Wan Bigfala Jenis long Hat
Tangkyu long Atonmen blong Jisas Kraes, we i no mekem se yumi save kam klin aot long ol sin blong yumi nomo, be tu, yumi save hil long ol sin.
Wetem Foldaon blong Adam, siknes mo sin i kam insaed long wol. Tugeta i save series tumas long ol eria blong olgetawan. Aot long evri siknes, maet i nogat wan we i go olbaot o nogud tumas olsem kansa. Long sam kantri, moa long wan aot long tri grup blong ol man bae i developem kansa, mo bae hem i responsibol long ded blong kolosap wan aot long fo pat blong evri ded.1 Plante taem kansa i stat wetem wan singgel sel, we i smol tumas mekem se yu save luk nomo wetem wan maekroskop. Be hem i gat paoa ia blong gro mo go olbaot kwiktaem nomo.
Ol man we oli kasem kansa, oli stap tekem wan tritmen blong mekem kansa i stop mo go daon. Blong mekem kansa i stop mo go daon evriwan i minim se, i nomo gat wan saen blong kansa we oli save faenem. Be, ol profesenol oli kwik blong poenem aot se nomata, maet, sikman i stap tekem tritmen blong stopem mo daonem kansa, i no minim se hem i hil.2 Mekem se, nomata we tritmen i save stopem o daonem kansa i save givim spel mo hop, ol sikman we oli kasem kansa, oltaem oli hop from wan samting we i moa bitim tritmen ia—oli hop blong hil. Folem wan sos blong infomesen, “Blong talemaot se wan man i hil long kansa, wan i mas wet blong luk sapos kansa bae i kambak o no, mekem se, hem i wan samting we i tekem fulap taem. Sapos wan sikman i stap long tritmen ia blong sam yia, maet bae hem i save hil long kansa. Sam kansa i save kambak bakegen afta fulap yia blong tritmen.”3
Siknes mo Sin
Semmak olsem kansa i nogud tumas long bodi, sin i save moa nogud long sol. Plante taem, sin i stat long ol smol pat—samtaem i smol tumas—be i gat paoa blong gro kwiktaem nomo. I save mekem sol i roten, afta i mekem i handikap, mo afta i kilim. Hem i bigfala risen—yes, risen ia nomo—blong ded long saed blong spirit long evri krisesen. Tritmen blong sin hem i fasin blong sakem sin. Tru fasin blong sakem sin i wok 100 pesen,blong mekem man blong sin ia i kam klin aot long ol sin blong hem o blong mekem fasin blong kam klin aot long ol sin blong yufala i posibol. Fasin ia blong kam klin aot long ol sin blong yufala i givim spel mo glad long sol. Be nomata hemia, blong kam klin aot long ol sin mo kam fri long ol saen mo paoa blong sin, i no minim se man blong sin ia i hil evriwan. I gat wan samting abaot hat blong man ia we i foldaon we i mekem hem i save sin bakegen. Mekem se, sin i save hapen bakegen, iven afta long plante yia blong kam klin aot long sin. Blong kam klin aot long sin, o long ol nara toktok, blong stap gohed blong kam klin aot long sin, i impoten tumas blong save hil evriwan.
Kam Klin mo Kasem Hiling
Wei ia i helpem yumi blong andastanem se, yu mas kam klin long sin mo tu, kasem hiling aot long ol sin. Wo ia blong hat blong yumi we i wantem mekem gud, mo fasin blong yumi olsem ol man blong mekem nogud, i save mekem yumi taet. Sapos yumi fetful, bae yumi win. No from se yumi jusum gud hat blong yumi ova long fasin blong yumi, be from se yumi putum hat blong yumi long God mo Hem i jenisim fasin blong yumi.
