Faenem Glad Taem Yu Mekem Wok blong Lod
Olsem wan yang adalt, laef i bisi oltaem. I gat fulap samting we yumi save mekem: gohed blong gat wan edukesen, lukaotem wan kompanion we i no save finis, disaed long wanem wok blong mekem, statem wan famli. Mo wetem evri gudfala samting ia, oli leftemap tingting blong yumi blong “oltaem stap mekem wok blong Lod.”1
“Hem i taem blong yumi andastanem moa klia rol blong yumi blong mekem wok blong sevem man i muv i go hariap. Taem yumi stap mekem ol memba misinari wok, … tempol mo famli histri wok, mo stap tijim gospel olsem wan nomol pat blong laef blong yumi, bambae yumi gat bigfala glad, mo bae yumi kasem ol presen blong spirit we yumi nidim blong mekem Jos ia i kam strong moa.”2
Hemia i sam long ol yang adalt we oli bisi we oli faenem glad taem oli mekem taem blong mekem wok blong Lod.
Famli histri: Statem Naoia
“Restoresen i mekem fulap samting long miwan from se mi kam blong save se famli i save stap tugeta blong taem we i no save finis,” Itumeleng Tlebere blong Maseru, Lesotho i talem. “Mi save luk tufala bubu blong mi mo ol bubu blong bifo we oli ded finis. Hemia from wanem mi lavem famli histri tumas. From se mi mi fas jeneresen long Jos, mi gat fulap wok blong mekem blong olgeta.”
Itumeleng i save aot long eksperiens blong hem se blong lukaotem ol rekod mo infomesen i save gat jalenj, be hem i gohed blong leftemap tingting blong ol yang adalt blong mekem famli histri blong olgeta: “Statem blong mekem naoia … Famli histri i mekem mi glad long evri samting mi gat.” I save mekem semmak long yu.
Givhan: Stap Olsem Ol Han blong God
Lucy Fergeson blong Yuta,YSA, i serem olsem wanem wok blong givhan i helpem hem tru long rabis wik long laef blong hem—long wan wei we hem i ting se bae i no hapen. Hem i wik blong faenol eksam long skul, wan bisi wik long wok, mo boefren blong hem i finis fren wetem hem. Mo afta, hem i talem: “Mi fogetem se, mi mo givhan kompanion blong mi, i plan blong bekem mafin blong ol sista we bae mitufala go givhan long olgeta.”
Taem tufala i bekem kek tugeta, givhan kompanion blong Lucy i lisin long hem, i sore long hem mo i givim sam advaes long hem. “Blong mekem mo go putum ol mafin i no wan samting we bae i impoten tumas o i mekem wan samting i defren,” Lucy i talem. “Be afta we kompanion blong mi i putum mi long haos, mi luksave se hemia nao wanem mi nidim blong mekem blong mi harem gud bakegen, mo samtaem God i sendem ol nara pipol blong oli kam ol han blong Hem. Wanem i gud tumas long mi,hem i we help i kam long givhan kompanion blong mi be i no ol givhan sista we oli givim olgeta blong givhan long mi. Mi glad tumas we hem i helpem mi filim se mi no stap miwan mo oli lavem mi.”
Misinari Wok: Laef blong Kam Wan Eksampol
Yu no nid blong yu kam wan fultaem misinari blong serem gospel. Venelaa Vakapalli, blong Andra Prades, India, i eksplenem: “Taem mi stap go long ol bas, taem mi go long ol tren, mi openem Buk blong Momon mo ridim. Mo fulap pipol oli stap askem mi abaot Buk ia.
Ashli Dilion blong Yuta,YSA i serem: “From nomo se mi no go long wan fultaem misin i no minim se mi no wan misinari. I no blong mi lego famli blong mi blong givim seves i go long Lod, be mi givim seves i go long Lod wetem ol famli blong mi. Mi givim seves i go long ol narawan, mo mi laef blong kam wan eksampol blong wan disaepol blong Jisas Kraes.”
Mama mo Papa: Tijim Gospel long Ol Pikinini
Ingrid de Bastian Ortis, blong Veracrus, Meksiko, i wan mama we i gat 26 yia mo i gat tri pikinini. Hem i eksplenem se: “Olsem wan yang mama blong ol trifala pikinini ia, i gat sam dei we i tumas, wetem fulap wok blong haos blong mekem, wetem tu, blong lukluk long ol pikinini. Be, mifala i filim responsabiliti ia blong tijim gospel long pikinini blong mitufala blong mekem se oli save se oli ol pikinini blong God.
“Hem i diuti blong mi olsem wan mama blong helpem olgeta i luksave blong olgetawan se Papa blong yumi long Heven i gat wan plan blong stap glad blong olgeta.”
Iven sapos yu no wan mama o papa yet, yu save plei pat ia blong help blong tijim ol pikinini ia. “Hem i impoten tumas se ol pikinini ia oli save abaot ol prinsipol mo ol doktrin,” Ingrid i talem, “mekem se yu save kontribiut olsem wan yang singgel o mared adalt long sam long ol Praemeri mo neseri koling blong yumi.”
Yumi ol yang adalt, i bisi oltaem. Be i nomata wanem samting bae i hapen, yu save faenem ol simpol wei blong mekem ol wok blong Lod long evri eria long laef blong yu—bigwan o smolwan.