O Auala e 14 e Toe Faaleleia Ai Lou Soifua Maloloina Faalelagona

Saunia e Heather J. Johnson

E alala le tusitala i Idaho, ISA.

Pe a e lagona le vaivai faalelagona, o loo i ai ni auala manuia e toe lagona ai le 100 pasene.

E mafai moni ona faavaivai faalelagona le olaga i nisi taimi, ae a tatou ola tutoatasi faalelagona, e mafai ona tatou ausia a tatou manaoga faalelagona ma taulimaina taimi lelei ma taimi leaga i aso uma. E le faapea ai la tatou te le manaomia lava le fesoasoani. Ae, o le ola tutoatasi faalelagona o le iloaina lea pe mafai ona tatou taulimaina mamafatu faalelagona e i tatou lava ma le iloaina pe a tatou manaomia ona aapa atu mo se fesoasoani ma le lagolago mai i isi tagata.

Ao tatou aoao pe faapefea ona lagona ma tali atu i lagona i se ala maloloina, e mafai ona tatou lava tapena ma avanoa atili e auauna atu i le malo o le Atua. O nisi nei o manatu e mafai ona fesoasoani ao e saili ia ola tutoatasi faalelagona.*

1. Fai mea autu: tatalo, suesue i tusitusiga paia, auai i le lotu, ma auauna atu. Taulai atu i le loto faafetai.

2. Ia tausia lelei oe lava ia faaletino. Ia mautinoa o loo e taumafa lelei, lava le malolo, ma faamalositino. O la tatou soifua maloloina e aafia ai la tatou soifua maloloina faalelagona.

3. Tusi se api o talaaga. O le vaega o le ola tutoatasi faalelagona o le nofouta lea i ou lagona. O le tausia o se api o talaaga o se auala lelei e faagasolo ai lagona.

4. Talanoa ma le faamaoni e uiga i ou lagona i uo po o aiga. O le talanoaina o ou lagona ma se isi tagata o se auala manuia lea e mafai ona fesoasoani e faatumauina ai le paleni o lou soifua maloloina faalelagona.

5. Tatalo mo le fesoasoani nai lo vaifofo. Mafaufau e sui ia fuaitau e pei o le “Faamolemole, Tama Faalelagi, faapaleni mai ou lagona” i isi e pei o le “Faamolemole, Tama Faalelagi, faaali mai ia te au le mea ou te manaomia ona aoao ma faia e au lava ia e faapaleni ai ou lagona.”

6. Iloilo lou paleni i le olaga. Siaki le taimi ma le malosi e tuuina atu i aiga, oe lava, auaunaga, galuega, ma tulaga faafiafia. A tele le taimi ma le malosi e alu i se vaega e tasi mai i isi, e amata ona le lava lau moe, malosi, ma le taulaiga. O le uiga o lenei mea ua oo i le taimi e toe iloilo ai mea e faamuamua ma toe maua mai le faapaleniina.

7. Aua nei faatuai. O le tolopoina o mea e mafai ona oo atu ai i le faanoanoa. Vaevae ni galuega tetele i ni nai galuega laiti. Ia amataina, i le faamanatu ia te oe lava ia, “E na o le pau le mea e ao ona ou faia i le taimi nei o le ______” po o le “O le a tau na ona ou faia le mea lenei mo ni nai minute ona malolo ai lea pe a ou manao i ai.”

8. Vaai mamao i le manuia. O le popole e mafai ona avea ma se auala faalemafaufau e faatino ai le toilalo. Nai lo le faataitaia o mea e mafai ona sese pe popole soo i le “ae a pe afai,” ia faataitai i le mafaufau i ni taunuuga lelei ma faia ni fuafuaga e ausia ai na mea. Ma afai e le sologa lelei ni mea e pei ona e faamoemoe i ai, mafaufau i le aoaoina o oe lava ia mai se faafitauli ma agai i luma.

9. Taulai atu i mea sa’o e te faia, ma aloese mai le faatusatusa o oe lava ia i isi. O tagata e i ai ni faamoemoega maualuluga tele e foliga mai e soona taulai atu i o latou vaivaiga ma toilalo. Nai lo le faaleleia la, latou te ono lagonaina le leai o se faamoemoe. Fai se lisi o ou tulaga faatauaina, taleni, aafiaga, ma meaalofa. Fuafua pe mafai faapefea ona e faaaogaina lelei na malosiaga i lenei vaiaso.

10. Ia lafoai mea e le mafai ona e puleaina. O mea ua tuanai, o le faitalia o isi, o le tau, o ou tapulaa, po o uiga faaletagata a isi tagata e le mafai ona e puleaina. Taulai atu i mea e mafai ona e faia i ai se mea, e pei o lau amio, o lau vaega i se mafutaga, o au filifiliga o loo i ai i le taimi nei, ma ou uiga.

11. Talia le moni o nisi o faiga masani e ‘iva pe le faafiafiaina. E le o mea uma o le olaga e matua anoa ma faafiafiaina. Aloese mai le faia o se mea e tosina atu i ai tagata, faalialiavale, po o se feteenaiga e taulima ai le le fiafia. Ae, ia talisapaia ma olioli i le lelei o siomia ai oe, ma tagai mo ni auala e faaleleia ai ma auauna atu ai.

12. Aua nei fafagaina lou ita. O tagata e foliga mai e lagonaina le ita pe a latou filifili e vaai atu i isi o ni tagata (1) taufaamatau, (2) le faamaoni, po o le (3) le faaaloalo. Ae, vaai pe mafai ona e mafaufau i se faamalamalamaga sili atu ona agalelei mo a latou amioga. Mo se faataitaiga, masalo ua latou lelavava, lei faailoaina atu [se mea] ia i latou, le mautonu, po o le mafaufau o loo latou fesoasoani mai. Fai le filifiliga e aua nei faatupuina le ita.

13. Tetee atu i le uiga o le tuuaia po o le faamaasiasi o isi po o oe lava ia. Ae, fuafua po o le a le faafitauli ma fesili atu i le isi tagata mo se fesoasoani i le foiaina, e tusa lava po o ai e sese.

14. Faalogo atu i le Agaga, ae le o mea le lelei. Afai e te maua i mafaufauga faatauemu, faifai, ita, faalumaluma, muimui, faitio, po o le valaau i ni igoa le lelei, e le mai le Alii na mafaufauga. Ia taofi. Usu se pese, tauloto se mau, pe fai se tatalo e toe valaaulia ai le Agaga.

• Mai le “Resources for Managing Emotional Demands,” Adjusting to Missionary Life (2013), 29–34; “Becoming Emotionally Self-Reliant,” Self-Reliance Blog, Feb. 21, 2017, srs.lds.org.

O Mea e Mafai Ona E Faia

Taumafai e faaaoga se tasi pe lua o manatu nei i isi vaiaso e sosoo ai. Mafaufau i nisi manatu e mafai ona e taumafai e fesoasoani ai ia te oe lava ia ola tutoatasi faalelagona.

Suesue Atili

Suesue isi tusiga e uiga i le taulimaina o manaoga faalelagona o le olaga i le vaega o talavou matutua o le Liahona o Ianuari 2019.

LDS.org e ofo mai isi malamalamaaga ma punoa i le ola tutoatasi faalelagona.

O Heather J. Johnson o se tusitala ma le faatonu. E fiafia o ia e faasee i luga o le vai ma alu i sailiiliga i le taumalulu i luga o mauga. E fiafia lava o ia i tusitusiga a Peretania ma fautuaina le faaaoga o le “outou ia” i talanoaga i aso uma.