Te Tau Lava ʻo Vahevahe ʻa e Maama ʻo e Ongoongoleleí
Faitaaʻi ʻe Weston C. Colton
ʻI heʻete kei talavoú, ko ha taimi ia ki ha tupulaki, mo ha faingamālie ke kamata ai hono langaki ʻete moʻuí. Pea ʻe malava pē ia ke fakamafasia, fakafiefia, mo fakailifia ʻi he taimi tatau pē (ko hono moʻoní kuo hoko ia kiate kimautolu).
Ka neongo ʻetau taʻeʻilo e ngaahi tali ki he ngaahi fehuʻi vivili kotoa ʻo e moʻuí, ʻoku ʻi ai ha meʻa ʻe taha ʻoku mau ʻilo pau—ʻa ia kuo hoko maʻu pē e kakai lalahi kei talavoú ko ha tākiekina mahuʻinga ʻi he hokohoko atu hono Toe Fakafoki Mai ʻo e Siasi ʻo Sīsū Kalaisí.
ʻI heʻemau palaniʻi e konga ki he māhina ko ʻení, ne mau talanoa ai ki ha kakai lalahi kei talavou tokolahi fekauʻaki mo ʻenau kau ko ia ki hono tānaki fakataha ʻo ʻIsilelí. Pea kuo hanga ʻe heʻenau ʻofa moʻoni mo e mateaki ki he ongoongolelei ʻo Sīsū Kalaisí ʻo ʻomi ha loto-fakatōkilalo kiate kimautolu. Neongo pe ko e hā honau ngaahi tūkungá, ka ʻoku mahino ki he Kāingalotu kei talavou ko ʻení ʻa e fatongia mahuʻinga ʻoku nau maʻu ʻi he kuonga fakaʻosi ko ʻení. ʻI he “Ko e Founga ʻOku Fakahoko Ai ʻe he Kakai Lalahi Kei Talavoú ha Liliu ʻi he Hokohoko Atu Hono Toe Fakafoki Mai ʻo e Ongoongoleleí” he peesi 44, te ke lava ai ʻo laukonga ki he founga ʻoku teuteuʻi ai ʻe he kakai lalahi kei talavou mei ʻInitia, Hangakali, Pāpeitosi, ʻAositelēlia pea mo e ʻIunaiteti Siteití ʻa e māmaní ki he Hāʻele ʻAnga Ua Mai ʻa e Fakamoʻuí.
ʻI he ngaahi talanoa fakaʻilekitulōniká pē, ʻoku ʻomi ai ʻe Sisa ha fakakaukau fekauʻaki mo e founga te tau lava ai ʻo ʻilo hotau taumuʻá pea hoko ko ha kau takimuʻa lelei angé. ʻOku talanoa ʻa Lile fekauʻaki mo e ngaahi tāpuaki ʻoku tau maʻu ʻi heʻetau muimui ki he faleʻi ʻa e palōfitá. ʻOku vahevahe ʻe he kakai lalahi kei talavou kehé ʻenau ngaahi aʻusia ʻi he ngāue tokoni fakatemipalé, ngāue fakaetauhí, hisitōlia fakafāmilí, mo e ngāue fakafaifekaú. Pea ʻoku mau vahevahe ha sīpinga mei ha taautaha kei talavou ʻi Niu Kaletōnia ʻokú ne fakahaaʻi e founga ʻoku fakahoko ai ʻe he kāingalotu kei talavoú e ngāue ʻa e ʻEikí ʻi he ngaahi feituʻu iiki ange ʻo e Siasí.
Neongo pe ko e fē feituʻu ʻokú ke ʻi aí pea ko e hā ho tūkungá, te ke lava ʻo fakahoko ha liliu ʻi hono tānaki fakataha ʻo ʻIsilelí ʻo lahi ange ʻi he meʻa ʻokú ke pehē te ke lavá. ʻI heʻetau hoko ko ha kakai lalahi kei talavoú, ko kitautolu ʻa e kau takimuʻa ʻo e Siasi ko ʻení ʻi he kahaʻú. Pea ko e kiʻi maama ʻo ʻetau ngaahi ngāue ʻi he ʻaho ní ʻe mofisi atu ia pea te ne tufaki ʻa e maama ʻo e ongoongoleleí ʻi he funga ʻo e māmaní ʻapongipongi.
Fakaʻapaʻapa atu,
Chakell Wardleigh mo Mindy Selu
Ongo ʻētita ʻi he konga ki he kakai lalahi kei talavoú ʻi he ʻŪ Makasini ʻa e Siasí