Filifiliina o le Faavavau
Sa ou iloa o le taimi lenei mo a’u e filifili ai pe ou te tumau ai pe leai i ou tulaga faatauaina.
Ina ua ou faalogo ua ou manumalo i se sikolasipi e fai le fesuiaiga faaleaganuu i Atenitina lea sa ou moemiti i ai i taimi uma, sa ou le’i mafaufauina o le amataga lea o se suiga tele i lou olaga.
Sa ou taunuu i Rosario, Atenitina, lea sa ou nofo ai i se aiga o ni tagata O Le Ekalesia a Iesu Keriso o le Au Paia o Aso e Gata Ai. Ma sa faapea ona amata o se tausaga o mea fou e fai faaleagaga, talanoa ma faifeautalai ma auai i le seminare ma le inisitituti. Sa ou manao e fia iloa mea uma, ma sa mafai ona ou lagonaina o mea sa ou aoaoina e uiga i le talalelei na faamanuiaina ai a’u i le tele o auala.
I se taimi puupuu sa mafai ona ou maua se molimau malosi i le moni aiai o aoaoga faavae lea sa aoaoina ai au: o le faatuatua, alofa, onosai, alofa mama, faalagolago, ma le usiusitai i poloaiga a le Alii, lea ua Ia tuuina mai ia i tatou e puipuia ai i tatou mai tiga.
E le finagalo o Ia ia tatou feagai ma tiga e aunoa ma se faamoemoe. E tele naua lona alofa ia i tatou, ma e na te manao e faamaonia le tele o mea. Ae o nisi taimi, e ala i a tatou lava filifiliga, tatou te tapunia ai lena faitotoa, tatou te vavaeese ai i tatou lava mai ia te Ia, ma ona i ai lea i o tatou lava lima. Ona tatau lea ona tatou faia lena laasaga muamua e agai i le toe faaleleia o le filemu i o tatou loto. O se mea lenei o le a ou oo i ai mo au lava.
I le mavae ai o masina o aoaoga, lesona a faifeautalai, ma vasega, sa ou oo ai i ni mafatiaga i se tasi o ona ituaiga tulaga sili ona tiga — o faigata e te fetaiai ai ma lagona o le taimi ua tuanai, e faaosooso ai oe e fai ni faaiuga sese i le taimi nei, ma taumafai e faaleagaina ai le lumanai o loo e miti pea lava i ai. Sa ou iloa ai o puapuaga i nisi taimi (ma le tele o taimi) e sau mai se vaega e te lei mafaufauina.
O le agavaa ma le mama i mafaufauga ma faatinoga sa avea lava ma se vaega o lou tagata, ae na oo mai lava i le taimi lena. Sa ou iloa o mea o le a ou faia e le sao, o tagata sa ou faatuatuaina i le taimi lava lena ua amata ona agai ese ma le auala, ma ua amata ona ou fatuina se mea mamao i le va o au ma lou Tama Faalelagi. Sa ou iloa o le taimi lenei ua manaomia ai ona ou filifili pe o le a ou faaauau pe afai o le a ou faia pea lenei mea pe tumau i tulaga faatauaina sa ou faamamaluina i taimi uma. O lea na ou saili ai ia maua lena malosiaga i totonu o au lea na tau mai ai ia te au e le faigofie ona ou faaleagaina nei miti. E le mafai ona faaleagaina lou faamoemoe mo se aiga e faavavau ma se tane e alofa. Sa i ai se mea i lou olaga na sese, ma na ou iloaina e tatau ona suia.
O lena lagona, faatasi ai ma le molimau talavou lea na amata ona olaola i lou loto, ma o agelu moni i lou olaga o e sa i ai pea lava iina e fesoasoani ia te au, na faasaoina au mai le leiloa ma ou toe atili malosi ai lea na mafai ai ona ou filifili e toe foi atu i le Alii a o i ai le taimi. Ma ou te iloa sa i ai pea lava o ia iina, faamanuiaina au i au taumafaiga e faalogo i Lona siufofoga ma ia tumau le agavaa mo faamanuiaga e faavavau.
Pe a ou mafaufau i lena taimi sa ou oo i ai i le taimi nei, ou te manatu o le lototele mo le le toilalo, lototele mo le faaalia i taimi uma o ou tulaga faatauaina, ma le faatuatua sa ia te au ma i ai pea.
E ui lava o le taimi o le salamo na mulimuli mai o se taimi o le tiga, e iloa ai lagona ma taimi sese, ma o le lotomaualalo, ou te matua faafetai ai lava mo lena taimi — ma o le a faapena lava ona i ai ia te a’u. O le agaga faafetai mo le mea moni e faapea, i le taimi sao, sa mafai ona ou lagonaina ua faamagaloina au e lou Tama Faalelagi, o loo faaauau pea ona alofa mai ia te au, ma o le a ia faia lava faapea.
O le vaega na sili ona ou afaina ai, o le aoaoina lea ia ou faamagaloina au lava. Ou te manatua lagona na ou maua, o le le agavaa ma aunoa ma se lalelei, pe o fafo po o totonu. Ae sa i ai lava iina lou Faaola, ma aumaia ia te au le malosi ma musumusuga. Sa ia tuuina tagata sao i luga o lou ala o e na fesoasoani ia te au e aoao atili ai e uiga i le Ekalesia, talu ona ou toe foi atu i Peleseuma. Sa la alolofa ia te au mo le tagata ua ou i ai ma fesoasoani ia ou toe alofa ia te au ma iloa ai o lenei aafiaga sa le manaomia ona avea ma se tiga lea e tauaveina i lau ato faafafa e faavavau o le ola. Sa ou iloa ai sa ou maua le avanoa e filifili ai, ia iloa pe faapefea le malosi o lau molimau ua i ai e ala i le puipuia o ou tulaga faatauaina. O lea la ua ou iloa ona sa ou galue i le faamalosia o lau molimau e ala i lenei aafiaga, e mafai ona avea au ma se faamanuiaga i olaga o le toatele o tagata, o e o lata mai ma e o mamao.
Aua le fefe. Aua le fiu, ma ia puipui pea lava ou tulaga faatauaina. Ia manatua i taimi uma, e maeu le matagofie ma le faamanuiaina o le faasoa atu o lena alofa mo le Faaola ma maua Lona alofa mama o se faavae e fausia ai se sootaga ma se aiga i le lumanai. Afai e te filifili e usiusitai ma filifili le Tama Faalelagi i mea uma, i se taimi vave pe mulimuli ane, o le a oo mai faamanuiaga e faavavau. Aua e te popole pe afai e le mafai ona e vaai i ai i le taimi nei, ae ia faalagolago i aso uma, e sili teisi atu, o le a e vaaia ai le aao o le Alii i outou olaga. O le a amata le tautotogo i o tatou loto ma o le a amata ona fuga mai fugalaau e faavavau.
Sa papatisoina au i le aso 16 o Mati, 2019, i lau uarota i Peleseuma, ma ua ou matua fiafia lava i le laasia o lenei laasaga muamua i le ala ou te oo atu ai i le faavavau. Ioe, o le a ou feagai ma nisi luitau i le ala — o i tatou uma lava — ae faatasi ai ma lau molimau i lou loto, ua ou saunia e fetaiai ma i latou, ona ua ou iloa Le ou te filifilia.