaura’a i te mau tamari’i. ’Ua hina’aro vau ’ia ’ite tei ni’a ānei tō māua ananahi i te hō’ē ā rēni ’e tē nu’u ra ānei ’oia i te Fa’aora ra. ’Ua hina’aro vau ’ia ’ite ē e tāmau ānei i teie tā’amura’a tō māua. ’Ua vai noa tō’u mau tīa’ira’a rahi ’e ’ua ti’aturi au ē, ’ia paraparau māua, e ’āfaro mai te mau mea ato’a.

E avatea maita’i te reira taime tō’u fa’a’itera’a iāna i tō’u mau moemoeā ’e tā’u mau ’ōpuara’a nō ni’a i tō’u ’utuāfare nō ananahi ’e te ’atu’atura’a i tā’u mau tamari’i i roto i te ’evanelia. ’Ua hitimahuta vau, i muri a’e i tōna fa’aro’ora’a iā’u, ’ua riri roa ’oia iā’u. ’Ua noa’a mai tō’u ’ite ē e mea ta’a ’ē roa tō māua mana’o nō te ananahi. ’Ua oti roa vau, e mea maere rā, ’ua tae mai te mana’o hau ’e ’ua noa’a tā’u pāhonora’a e fa’aea i teie tā’amura’a tō māua. ’Aita roa atu ’oia i te vāhi ’ua ineine ’oia i te tāmata i te upo’oti’a i ni’a i tōna mau fifi ’e te hōho’a faufau, ’aore rā e fāriu i ni’a i te Fa’aora nō te tauturu, ’e ’aita tā’u e nehenehe mai te mea ’aita ’oia i hina’aro i te tauturu.

Nō te hō’ē maorora’a, ’ua uiui noa tō’u mana’o ē, ’ua rave au i te mea tano ’e ’ua ’imi au i te mau rāve’a ato’a nō te tauturu iāna, nō te aha pa’i ïa teie mamae i tō’u mafatu ’e ’ua hu’ahu’a roa. Ē tahe a’era tō’u roimata hope’a nōna ’e ’ua tūtonu ihora vau i ni’a i terā mana’o hau tā’u i fāri’i i te taime ’a fa’a’ore ai au i tō māua tā’amura’a. ’Ua pāpū iā’u nō te ra’i mai terā pāhonora’a.

E tau matahiti i teienei te hopera’a tō’u aura’a ’e teie ta’ata. Tē ’ite noa nei au iāna mai te ta’ata maita’i ’o tāna i riro noa na. ’Ua ’ite rā vau ē tei iāna ra te rirora’a i te ta’ata ’o tē ’imi i te tauturu i pīha’i iho i te Fa’aora—’Aita e ti’a iā’u ’ia fa’ahepo iāna ’ia nā reira. Tē vai ra tōna ti’amāra’a ’ia mā’iti ’e tē vai ra tō’u. Mai te reira ’ohipa tei tupu, ’ua tāmata noa vau i te pe’e i te reo o te Vārua ma te taiā ’ore. ’Ua ’ite au e fa’anahora’a tā te Metua i te Ao ra nō tātou pā’āto’a, e nehenehe tātou e ti’aturi ē, ’ia rave tātou i te mau fa’aotira’a mai te au i te mau muhumuhu a te Vārua, e’ita roa atu ’oia e vaiiho ia tātou ’ia hahi ’ē. E fa’aineine noa ’oia ia tātou nō te mau ’ohipa maita’i e haere mai.

’Ite hau atu ā

Mai te mea ’ua ha’afifihia tō tātou aura’a e te hōho’a faufau, ’a hi’o atu i te toe’a o te mau parau pāpa’i i te tuha’a Arapaera’a ’e Hōho’a faufau te vāhi nā te Feia ʼāpī paʼari ’ōtahi nō ’Ātopa 2019 Ensign ’e Liahona. E hōro’a te mau parau pāpa’i tāta’itahi i te hō’ē hi’ora’a ta’a ’ē ’e te hō’ē ’itera’a fa’aro’o nō ni’a i te arapaera’a ’e te hōho’a faufau.

’A hi’o ato’a i te ve’a tāhepetoma nā te FAP, i roto i te tuha’a Feiā ’Āpī Pa’ari o te Vaira’a buka ’evanelia, nō te mau mea fa’auru-’āpī-hia nā te feiā ’āpī pā’ari i te hepetoma ato’a.

E nehenehe ’outou e hāpono mai i tā ’outou iho mau ’ā’amu, mau mana’o ’e mau parau i ni’a ia liahona.ChurchofJesusChrist.org. Maoro noa mātou i te fa’aro’o ia ’outou !