Taialaina e le Agaga, ae Ou Te Lei Iloaina
Sa taitaiina au e le Agaga i le tele o taimi ae ou te lei iloa le uiga moni o le faaaliga.
Ina ua 17 ou tausaga, sa ou auai atu i le Ekalesia Porotesano lea na ou maua i le lua tausaga atoatoa talu ai. O le nofoaga muamua lea sa ou aoao aloaia ai e uiga i le Atua ma Iesu Keriso. I le taimi lena, sa ou malaga ai i luga o se pasi i se tasi aso ae nofo ifo i lalo se Alii i ou tafatafa. Na ia tau mai ia te au ua faatoa tatala mai i le falepuipui ma talanoa e uiga i lagona e pei e le mafai ona toe ulu atu i se lotu. I lena taimi, sa ou iloaina ai na auina mai au e le Atua iina ina ia feiloai ma lena tagata, ma sa ou faamalosiau atu ia te ia, ma tau atu ia te ia e tatau ona ia saili i se Ekalesia.
A o ma talanoa, sa ou fai atu ia te ia o loo ou suesue ou te alu i le aoga mo mataupu faale mafaufau. Ae sa ou masua atu e faapea atonu o le a ou suesue i le faatusitala. Sa ia fai mai, “Ua e foliga moni mai lava ua pei se tusitala — e tatau ona e faia lena mea!” Sa ou iloaina e ese lava ona ou te lei mafaufau muamua e uiga i le avea ai ma se tusitala. Na foliga mai o lea manatu na o’o mai mai se nofoaga e le o mailoa.
E lua masina mulimuli ane, o le suega lea e faatagaina ai au ou te alu i le Iunivesite e suesue ai mataupu faale mafaufau o le a oo mai lava. I se tasi po na ou iloaina ai ou te lei mautinoa e uiga i lau filifiliga. Sa matua faateia lava a’u ona sa ou le fia tulimataia se isi lava mea. Ona ou manatuaina lea o le talanoaga ma lena Alii i luga o le pasi. Ou te lei iloa se mea e uiga i aoga faatusitala, ae sa ou mauaina le uepisaite mo se tasi i le matou setete. E foliga sa fuafuaina, o le aso lena o le aso mulimuli lea e lesitala ai. E aunoa ma se toe manatu faalua, sa ou alu i le avanoa. Ma le faapuupuuina o le tala umi: faatoa uma lava lau aoga faatusitala.
Iloaina o le Upumoni
Ou te lei iloaina i lena taimi, ae ua ou iloa nei sa taitaiina au e le Atua e ala i faaaliga patino i le filifili ai po o le a le mea e aoao. Ou te lagona e pei sa faamanuiaina lava a’u i taimi uma i le iloa o le finagalo o le Atua mo au — o a ituaiga o avanoa ma ni tulaga e faia e Ia i lou olaga e faasino mai ai ia te au le ala ua Ia finagalo ou te mulimuli ai.
O le fa o tausaga mulimuli ane, na ou maua ai le Ekalesia ma ua papatisoina, na ala foi i le taitaiga a le Agaga Paia. Ma na iu ina ou iloa le uiga o faaaliga faaletagata lava ia e mai le faitauina o le Mataupu Faavae ma Feagaiga. I se tasi aso a o lei oo i lou papatisoga, sa ou faitauina le Tusi a Mamona ona sa talosaga a’u e faifeautalai ia ou faia. Na faafuasei lava ona ou filifili e faitau i luma atu mo se mafuaaga, i le 2 Nifae 31, lea na faamatala ai e Nifae le papatisoga o Iesu Keriso. E ui lava ou te lei tatalo e uiga i le Tusi a Mamona ae na ou lagonaina na pei na taumafai le Tama Faalelagi e tau mai ia te au e uiga i le papatisoga. O le mataupu na sosoo ai na mau i lo’u mafaufau, lea na ou faitau ai e mafai e le Agaga Paia ona faaali mai ia i tatou mea uma e tatau ona tatou faia (tagai i le 2 Nfae 32). O na upu na tele lona faatatauga i lou olaga.
O le mea moni, o se tasi o mea ou te iloa soo lava e faapea afai ou te mauaina au lava i le pogisa, e faamoemoe mai le Atua ia ou aumaia se ituaiga o malamalama i fafo mai lena mea. Ina ua ou aoao e uiga ia Iosefa Samita, sa ou vaaia mea e talitutusa ai i maua. Sa ou aoao e saili atu mo le Atua mo tali. I le taimi o lou tamaitiiti, e tusa lava pe ou te le’o auai i le lotu, ae sa ou tatalo lava, lea na musuia ai au ia ou salamo, ia onosai, ma taumafai e agalelei ma agaalofa atu i tagata uma.
I se isi itu sa ou iloaina lava sa faafofoga mai le Atua ia te au. Ina ua ou alu i se lotu i le 15 o ou tausaga ma aoao e uiga i le Tusi Paia, sa ou toe tepa i tua i le tele o aafiaga ma iloa ai o le malamalama ua ou maua mai le tatalo na sau mai le Atua.
Malamalama i Faaaliga
I totonu o le 2 Nifae 32:5na aoao mai ai Nifae, “Afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia.” O se mea lena sa ou manatu sa ou malamalama i ai, ina ua uma ona ou papatiso, sa fesili mai faifeautalai ia te au pe ua ou iloa le uiga o faaaliga. Sa ou le iloaina i lona igoa, ae sa ou fai atu ou te manatu o se lagona sa ou lagonaina i le tele o taimi, e pei o loo talanoa mai le Atua ia te au i lou mafaufau, ma tali mai i au fesili ma mafaufauga. Sa latou fai mai e sao au.
Faatasi ai ma le malamalama e uiga i faaaliga ma le meaalofa o le Agaga Paia, sa ou maua ai se manao fou e faitau le Tusi Paia. Sa amata ona ou mauaina le tele o mea aoga iina — sa ou iloaina ai ona sa taialaina au e le Agaga. Sa ou fiafia e faitau tusi a Paulo ma vaai i ana faataitaiga o le aoaoina e le Agaga i ana faatinoga ma lona talitonuga malosi i le Faaola. O mea na sa ou iloaina e ala i aafiaga o le Ekalesia toefuataiina.
O lea i le iuga, e le afaina lou matua, le mea o loo e nofo ai, po o le tele o lou malamalama e uiga i mea a le Atua. Pau lava le mea e te faia o le mulimuli i le viiga: “Ou te alu i mea e te tofia, … ; Avea au pei na e tofia”(viiga, nu. 169). Ola ma faasoa atu mea matagofie e tuu atu e le Agaga i lou loto, aua o le a faaali mai e le Agaga ia te oe le ala e faamanuia ai isi ma maua ai faamanuiaga e oe lava i lenei olaga.