Sa Digital Lamang: Mga Young Adult
Alang sa mga Misyonaryo nga Nanlimbasug sa Mental nga Kahimsog
Duha ka batan-ong mga hamtong mipakigbahin kon giunsa nila sa pagsolusyon ang ilang mga panlimbasug og mental nga kahimsog diha sa ilang mga misyon.
Ang usa ka full-time nga misyon mahimong usa ka nindot kaayo nga tinubdan sa mga panalangin—alang sa misyonaryo ug niadtong ilang giserbisyohan. Si Elder Richard G. Scott (1928–2015) sa Korum sa Napulog Duha ka mga Apostoles miingon:
“Ang usa ka misyon mohatag og talagsaon nga mga panalangin alang kaninyo karon ug sa tibuok ninyong kinabuhi. …
“… Ako mopamatuod nga ang mahalarong full-time nga misyonaryong serbisyo usa ka tinubdan sa dakong kalipay ug buhong nga mga panalangin” (“Karon Ang Panahon sa Pagserbisyo og Misyon!” Liahona, Mayo 2004, 90).
Apan ang usa ka misyon mahimo usab nga usa ka wala damhang malisud nga kasinatian. Si Presidente Thomas S. Monson (1927–2018) mitudlo: “Ang misyonaryo nga buhat malisud. Kini makapaluya sa mga kusog sa usa ka tawo, makapahago sa kapasidad sa usa ka tawo, kini magkinahanglan sa labing maayo nga paningkamot sa usa ka tawo. … Walay laing trabaho nga nagkinahanglan og mas taas nga mga oras o labing mahalaron o ingon nga sakripisyo ug kinasingkasing nga pag-ampo” (“That All May Hear,” Ensign, Mayo 1995, 49). Isip usa ka misyonaryo, ikaw naggahin sa tibuok adlaw uban sa usa ka tawo nga ikaw mahimo o dili mahimo nga magkauyon, ikaw magpadayon sa pagsinati og pagsalikway ug oposisyon, ug ikaw walay inadlaw nga mga kaharuhay sa panimalay ug duol sa mga minahal sa kinabuhi aron pagtabang kanimo nga mopadayon. Tanan niini nga mga bahin makahimo og kadaot sa imong mental ug emosyonal nga kahimsog isip usa ka full-time nga misyonaryo.
Walay duha ka mga hunahuna nga parehas, mao nga kon ikaw nakakita sa imong kaugalingon nga nanlimbasug, pakitambag uban sa Langitnong Amahan, sa imong presidente sa misyon, o sa imong kauban aron sa pagpangita og mga solusyon nga angay kanimo. Dinhi atong ipakigbahin ang mga kasinatian gikan sa duha ka batan-ong mga hamtong kinsa naghimo og solusyon sa ilang mga pakigbisug sa kakulba ug depresyon samtang nagserbisyo og full-time nga mga misyon.
Sa wala pa ako molarga sa akong misyon ngadto sa Pennsylvania, USA, misugod ako sa pagsinati og kakulba. Ang akong mga plano sa misyon giurong samtang ako milihok sa pagpangita og solusyon sa unsay akong gibati. Ang akong presidente sa misyon gusto kanako nga maanaa sa usa ka maayong mental nga kahimtang tungod kay ang mga misyon makapaaghat og daghang kaugtas ug kakulba.
Ako milihok sa pagpangita og solusyon sa akong mental nga kahimsog ug dayon milarga sa akong misyon human ako gihatagan og kalig-unan gikan sa usa ka magtatambag.
Ang tanan maayo hangtud nga miabut ako sa akong ikatulo nga dapit [area]. Gikan sa dili magkauyon sa akong kompanyon ngadto sa pagpanlimbasug sa pagpangita og mga tawo nga katudloan, ang akong kakulba migrabe pag-ayo hangtud sa punto diin ako maglisud sa pagbangon sa katre mabuntag. Ako dihay mga higayon diin gibati nako ang hilabihang kakulba nga hapit dili ako makaginhawa, ug nagsinati ako og minugbo nga kaugtas. Ako sa katapusan mikontak sa akong presidente sa misyon, kinsa mahigugmaong misugyot nga makigsulti ako ngadto sa mga magtatambag sa mental nga kahimsog sa misyon. Nakatabang ang pagpakig-istorya kanila, apan kini wala makaatiman og hingpit sa problema.
Unsa ang nakatabang sa pagsulbad sa problema mao ang mga himan ug ang mga pagbansay nga akong nakat-unan gikan sa pagpakigtambag. Ako migamit niini sa pagpalambo sa akong mental nga kahimsog. Kini wala makakuha sa hingpit sa akong kakulba, apan kini mihimo niini nga madumala igo nga makapadayon sa akong misyonaryo nga serbisyo.
Ania ang akong mga tambag alang sa pagdumala sa mga kakulba diha sa inyong misyon:
Pisikal:
Atimana ang imong kaugalingon! Ang pagbasa sa imong mga kasulatan ug pag-ampo makatabang sa imong espiritu nga mamaayo, apan kon ikaw nagkinahanglan nga mogahin og panahon sa imong kaugalingon kada adlaw sa pag-atiman sa kaugalingon (tingali atol sa mga panahon sa tingkaon o kon ikaw nag-andam sa pagtrabaho o sa pagkatulog), himoa kini nga prayoridad alang sa pagpalambo sa imong mental nga kahimsog.
