Blong Stap Yusum Ful Nem blong Jos I Defren Smol be I Gud Tumas.
Blong folem instraksen blong profet i luk se i simpol, be i tekem moa hadwok bitim we mi bin tingting long hem.
Taem Presiden Nelson i tokbaot blong yusum stret nem blong Jos long Oktoba 2018 jeneral konfrens, mesej blong hem i klia nomo long mi: “Hem i komanmen blong Lod. …
“… Blong karemaot nem blong Lod long nem blong Jos blong Lod, i wan bigfala viktri long Setan.” (“Stret Nem blong Jos,” Liahona, Nov 2018, 87, 88).
Mi jes luksave se mi nid blong tingting tu taem long hao mi storian long olgeta raon long mi. Wetem sam long ol man we i wok wetem mi long wok we oli stap singaotem mi wan “Momon” mo wan memba blong “Momon Jos.”
Mi mekem komitmen ia blong yusum ful nem blong Jos. Mi wet from janis ia blong klemem membasip blong mi long Jos Ia blong Jisas Kraes blong Ol Lata-dei Sent. Be, janis ia i kam, mo bakegen hem i long saed blong bisnis. “Yufala Ol Momon yufala i ol kaen pipol,” wan gudfala kastoma i talem long mi. “O, tangkyu tumas,” mi ansa. “Olsem ol memba blong Jos Ia blong Jisas Kraes blong Ol Lata-dei Sent, mifala i biliv se yumi evriwan i ol brata mo sista.” Afta storian ia i gohed wetem hem mo evriwan i stap tokbaot olsem wanem “Ol Momon” oli kaen.
Iven we mi mekem pat blong mi blong talem ful nem blong Jos, mi filim se wan samting i no stret yet. Ol fren blong mi mo olgeta we oli wok kolosap long mi, oli luk mi olsem pat blong “Momon Jos” mo i no wan we i stap folem Jisas Kraes, be yet oli no luk mi olsem wan memba blong Jos Ia blong Kraes we i kambak finis.
?Hem I Wan Trabol blong Talem Stret Nem blong Jos?
Ova long ol nekis miting blong mi abaot relijin blong mi, mi faenem se mi harem nogud tumas from sem ia blong stap wokem blong ripitim ful nem blong Jos, fulap taem long sem storian nomo. Evriwan i stap givim long wan defren kaen fes. Mo bae storian ia oltaem bae oli stap talem “Ol Momon.”
Mi traem blong mekem ol aksen blong we i fil moa nomol. Be i luk olsem sem i moa had bitim we mi ting se bae i hapen, speseli wetem olgeta we mi no wantem olgeta i sem. Mi no wantem sem o flas abaot hao mi stap laef folem bilif blong mi, be tu, mi no wantem mekem samting i strong tumas, from se fulap long ol man ia oli bin singaotem mi “Momon,”mo mi bin akseptem. Mi harem fulap taem ol memba blong Jos oli stap singaotem yet olgeta mo ol nara memba blong Jos. “Momon” long sam long ol miting mo long ol narafala ples.
Mi faenemaot se mi stap askem miwan sapos bae mi yusum ful nem blong Jos hem i impoten tumas long evri samting. Nem ia “Momon”, afta evri samting, i wan samting we i gud long maen blong fulap pipol— blong stap olsem wan “Momon” hem i oltaem wan samting long mi. Be taem mi gobak long toktok blong Presiden Nelson, mi glad tumas se hem i impoten tumas, iven sapos bae i defren smol long storian blong yu. Mekem se mi komitim miwan bakegen.
Wan Janis blong Testifae Abaot Kraes.
Nekis taem mi yusum nem blong Jos fulwan, i taem mi visitim wan fren blong mi we i no wan memba blong jos. Wan man i kam long mi mo wetem wan bigfala smael i askem sapos mi wan Momon. “Mi wan memba blong Jos Ia blong Jisas Kraes blong Ol Lata-dei Sent,” yes, mi talem long hem. Hem i stat blong askem mi sam kwestin, we wanwan long olgeta i stat wetem: “?Momon Jos i bilif se … ?” Mo evri taem , mi statem ansa blong wetem toktok ia: “Long Jos Ia blong Jisas Kraes we i kambak, mifala i bilif …”
Storian ia i gohed olsem fo o faef taem. Taem hem i luksave se bae mi neva akseptem taetol ia “Momon”, hem i askem mi stret, “?Yu yu no wan Momon?”
Afta mi askem hem sapos hem i save huia Momon—hem i no save, mi talem long hem se Momon hem i wan profet blong Lod, wan man blong histri, wan jeneral blong ami, mo wan man blong politik long Amerika blong bifo. Mi glad tumas blong wok wetem wan man we i givim ful taem blong hem long seves blong Lod mo ol nara man.
“Be,”mi gohed, “Momon i no ded from ol sin blong mi. Momon i no mekem blad blong hem i ron from mi, o i safa long Getsemane o i ded long kros. Momon i no God blong mi. Jisas Kraes Hem I God mo Sevya blong Mi Hem i Ridima blong mi. Mo long nem blong Hem [Jisas Kraes] nao, mi wantem se bae oli save mi long hem long las dei ia, mo mi hop se bae oli save mi long nem blong Hem, tedei.”
Mi filim save se Spirit i stap blong sapotem mi long sot testemoni blong mi long niufala fren blong mi. Afta sam seken we ples i kwaet, hem i talem, “?So, yu wan Kristin Man?”
“Yes, mi wan Kristin Man,” mi ansa, mo wan memba blong Jos Ia blong Jisas Kraes we i kambak.”
Blong lukaotem blong folem instraksen blong profet, i luk se i simpol nomo, be i luk olsem se i tekem moa hadwok bitim wanem mi save. Mi no stret evriwan yet blong folem evri samting we oli askem mi blong mekem. Be long evri samting, mi mekemsua se mi yusum ful nem blong Jos.
Mi glad tumas long Spirit we mi bin filim taem mi testifae long ol narawan abaot Sevya blong mi mo membasip blong mi long Jos Ia blong Hem. Mo naoia mi gat wan gudfala wei blong testifae abaot Hem mo long Jos Ia blong Hem long eni taem we oli askem mi sapos mi wan “Momon.”