Olsem Wanem Ol Yang Adalt Oli Mekem I Defren long Restoresen Ia we I Stap Gohed

Oltaem ol yang adalt oli bin gat wan impoten rol long wok blong fasin blong sevem man.

Pikja

young adults

Eni taem yu harem wan invitesen i kam long wan lida blong Jos blong tekpat long Restoresen ia we i stap gohed, o blong help blong karem Isrel i kam tugeta, yu eva tingting se, “?Wanem nao mi save mekem?” Mi wan man nomo, “Mi yang tumas,” “Mi no mared yet,” o “Mi no save inaf. ?Wanem mi save mekem we bae i defren?”

Wanwan long yumi i gat ol kaen tingting ia i krosem maen blong yumi wanwan taem. Be traem blong saremaot fasin ia blong gat tu tingting long yuwan taem yu stap ridim ol toktok ia:

Josef Smit i gat 22 yia nomo taem hem i stat blong transletem Buk blong Momon.
Oliva Kaodri i gat 22 yia tu mo Jon Witma i gat 26 (!mo tugeta i singgel!) taem oli bin stat blong raet blong Josef.
Long 1835, taem oli bin singaotem fas Kworom blong Olgeta Twelef Aposol, ol yia blong olgeta i bitwin 23 kasem 35 yia.
Plante long Ol Sent blong bifo we oli bin joenem Jos mo seremaot gospel olbaot i bin ol yang adalt.

Long evri samting, God i bin wok tru long ol yang adalt long ol eli dei blong Restoresen blong gospel blong Jisas Kraes. Ol pipol olsem yu nomo.

Lego hemia i draon insaed long yuwan.

Jos bae i no kavremap wol tedei sapos evriwan i ting se oli no save mekem wan samting i defren. Mo yu —!yes, yu!— yu yu wan pat blong jeneresen ia we oli jusum blong gohed blong putumbak mo lidim Jos Ia blong Jisas Kraes tedei.

Oli Sendem Yu long Ples Ia. Naoia. Blong Wan Risen.

Taem yumi stap tokbaot jeneresen blong yumi, Presiden Russell M. Nelson i tijim, “Yu stap laef long ‘nambaleven aoa.’ Lod i bin talemaot se hemia i las taem we bae Hem i singaotem ol man blong wok i go long plantesen blong Hem blong karem i kam wanples, olgeta we oli jusum aot long ol fo pat blong wol ia. (Luk long Doktrin mo Ol Kavenan 33:3–6.) Mo yu, oli sendem yu blong tekpat long kam tugeta ia.”¹

Tingbaot fos blong 65,000 fultaem misinari we oli stap serem gospel ful dei, evri dei, truaot long wol. Tingbaot evri yang adalt we oli stap mekem ol kavenan long tempol, mo tekem janis long prishud we i kambak long wol mo ol tempol blesing mo stap laef folem kavenan blong stap fetful, blong mekem ol famli blong olgeta i kam moa strong, mo blong bildim kingdom blong God long wol ia. Tingbaot ol yang adalt we oli stap givim seves olsem ol Jos lida raon long wol. Tingbaot olgeta we oli stap gohed strong blong folem Jisas Kraes nomata long ol samting we i agensem olgeta. Ol Yang Adalt oli bin wan impoten pat ia blong Restoresen ia we i stap gohed. Mo Restoresen ia we i stap gohed i bin wan impoten pat ia long laef blong ol fulap yang adalt memba blong Jos.

Wanem Nao Restoresen I Minim long Yumi

Long plante long yumi, tekpat blong yumi long Restoresen i stanap strong long wanem nao Restoresen i bin tijim long yumi. Blong Vennela Vakapalli, wan yang adalt konvet long Andhra Pradesh, India, “Restoresen ia hem i blong lukaotem revelesen. Josef Smit i bin lukaotem revelesen insaed long ol bus. Hem i bin kaonsel wetem Lod, hem i bin wet from wan ansa, hem i bin gat fasin blong wet longtaem. Hemia i wanem mi lavem.” Vennela i eksplenem se, “Bifo mi bin harem Restoresen, mi no bin save tumas blong lukaotem revelesen. Wan long ol bigfala samting we i mekem mi sapraes wetem glad hem i, hamas taem hem i spendem blong kasem revelesen ia long God. Hemia i wanem mi lanem aot long Restoresen.”

