2019
Haere i mua i muri iho i te ’itera’a tē fa’a’ohipa nei tā’u tāne momo’a i te hōho’a faufau
’Ātopa 2019

Haere i mua i muri iho i te ’itera’a tē fa’a’ohipa nei tā’u tāne momo’a i te hōho’a faufau

’Ua tāpe’ahia te i’oa

’Ua fā’i maira tā’u tāne momo’a e fifi tōna ’e te hōho’a faufau. E nehenehe noa ānei iā’u e fa’aipoipo iāna ?

Tē ora nei te ta’ata pāpa’i Pōrīnetia Farani.

’Ua fārerei au i tō’u hoa fa’aipoipo ’a riro ai māua ’ei tauturu nō te JSF. ’Ua fa’ahiahiahia vau i tōna ’itera’a pāpū pūai ’e te huru ’a ha’api’i ai ’oia ’e ’a tāu’aparau ai ’e te feiā ’āpī.

I tō māua ha’amatara’a e arapae, ’ua tae mai tō māua mana’o ē, tē tīa’i ra te Fatu i te hō’ē mea i teie tā’amura’a tō māua. ’A nu’u noa ai tō māua tā’amura’a, ’ua ’ite au i te onoono i roto i te huru ’oia ’ia fa’a’ite mai i tōna here. ’Ua ha’amata vau i te feruri ē tē vai ra paha tōna fifi ’e te hōho’a faufau, ’āre’a rā, ’ia paraparau māua nō te reira, e māro ’oia ’aita roa.

’Ua ha’amata māua i te ha’amau i te tahi mau ture huru ’eta’eta nō te pāruru ia māua. I tōna anira’a mai e fa’aipoipo, ’ua fāri’i au ’e ’ua ha’amata te mau mea i te maita’i mai—ē tae roa i te hō’ē mahana, ’ua ha’amata fa’ahou ā ’oia i te onoono e fa’a’ite iā’u i tōna here i te hō’ē peu ’aita vau i au roa.

Tē vai noa ra tō’u māna’ona’o nō ni’a i tōna fa’a’ohipara’a i te hōho’a faufau, nō reira, i te hō’ē mahana, ’ua fa’ati’a atu vau iāna nō ni’a i te hō’ē o tō’u mau hoa misiōnare tei tāfifi i te hōho’a faufau nā mua a’e tāna misiōni. ’Ua ’imi au i te rāve’a nō te fa’a’ite i tō’u mana’o māramarama, tō’u here ’e te mana’o fa’ahapa ’ore, nō te mea e tamāhine maita’i ’oia. ’Ua ui fa’ahou atura vau iāna tē vai rā ānei tōna fa’atītīra’a i te hōho’a faufau, ’ei reira tōna fa’a’itera’a mai iā’u.

Te pēpē ’e te fa’aorara’a

I te ha’amatara’a, e mea fifi roa nō’u ’ia paraparau iāna ’e ’ia hi’o iāna i roto i te mata. Fātata roa e’ita e nehenehe fa’ahou inaha ’ua tae mai tō’u mana’o ē ’ua parau mai te Fatu ē, e nehenehe teie ta’ata e riro ’ei hoa mure ’ore nō’u. ’E noa atu ā ’ua pēpē au, ’ua ’ite au ē tītauhia iā’u ’ia ’ohipa nō te fa’a’ore i tāna hapa, ’e ’ua tae mai te fa’aurura’a ’eiaha e fa’aea i tō māua tā’amura’a.

’Ua pure rahi au ’e ’ua tuatāpapa i te mau a’ora’a nō ni’a i te fa’a’orera’a hara ’e te fa’a’ohipara’a i te hōho’a faufau. ’Ua tai’o vau e rave rahi mau parau pāpa’i ’e mau ’itera’a pāpū nō te mau ta’ata fa’aipoipo tei tāfifi na te hoa fa’aipoipo i teie rā’au tāero. ’A tai’o noa ai au, ’ua tae mai te mana’o here o te Fa’aora nō’u ’e nō tā’u tāne momo’a ’e ’ua fāri’i au i te tahi atu ha’apāpūra’a ē ’o teie iho ā ta’ata tō’u hoa mure ’ore. ’Ua ha’api’i ato’a mai au i te tahi atu huru nō te tāra’ehara a te Fa’aora—nāhea ’oia e nehenehe e fa’aora i te hō’ē vārua tātarahapa (tā’u tāne momo’a) ’e te hō’ē māfatu pēpē (tō’u).

