Te ’imira’a i te Mesia nā ni’a atu i te pōiri o te hōho’a faufau

I roto i tā mātou ferurira’a i te mau parau ve’a nō te feiā ’āpī pa’ari, ’ua ha’a rahi mātou nō te ferurira’a i te mau fifi tā rātou e fa’aruru nei. E mea rave rahi roa te reira. Teie rā, ’a matutu noa ai mātou nō teie ’āva’e, ’ua arata’ihia mātou i te hō’ē tumu parau tei ha’apēpē ia mātou nei, tō mātou mau hoa ’e tē vai atu ra e’ita e nehenehe e tai’o : te arapaera’a ’e te hōho’a faufau. ’Ua ta’a ia mātou ē, e fifi mātou nō te fa’anaho i teie tuha’a. Inaha ho’i, tē ha’apēpē nei te hōho’a faufau i te mau ta’ata e rave rahi, e pēpē te ’ā’au ’e i te tahi taime e hu’ahu’a roa te orara’a. ’E nō te feiā ’āpī pa’ari ’ōtahi, e nehenehe te reira e fa’arahi atu ā i te pāpū ’ore o tō rātou ananahi i tei pāpū ’ore a’ena, nō te fa’aineine iho ā rā nō te fa’aipoipora’a.

’Ua ’ite mau mātou i te rima o te Metua i te Ao ra i te arata’ira’a i tā mātou ’ohipa ’a ha’amata ai mātou i te fāri’i i te mau ’ā’amu nō te feiā ’āpī pa’ari tei māuiui te orara’a i te hōho’a faufau. ’E tē ’ite nei mātou ē, ’ua hau atu i te hō’ē noa tīa’ira’a iti nō te mau fa’aipoipora’a mure ’ore pōpou ’e te fa’atītīra’a ’ore. Nō te aha ? Nō te mea tē fa’a’ite pāpū nei te mau ’ā’amu ato’a i te mana fa’ataui orara’a, te mana hōro’a tīa’i, te mana fa’aora pēpē nō Iesu Mesia ’e tāna tāra’ehara.

Nō reira mai te mea tē ’ite rā ’outou ē, tei roto ’outou i te hō’ē aura’a ’ua ō mai te hōho’a faufau, tē ani nei mātou ia ’outou ’ia tai’o i teie tuha’a nō teie ’āva’e, ’e tae noa atu i te mau parau ve’a tei hōro’a-hua-hia mai e te ta’ata tei ’ite pāpū mau ē te ’arora’a i te hōho’a faufau e ’arora’a pāpū roa. Tē vauvau nei teie mau parau ve’a i te mau tumu parau mai teie : nāhea i te fa’ahiti i te parau nō te hōho’a faufau i roto i te arapaera’a ’e e aha tē rave nō te reira (’api 44), e aha tē rave ’ia fa’a’ite mai te hō’ē ta’ata ē, tē tāfifi ra ’oia i te hōho’a faufau (parau rorouira noa), nāhea te fa’a’orera’a hapa ’e te fa’aorara’a pēpē e nehenehe ai e tupu nō nā ta’ata e piti (parau rorouira’a noa), ’e nāhea te Vārua e nehenehe ai e arata’i ia ’outou ’ia ’ite mai ’outou e aha tē rave i roto i tō ’ōrua aura’a (parau rorouira’a noa).

’Ua ’ite mātou ē, mai te mea e tūru’i ’outou i ni’a i te Fa’aora ma te tītau i te Vārua i roto i tō ’outou orara’a ’a ’imi ai ’outou i te mau pāhonora’a, e arata’i te Metua i te Ao ra ia ’outou i ni’a i te ’avei’a ti’a iho nō ’outou. Penei a’e ’ua rahi roa te pōiri nō te hōho’a faufau i roto i teie nei ao, terā rā e ’ana’ana te māramarama fa’aora o te Fa’aora nā ni’a atu i te tahi noa atu pōiri. Te mea tei tītauhia, ’ia ’imi tātou iāna.

Ma te aroha mau,

Chakell Wardleigh ’e Mindy Selu

Pāpa’i ve’a fa’atere nō te tuha’a feiā ʼāpī paʼari nō te mau ve’a a te ’Ēkālesia

I roto i teie tuha’a
- Te arapaera’a ’e te hōho’a faufau
  
  Nā Liahona ’e te mau rave ’ohipa nō te pū nō te ’utuāfare
Rorouira noa
- Nāhea vau i te ha’api’ira’a e aha tē rave ’ia fa’a’ite mai te tahi ē tē tāfifi ra ’oia i te hōho’a faufau
  
  ’Aita te i’oa i hōro’ahia mai, Utah, Marite
- Haere i mua i muri iho i te ’itera’a tē fa’a’ohipa nei tā’u tāne mōmo’a i te hōho’a faufau
  
  ’Aita te i’oa i hōro’ahia mai, Pōrīnetia farāni
- ’Ua aro vau nō te upo’oti’a i ni’a i te hōho’a faufau. Nō te aha ïa ’aita ōna ?
  