Emma mo Jacob Roberts, wan yang kapol blong Yuta, YSA, i agri se Restoresen ia abaot “revelesen we i stap gohed”—blong yumiwan mo blong wol ia—”mekem se yumi save gat wan profet, wan man blong toktok long bihaf blong God long wol ia, blong mekemsua se nomata wanem jalenj wol ia bae i karem i karem, yumi gat wan man we i stap wok mo prea mo toktok wetem God blong mekemsua se yumi rere mo save fesem wanem jalenj wol ia i karem taem i stap jenis.”

Jacob i talem, “Fulap save we i kam wetem Restoresen i mekem laef blong mi i moa isi mo mi no wari tumas.” Evri samting i kam wetem wan strong tingting se “i gat wan God we lavem yumi mo stap waj ova long yumi,” Emma i talem. “Tingting blong Hem i hapines blong yumi. Olsem ol yang adalt, yumi save trastem mo folem Hem fulwan from se yumi save se gol blong Hem Hem i hapines blong yumi. Yumi save se yumi ol man we i no save finis, mo hemia i givim fulap hop mo fet long mi, mo wanem samting mi mekem naoia mo wanem mistek mo mekem naoia, mi save sakem sin yet mo mi gat taem ia blong progres mo lan.”

Kaen pis long maen olsem i bin helpem Ramona Morris tu, wan yang adalt blong Barbados, taem hem i jes lanem abaot Restoresen. Long medel blong ol nara samting, hem i bin kasem wan testemoni se “Papa long Heven i stap olsem blong helpem yumi. Restoresen ia i karem pis nomo i kam long olgeta we oli kwestinim laef blong olgeta mo kwestinim plan we God i gat blong olgeta.”

Be nomata we andastaning blong Restoresen i bin mekem laef blong hem i kam klia, hem i talemaot tu se :“blong stap longwe tumas long ol hedkwota blong Jos, i had blong konek wetem gospel, be from se mi bin gat wan strong testemoni abaot gospel ia we i kambak long wol, mi save se nomata longwe olsem wanem mi stap, mi save filim olsem mi wan pat blong Restoresen, se mi no stap miwan.”

Mo hem i no stap hemwan. Ol yang adalt raon long wol o stap tekpat long Restoresen tru long tempol seves, famli histri, mo misinari wok. Wetem andastaning ia blong revelesen blong yuwan we yumi bin kasem taem yumi lanem abaot Fas Visen blong Josef Smit mo Restoresen, yumi evri wan i save gohed blong lukaot blong save wil blong God mo wanem pat yumi save mekem long Restoresen ia we i stap gohed.

Pikja

world map

Map i kam long Getty Images

Ol Yang Adalt I Stap Lidim Jos

Maet yumi ol yang adalt, be yumi save stap olsem ol lida long Jos naoia. Nomata se hem wan nomo i memba blong Jos long famli blong hem, Janka Toronyi blong Győr, Hangari, i bin mekem ol nara yang adalt fren blong hem i tekpat moa long ol nara lukluk blong Restoresen: “Wan grup blong ol fren blong mi i bin go long misin, mo i bin gud tumas blong luk olgeta i progres mo afta oli kambak, mo afta oli gro fulap tru long ol eksperiens blong olgeta. I bin wan gudfala eksperiens blong mifala evri wan. Mo hem i gud tumas blong luk ol yang singgel adalt fren blong mi i wok long ol koling blong olgeta mo samtaem, oli mekem ol janis blong olgetawan tu olsem taem oli volontia blong stap olsem ol kaonsela blong BYS (Blong Ol Yut Oli Kam Strong) konfrens. Mi filim olsem Restoresen i no abaot blong tijim ol pipol abaot gospel nomo—be hem i abaot blong mekem ol memba we yumi gat, oli kam moa strong.”

Ol yang adalt long Hangari oli andastanem se oli ol fiuja lida blong Jos. “Oli nidim yumi mo yumi nid blong stretem yumi blong kasem mak blong wok ia, we samtaem, i save bigwan tumas,” Janka i talemaot. “Lod i stap muvum wok blong Hem i go hariap mo yumi, yumi pat long hem. Samtaem yumi tingting se, ‘Olsem wanem nao bae mi save mekem hemia?’ Be i gud tu blong luk ol lida blong yumi i gat fulap tras long yumi. I pusum tingting blong olgeta we oli lavem Jos mo gat wan strong testemoni, from oli save se wan dei bae yumi responsibol from. Yumi mas tekem responsabiliti blong progres blong yumiwan long saed blong spirit.

