Berglind Guðnason
Arnesisla, Aeslan
Berglind (lef) wetem sista blong hem Elin (long raet). Taem we Berglind i bin stap long bigfala sik blong draon long wari we hem i bin gat, hem i filim se hem i no save gohed. Taem hem i stat blong talemaot ol trabol blong hem long ol famli mo ol fren, hem i bin faenem wan hiling long saed blong spirit mo ol filing blong hem tru long ol tul we Papa long Heven i bin givim long hem.
Mindy Selu, fotografa
Mi bin stap dil wetem sik blong draon long wari stat long taem we mi gat 13 yia. Long wan taem, ol samting oli bin go nogud tumas, mekem se mi traem blong karemaot laef blong miwan. Long tetaem ia, mi bin filim se mi nomo gat hop. Mi tingting: “Bae mi neva hapi samtaem.” “Bae mi neva winim wan samting.”
I bin gat wan taem se mi bin tingting blong mi aot long Jos, mo se hemia bae i ansa long evri problem blong mi, from se mi nomo gat hop long saed blong evri samting. Hem i isi blong mekem wanem yu no sapos blong mekem long Aeslan. Jos i smol long ples ia. Hem i jes mi mo ol brata mo sista blong mi nomo, insaed long ol klas blong Jos taem mifala i stap groap i kam. Mi filim se mi stap miwan, mo blong smol taem, mi no laekem blong go long jos.
Plante pipol long Aeslan, oli no wantem relijin. Ol pipol oli stat blong dring taem oli yangyangfala nomo. Mi tu, mi fas long hemia, mo mi no bin aktiv blong wan smol taem long laef blong mi. Mi no praod long hemia, be i pat blong eksperiens blong mi, mo mi bin lanem samting aot long hem. Mi bin stadi long toktok blong Elda Jeffrey R. Holland, mo mi bin laekem wanem we hem i bin talem: “Ol samting blong bifo, oli blong yumi lanem samting aot long hem, be i no blong yumi stap laef insaed long hem. … Taem yumi lanem wanem we yumi nid blong lanem …, nao yumi lukluk i go long fored, yumi tingbaot se fet, oltaem i poen i go fored i go long fiuja.”1
Wan dei, mi rili stap gat hadtaem, nao mi ridim petriakel blesing blong mi. Taem mi bin stap ridim, mi bin luksave se mi gat wan fiuja. God i gat wan plan blong mi, mo i bin tru se Hem i lavem mi. Blong stap go long jos, stap tekem sakramen, stap ridim ol skripja, mo stap prea, evri samting ia oli tekem plante laet mo hapines i kam insaed long laef blong mi. I no longtaem afta, mi luksave: “Hemia i stap helpem mi ia.” Long tetaem ia nao mi save se, oltaem nomo, mi bin wantem gospel insaed long laef blong mi. Afta evri samting we mi bin go tru long hem, mi save se gospel i bin sevem laef blong mi, mo mi hapi tumas long hemia.
Blong tokbaot sik blong mi we mi draon long wari, wetem ol famli mo ol fren blong mi i bin helpem mi plante. Mo tu, i lidim mi blong kasem moa help. Mi no bin wantem tekem meresin o folem wan tritmen. Mi stap wokem talem long miwan se: “Mi gat wan God.” Be God i bin givim plante nara tul, olsem meresin, mo tritmen, blong yumi stap yusum antap long ol samting long saed blong spirit.
Taem mi bin stat blong ridim ol skripja blong mi, plante moa evri dei mo stap kam kolosap long God tru long prea, mi bin kasem plante blesing mo revelesen se, stamba tingting blong mi, i blong helpem ol narawan. Mi filim olsem se plante long yumi i fesem ol sik long tingting, mo yumi stap traem blong haedem. Sik blong mi blong draon long wari mo ol hadtaem oli bin tijim mi se, i moa gud blong tokbaot mo joen wetem ol narawan. Fren blong mi, i no longtaem, i bin toktok long mi abaot hadtaem blong hem wetem sik blong draon long wari. Mitufala i tokbaot hemia, mo mitufala i bin andastanem mitufala.