Hō’ē o te mau ’ohipa faufa’a roa i ni’a i tō māua ’ē’a, ’o te paraparaura’a ïa i te ’episekōpo o tā’u tāne momo’a. ’Ua tauturu tāna mau arata’ira’a ia māua ’ia fa’aora ’e ’ia ha’afātata ia māua ’ei hō’ē. ’Ua fa’aoroma’i rahi ’oia i tō tā’u tāne fa’aipoipo topa-fa’ahou-ra’a ’e tōna hi’ora’a nō te here, fa’auruhia e te Mesia, ’ua fa’auru iā’u ’e ’ua tauturu iā’u ’ia fa’a’ore i te hapa ’e ’ia fa’atītī’aifaro i teie fifi ’e tā’u tāne momo’a.

I te hō’ē tau taime, e mea fifi roa nā tā’u tāne fa’aipoipo ’ia hi’o iā’u e māuiui ra nō tāna mau mā’itira’a ē fātata roa ’aita ’oia e hina’aro fa’ahou e fa’aipoipo iā’u ! ! I muri iho rā i te ’ohipa-’āmui-ra’a e rave rahi ’āva’e ’ia mā ’oia, i te hope’a, ē, ’ua fa’a’ore mau te Fatu i tāna hapa.

Ē ’ua fa’aipoipo atura māua ’e ’ua pūai hau atu tō māua tā’amura’a. Maoti teie ’ohipa i tupu ’ua ti’a ia māua ’eiaha e ha’amā i te ’āparau te tahi ’e te tahi nō ni’a i tō māua fifi. Noa atu ē ’aita ’oia i roto fa’ahou ā i te hōho’a faufau, tē vai ara maita’i noa nei māua ’e te ti’a’au nei māua te tahi i te tahi.

E nehenehe tō ’outou tā’amura’a e tupu maita’i

Mai te mea ’ua ha’afifihia tō ’outou tā’amura’a e te mau hope’a o te hōho’a faufau, ’ia ’ite mai ’outou ē e nehenehe e fa’a’ore i te hapa. E nehenehe e tāmau noa i te here te tahi ’e te tahi ’e ’ia ’ohipa ’āmui nō te ’ite mai i te mau rāve’a ’e nō te upo’oti’a i ni’a i te reira. E ti’ara’a tō tātou ’ia fa’aorahia i te tāra’ehara a te Fa’aora. E mea tītau ia tātou ’ia fā’i ē ’ua pēpē tātou ’e nā roto ana’e i te tauturu a te Fa’aora e ti’a ai ia tātou ’ia fa’aora-roa-hia.

E mea ta’a ’ē tō te tahi ’e tō te tahi ’ā’amu, ’e e mea ta’a ’ē tō te tahi ’e tō te tahi tā’amura’a. Nō te tahi mau ta’ata, e ’ohipa maita’i a’e te fa’aeara’a i te hō’ē tā’amura’a. Maita’i rā e tauturu tō māua nei ’ā’amu i te tahi mau ta’ata i roto i te hō’ē ā vaira’a. Nō te mea ’ua fāri’i au i teie ha’apāpura’a a te Vārua Maita’i, ’e nā roto i te tauturu a te Fa’aora ’e tāna tāra’ehara, ’ua nehenehe iā’u e fa’a’ore i te hapa a tā’u tāne momo’a ’e ’ia tāmau noa tō māua aura’a. ’Ua ’ite au ē e mā’itira’a maita’i te reira nō’u.

Mai te mea tē fa’aruru nei ’outou i teie huru ’ohipa, ’a feruri nā roto i te pure i tō ’outou vaira’a i teienei nā reira ato’a te mea e nehenehe e tupu ananahi. Mai te mea e fāri’i ’outou i te ha’apāpūra’a a te Vārua ē ’o tē tāpe’a-noa-ra’a i tō ’outou tā’amura’a te ’ohipa maita’i e rave, ’e tē vai ra te mana’o ti’aturi, ’ia ’ite outou ē, nā roto i tā ’ōrua tauto’ora’a to’opiti ’e tō ’ōrua ti’aturi i tō tātou Metua i te Ao ra, e nehenehe tō ’ōrua tā’amura’a e tupu maita’i.

E ta’ata fa’ahiahia mau tā’u tāne fa’aipoipo, ’e ’ua here rahi roa vau iāna ! E māuruuru rahi tō’u i te Fatu i te tauturura’a ia māua ’ia ora ’e ’ia fa’ati’a ia māua ’ia fa’aipoipohia. ’Ua tauturu te Fatu ’ia pa’ari ’āmui māua ’ei ta’ata fa’aipoipo tei ineine nō te fa’aruru i te mau mea ato’a tāna i fa’anaho nō tō māua orara’a ’āmui.