  ’Aita te i’oa i hōro’ahia mai, Guatemala

Parau a’o maita’i roa a’e…

’Aita mātou i tītau i te feiā ’āpī pa’ari i tā rātou parau a’o maita’i roa a’e nō te hō’ē ta’ata tē tāfifi ra tōna hoa arapae i te hōho’a faufau, i teie ’āva’e ’ua tītau mātou i te parau a’o a te peresideni M. Russell Ballard, peresideni mono o te pupu nō te Tino ’Ahuru Ma Piti ’āpōsetolo. ’Ua nā ’ō ’oia :

« Te mau ta’ata ato’a tā ’outou e fārerei, ’ua nā roto rātou i te mau tāmatara’a i roto i te orara’a. ’O te hōho’a faufau te hō’ē o te mau tāmatara’a rahi tā tātou e fa’aruru nei i teie mahana. Terā rā, e au ē, tē manuia ra te hōho’a faufau i te fa’a’ino i te orara’a, te mau aura’a ’e te mau ’utuāfare.

« Te ta’ata ato’a e ’ōpua ra i te fa’aipoipo, e mea ti’a nōna te ateatera’a ’e te ha’avare-’ore-ra’a roa i roto iāna ’e te mōmo’a. ’A paraparau te tahi i te tahi ’e ’a hi’o ē, tei hea tōna ’ā’au ’e e aha tāna e rave ra nō te riro mai ’ei ta’ata mo’a nā roto i te tāra’ehara a te Mesia ra te Fatu’ » (Mosia 3:19)…

« Mai te mea e aura’a tō ’ōrua tē tāmata mau nei tō hoa iti i te ’imi ’ia vai ti’amā i te mau peu ’aore rā te mau fa’atītīra’a a teie ‘rā’au ta’ero ’āpī’, e nehenehe tā ’oe e tauturu iāna. E rave rahi roa tāne ’e vahine e māuiui mū nei nō te mea ’ua hape noa atu tātou i te fa’adiabolora’a i te feiā tei fa’atītīhia e te hōho’a faufau. E nehenehe te mau metua, te mau melo nō te ’utuāfare ’e te mau hoa e rave rahi atu ā nō te tauturu i te feiā i roto i te fifi nā roto i te vai-ineine-ra’a ’ia fa’aro’o ’e ’ia hōro’a i te pāturura’a ’e te fa’aitoitora’a.

« ’Āre’a rā, e ’ere nā te mau hoa iti te hōpoi’a e ‘fa’aora’ i tō rātou hoa i te hara ; tei te ta’ata tāta’itahi te reira hōpoi’a nō rātou iho.

« ’O ’outou ana’e tē nehenehe e fa’aoti, ma te tauturu a te Fatu, e aha tē rave nō te hō’ē aura’a ’e te tahi ta’ata tē vai ra te hōho’a faufau i roto i tōna orara’a. Mai te mea e mā’iti ’outou ’ia tāpe’a i te aura’a ’e te hō’ē ta’ata e tāfifi ra i teie ’umera’a ’ia hara, ’a tauturu iāna ’ia fāriu i ni’a i te Atua nā roto i te pure, te ha’apaera’a mā’a ’e te tuatapapa-pinepine-ra’a i te mau pāpa’ira’a mo’a. Hau atu, ’a fa’aitoito atu ’ia fārerei ’oia i nā metua, te mau melo nō te ’utuāfare, te feiā fa’atere autahu’ara’a, ’e te feiā tōro’a fa’aa’o ’ia noa’a mai te tahi atu ā tauturura’a ’e te pāturura’a.

« Tē vai noa nei te tīa’ira’a mai te ea e mā’iti rātou i te ’aro i teie ’arora’a ma te ’ā’au ateate. E ’ere paha i te mea ’ōhie, e mea ho’ona rā ! »

Nō roto mai i te hō’ē paraparaura’a uira’a pāhonora’a i Brigham Young University i te 14 nō Novema 2017.

E aha te parau a’o maita’i roa a’e tā ’outou i fāri’i nō ni’a i te ’ōpuara’a i te ananahi ? E hāpono mai i tā ’outou pāhonora’a i te liahona.lds.org nā mua a’e i te 31 nō ’Ātopa 2019.