Yumi no stap luk oltaem se ol narawan oli gat hadtaem wetem sik ia, be samtaem, mi jes wokbaot i go raon mo luk ol nara pipol, mo luksave se God i save wanwan mo evriwan long yumi. Hem i lavem yumi, mo Hem i save stret wanem yumi stap gotru long hem. Mo yumi save helpem wanwan long yumi.
Tru long ol hadtaem blong mi wetem sik blong draon long wari, mi bin lanem blong askem: “?Wanem nao mi save lanem aot long tes ia? be i no ?From wanem nao mi gat tes ia?” Mi lavem Ita 12:27, long ples ia we i talem se ol samting we yumi no strong long olgeta, bae yumi save kam strong long olgeta sapos yumi gat fet long Jisas Kraes. Oltaem, hemia i givim kamfot long mi.
Yumi evriwan i jusum blong kam long ples ia, long wol ia. Yumi bin save se bambae yumi safa tru long ol tes blong yumi. Mo blong talem stret, hemia nao i mekem laef i gud tumas. From se yumi save se ol gudgudfala samting oli stap kam yet. Yumi save se, sapos yumi folem Sevya tru long evri had longfala taem, yumi save gat laef we i no save finis wetem evri blesing ia we oli stap wet long yumi.
Yes i tru. Mi bin luk olsem wanem mi bin jenis tru long sik blong mi blong draon long wari. Atonmen blong Sevya i ril, hat blong mi i jenis, mo mi kam strong moa. Mi filim se mi mi wan defren wan; mi no olsem huia mi bifo. Ol pipol oli luk, mo oli talem: “Yu jenis.” Wan gel long skul i talem: “Mi luk wan samting i defren long yu, mo mi luk wan laet insaed long yu.” I defren from se, hem i no iven wan memba blong Jos, mo mitufala i no bin storian plante bifo.
Taem mi bin stap long prapa nogud taem blong sik blong stap draon long wari, ol pipol bae oli talem long mi, “bae i kam oraet yet.” Bae mi taed blong harem ol kaen samting ia, we nomata i defren blong harem, be i bin tru.
Be yu mas wantem blong kam gud moa. Mi bin lanem se yu no save ting se bae yu kam gud moa sapos yu no mekem wan samting. Yu mas wantem blong kam hapi mo biliv se yu gat paoa ia blong mekem samting, mo yu gat wan fiuja. Hem i impoten blong tingbaot se plante pipol oli lavem yu, mo Papa long Heven tu. Oli stap ia blong helpem yu.
Mi neva ting se bae mi hapi olsem we mi hapi naoia. Sam dei, mi stap gat trabol wetem, be wetem ol tul we Papa long Heven i stap givim long mi, mi save handelem. Naoia, taem mi harem se mi stap glis blong go draon long wari, mi stap talem long miwan we pipol i lavem mi, mi gat pipol blong storian wetem, mo ol samting bae oli kam oraet.
Taem hem i bin fesem sik blong draon long wari, i bin mekem Berglind i save moa abaot wei we yumi save helhelpem wanwan long yumi truaot ol jalenj blong yumi. “God i save wanwan mo evriwan long yumi, Hem i lavem yumi, mo Hem i save stret wanem we yumi stap gotru long hem. Mo yumi save helpem wanwan long yumi.”
Berglind i bin luk wan jenis long hemwan tru long ol jalenj blong hem. Hem i talem: “Atonmen blong Sevya i ril. “Hat blong mi i jenis, mo mi kam strong moa. Mi filim se mi mi wan defren wan; mi no olsem huia mi bifo.”
Berglind i talem: “Taem mi bin stat blong ridim ol skripja blong mi, plante moa evri dei mo stap kam kolosap long God tru long prea, mi bin kasem plante blesing mo revelesen se, stamba tingting blong mi, i blong helpem ol narawan. Mi lavem Ita 12:27, long ples ia we i talem se ol samting we yumi no strong long olgeta, bae yumi save kam strong long olgeta sapos yumi gat fet long Jisas Kraes. Oltaem, hemia i givim kamfot long mi.”