King Benjamin i bin tijim, “From man we i folem fasin blong wol i wan enemi blong God, mo i bin olsem stat long taem we Adam i bin foldaon mo bae i stap olsem, blong oltaem mo oltaem, be sapos nomo hem i mekem folem ol gudfala toktok blong Tabu Spirit, mo i tekemaot man we i folem fasin blong wol … tru long atonmen blong Kraes we i Lod” (Mosaea 3:19). Olsem wan ansa long hemia mo ol nara tijing, ol pipol blong Benjamin i prea se, “O gat sore, mo yusum blad we i pem praes, we i blong Kraes blong mifala i save kasem fogivnes from sin blong mifala, mo mekem se hat blong mifala i save kam klin” (Mosaea 4:2; oli ademap italik). Afta oli bin pres, Lod i ansa long olgeta long nambatu rikwes blong olgeta. Faswan, “Spirit blong Lod i bin kam long olgeta, mo oli bin fulap long glad, from oli bin kam klin aot long ol sin blong olgeta, mo oli bin kasem pis long tingting” (Mosaea 4:3).
Blong luk se ol pipol blong hem oli “harem nogud long sin,” King Benjamin i pusum olgeta blong hil fulwan taem hem i tijim olgeta olsem wanem blong stap gohed blong kam klin aot long sin (luk long Mosaea 4:11–30). “Sapos yufala i mekem samting ia,” hem i promes se, “bae yufala i glad oltaem, mo lav blong God bae i fulumap yufala, mo bae yufala i holemtaet fasin blong kam klin aot long ol sin blong yufala” (Mosaea 4:12).
Ol pipol oli bilivim mo fasem olgetawan long ol toktok blong King Benjamin, we Lod i bin ansarem nambatu pat blong prea blong olgeta— se “hat [blong olgeta] i save kam klin evriwan.” Long fasin blong talem tangkyu mo pres, ol pipol i krae mo talem, “From Spirit blong Lod we I Gat Ol Paoa, … i bin mekem wan bigfala jenis long mifala, o insaed long ol hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem” (Mosaea 5:1). King Benjamin i eksplenem se bigfala jenis ia i minim se oli bin bon long God (luk long Mosaea 5:7).
“?Olsem Wanem Oli Mekem?”
Profet Alma i tijim se yumi mas sakem sin mo bon bakegen—bon long God, mo jenis long hat blong yumi (luk long Alma 5:49). Taem yumi stap gohed blong sakem sin, Lod bae i tekemaot evri sin blong yumi mo bae Hem i tekemaot ol samting we i mekem yumi gat sin. Be, long ol toktok blong Inos, “Lod, ?yu mekem samting ia olsem wanem?” (Inos 1:7). Ansa i simpol, be yet i gat dip mining mo i no save finis. I go long olgeta we oli bin hil aot long eni situesen, long saed blong bodi o spirit, Lod i talemaot se, “Bilif blong yu i mekem yu yu gud bakegen.” (luk long Mak 5:34; Inos 1:8).
Bigfala jenis long hat we Alma i bin eksperiensem i bin hapen “folem fet blong hem,” mo hat blong olgeta we oli folem hem oli jenis taem oli “putum tras blong olgeta long tru God we i stap laef” (Alma 5:12, 13). Hat blong ol pipol blong King Benjamin oli “jenis tru long fet we [oli] gat long nem [blong Sevya]” (Mosaea 5:7).
Sapos yufala i gat kaen fet olsem, we i mekem yumi save trastem Lod wetem ful hat blong yumi, yumi mas mekem ol samting we i lid i go long fet mo afta mekem wanem fet i lidim yumi blong mekem. Long medel blong ol fulap samting we i lid i go long fet, wetem tingting blong jenis long hat, Lod i talem strong blong lego kakae, prea, mo tok blong God. Mo nomata se fet i lid i go long fulap samting, fasin blong sakem sin i fasfala frut blong hem.