Sean mo Stefany Joseph blong Wes Ostrelia i tekpat long Restoresen taem oli stap lukaotem ol yut long wod blong olgeta. “Long mi, blong tekpat long Restoresen ia hem i blong helpem ol fiuja jeneresen blong andastanem wanem ia gospel, mo olsem wanem i save helpem olgeta mo ol narawan long laef blong olgeta,” Stefany i talem. “Yumi save help blong mekem wan fandesen we i strong moa blong Jos ia long kantri blong yumi sam taem afta.”

“Yumi wantem blong helpem ol yut blong gat wan testemoni abaot Buk blong Momon mo Josef Smit, mo luksave olgetawan se oli ol pikinini blong God,” Sean i eksplenem. “Yumi no wantem se i bae i wan samting we bae oli singsing abaot long Praemeri nomo—yumi wantem olgeta blong save se i tru.”

Be long Vennela, blong stap laef folem gospel long India i no isi oltaem, be hem i save se paoa blong ol yang adalt memba long we bae i givim insperesen long ol nara wan mo helpem progres blong Restoresen. “Long ples ia, evri yang adalt oli fetful. Oli lukaotem ol janis blong serem testemoni blong olgeta,” hem i talem. “Yumi olsem ol paeonia long India. Yumi muv long ol defren ples mo sam long yumi i iven lego ol famli blong yumi. Laef i save had lelebet long ples ia, be mifala i jus yet blong laef folem gospel. Ol skripja i givim fulap hop, paoa, mo strong paoa long tingting long mi.”

Nomata ples we yumi stap long hem, olsem ol yang adalt, yumi save gohed blong gat wan gudfala paoa long Restoresen ia we i stap gohed tru long fet mo komitmen blong yumi long gospel.

Fiuja blong Jos Ia: I stap long Yumi

Yumi nao fiuja blong Jos ia. Yumi stap long las faet. Papa long Heven i dipen long yumi blong helpem Hem blong mekem wok blong Hem—wok blong Hem we jenisim laef. Hem i save se yumi strong inaf blong gohed blong muv fored mo faet agensem evri samting we enemi i gat i stap. Setan i stap hanggri moa. Hem i save se hem i stap faetem wan faet we bae i lusum from wok blong Lod bae i win.

Janka i talem, “Yumi save se Lod i stap muvum wok blong Hem i go hariap mo nogat man i save stopem hemia.” “Yumi save se bae i hapen nomata wanem. Be yumi mas disaed sapos yumi wantem pat blong hem mo help blong muvum i go fored o waj nomo long ol laen long saed. Yumi gat fridom ia blong jus blong pat long hem, mo yumi gat testemoni blong save jusum raet mo jus blong folem Kraes. Yumi mas pat long hem.”

Mekem se i stap long yumi blong jusum wij saed yumi stap long hem.

I stap long yumi blong leftemap tingting blong yumi blong stanap from wanem yumi biliv long hem.

i stap long yumi blong lukaotem revelesen blong yuwan blong ol laef blong yumi.

I stap long yumi blong letem ol had jalenj we yumi stap fesem, i mekem fet blong yumi long Sevya i kam moa strong.

I stap long yumi blong folem Hem mo mekem evri samting we yumi save mekem blong karem ol narawan i kam long Hem.

I stap long yumi blong stanap strong kasem en long bes wei we yumi save mekem.

Yumi rili stap long ol las dei. Mo blong lidim Jos long wanem Presiden Nelson i singaotem wan “taem blong dispensesen ia we i moa impoten long histri blong wol”² i saon olsem wan responsabiliti we i had. Be tingbaot hemia—Papa long Heven i trastem yumi inaf mo putumgud yumi i stap blong stap long wol ia long stret taem ia, long taem we yumi fesem fulap temtesen tumas mo ol samting we i pulumaot tingting mo plante tingting blong go agens.

Be blong sendem yumi long ples ia long dispensesen ia we i impoten, Papa long Heven i no stap putum yumi blong lus. Hem i save hamas yumi save mekem, paoa blong yumi, karej blong yumi, mo antap long evri samting, Hem i save se yumi save mekem i defren long Restoresen blong Jos, nomata long yia o sapos yumi mared o no. Nomata ol hadtaem i had olsem wanem, o hamas i luk se i no posibol blong stap lid mo serem gospel raon long wol, wetem Hem long saed blong yumi, huia i naf blong faet agensem yumi? Hem i save helpem yu blong mekem hemia we i no posibol.