Tingting long tufala ves ia long buk blong Hileman we i tokbaot gud ol prinsipol ia. Faswan, yumi ridim wan pipol we “oli bin livim kakae mo oli bin prea plante taem, mo oli kam moa strong … mo oli kam moa strong moa mo moa strong moa long fet blong Kraes … mekem se hat blong olgeta i kam klin mo tabu, we fasin blong mekem i kam tabu i kam from we oli givim hat blong olgeta long God” (Hileman 3:35). Afta, aot long Samuel, wan man blong Leman we i wan profet, yumi lanem se, “Ol tabu skripja, yes, ol profesi blong ol tabu profet, … i lidim … blong gat fet long Lod, mo long fasin blong sakem sin, we fet mo fasin blong sakem sin i karem wan jenis blong hat” (Hileman 15:7).
Dipen long God
Long ples ia, yumi mas stop mo talem tangkyu long bigfala jenis ia we yumi stap tokbaot i kam insaed long yumi; i no kam tru long yumi. Yumi gat paoa blong sakem sin, jenisim olsem wanem yumi mekem samting, fasin blong yumi, iven ol samting we yumi wantem mo ol bilif, be, paoa blong yumi i no naf blong jenisim fasin blong yumi olsem we i stap. Yumi dipen fulwan long God we I Gat Olgeta Paoa, blong bigfala jenis ia. Hem i Hem nao we i mekem hat blong yumi i kam klin mo jenisim fasin blong yumi “afta evri samting we [yumi] save mekem” (2 Nifae 25:23). Invitesen blong Hem i stap oltaem mo i tru: “Sakem sin, mo kam long mi wetem evri tingting blong hat mo bae mi mekem [yu] i kam oraet” (3 Nifae 18:32; oli ademap italik).
Paoa blong hil aot long sin i wanem yumi kam taem yumi “jenis long fasin blong wol mo fasin blong foldaon blong olgeta we oli stap long hem, i go long wan stret mo gud fasin … mo [yumi] kam ol boe mo ol gel blong hem; Mo olsem ia nao oli kam ol niu man” (Mosaea 27:25, 26). Fes blong yumi i saenem Laet blong Kraes. Antap long hemia, ol skripja oli talem long yumi se “eni man we i pikinini blong God, hem i no save gohed blong mekem sin oltaem” (1 Jon 5:18). Hemia i no from yumi no save sin, be from se hem fasin blong yumi naoia blong no sin. Hemia, i wan bigfala jenis tru.
Yufala i mas tingbaot se blong stap eksperiensem wan bigfala jenis long hat i wan proses ova long taem, i no long wan poen long taem. Plante taem jenis ia i stap gro, samtaem i gro smol we smol, be hem i tru, mo hem i gat fulap paoa, mo hem i nid.
Sapos yu no bin eksperiensem wan bigfala jenis olsem, mi askem yu: ?Yu bin sakem ol sin blong yu mo kam klin aot long ol sin blong yu? ?Yu stadi long ol tabu skripja? ?Yu lego kakae mo prea fulap taem, blong mekem se yu save stap strong mo moa strong long fet blong yu long Kraes? ?Yu gat inaf fet blong trastem Lod wetem ful hat blong yu? ?Yu stap stanap strong mo no muvmuv long fet ia? ?Yu stap lukaot long ol tingting, toktok, mo wok mo stap kipim ol komanmen blong God? Sapos yu mekem ol samting ia, bae yu glad oltaem mo fulap wetem lav blong God mo oltaem holemtaet fasin ia blong kam klin long ol sin blong yu. Sapos yu gohed blong kam klin aot long sin, !bae yu hil, kam oraet, mo jenis!
Jisas Kraes i gat paoa blong klinim yumi long ol sin blong yumi mo tu, hilim yumi long ol sin blong yumi. Hem i gat ol paoa blong sevem, mo go kasem en ia, Hem i gat ol paoa blong jenisim yumi. Sapos yumi givim ol glad hat blong yumi long Hem, stap eksasaesem fet taem yumi stap mekem evri jenis we yumi save mekem, bae Hem i eksasaesem paoa blong Hem long yumi blong karem bigfala jenis ia long hat (luk long Alma 5:14).