Kon ikaw makahimo, buhata ang mga butang nga ikaw malingaw. Ikaw mahimo nga nagserbisyo sa Ginoo, apan ikaw mao ra gihapon nga pagka-ikaw! Pagsulat sa imong journal, pagdrowing, pagkanta, paminaw og musika, pakig-istorya ngadto sa imong pamilya ug mga minahal inig adlaw sa pagpangandam [preparation day], paghimo og sulat—paghimo og mga butang nga motabang kanimo nga mobati og kalinaw.
Pagsulat og lima ka butang nga ikaw mapasalamaton sa matag adlaw. Kini nga pagbansay sa tinuod makapausab sa imong pangutok nga mas mamaayo.
Hunahunaa ang pag-inom og tambal nga giaprobahan sa doktor kon gikinahanglan.
Pahibaloa ang imong kompanyon kon ikaw nakigbisug ug unsaon niya pagtabang kanimo.
Pagpraktis og yoga, pagpamalandong, o pagmabinantayon atol sa imong ehersisyo sa buntag o sa gabii.
Pakigsulti ngadto sa usa ka propesyonal nga magtatambag sa mental nga kahimsog kon ikaw nagkinahanglan.
Espiritwal/Mental:
Pagbaton og usa ka “bati” nga journal nga kasulatan sa imong tanan nga negatibong mga hunahuna ug mga pagbati ug mga kakulba, apan ayaw pagsige og hunahuna diha niini. Ang punto mao ang pagpahayag niini nga mga pagbati ug dayon mopadayon og lain nga mga buluhaton. Usahay makatabang ang pagkumot o paglaksi sa pahina human nimo nasulat ang imong mga pagbati; kini ingon og simbolo sa pagwagtang niadtong negatibong mga panghunahuna ug mga pagbati.
Pangayo og panalangin sa priesthood kon ikaw nagkinahanglan og dugang kalig-on.
Basaha kanunay ang imong patriyarkal nga panalangin.
Hatagi og importansya ang imong mga kalig-on, dili ang imong mga kahuyang.
Sukol sa negatibong panghunahuna! Basaha ang “Pag-adjust sa Kinabuhing Misyonaryo” alang sa dugang nga tabang.
Basaha ug pamalandungi ang pakigpulong sa kinatibuk-ang komperensya, ilabi na niadtong nagpunting sa mental nga kahimsog, sama sa kang Sister Reyna I. Aburto, “Sa Dag-um ug Kahayag, Ginoo, Ubani Ako!” (Liahona, Nob. 2019, 57–59) ug kang Elder Jeffrey R. Holland, “Sama sa Usa ka Sudlanan nga Nabuak” (Liahona Nob. 2013, 40–42).
Basa sa mga kasulatan, pamalandongi ang mga paagi ang mga propeta ug mga misyonaryo nakakaplag og kalig-on ug hugot nga pagtuo kon mag-atubang og kalisdanan.
Kining gagmay ug yano nga mga buhat adunay dako kaayong epekto sa akong abilidad sa pagserbisyo sa Ginoo uban sa akong tibuok kasingkasing, gahum, hunahuna, ug kusog. Ang pagpanlimbasug sa imong mental nga kahimsog walay angay nga ikaulaw, ug kanunay adunay paglaum pinaagi ni Jesukristo sa pagkakaplag og kalig-on, paglaum ug pagkaayo. Ang Langitnong Amahan naghatag kanato og daghang mga himan sa paghimo sa atong mga hunahuna, mga lawas, ug mga espiritu nga mahimsog. Kita kinahanglan lamang nga andam sa paggamit niini.
Faith Ferguson, Idaho, USA
Ako unang nakaatubang og depresyon sa katapusan sa akong misyon didto sa Habagatang Afrika. Lahi ang akong pagkamasulub-on. Mibati ako og kaguol, ang akong panglantaw dili kaayo positibo, ug ang akong hugot nga pagtuo natay-og. Dugang pa niana, ang akong mama nagkasakit, ug ang akong pamilya adunay ubang mga hagit. Nagpakaaron-ingnon ako nga ang tanan OK ra, apan kini dili. Usa ka higayon, ako dihay tanang matang sa kaugtas nga madala ra, ug ang sunod, dili na nako maagwanta. Ang akong mga hunahuna naghugno kanako, ug ang tanan ingon og batok kanako.
Nahubsan ako sa emosyonal ug mental nga paagi, busa nakahukom ako sa pagpuasa ug sa pag-ampo alang sa paggiya. Isip resulta, nakadawat ako og tulo ka piho nga mga pag-aghat:
Ang una mao ang pakig-istorya ngadto sa akong presidente sa misyon. Sa katapusan misulti mahitungod sa akong mga panglimbasug nakatabang kanako nga mobati og kaarang-arang ug nakahibalo nga ako wala mag-inusara.
Ikaduha, naawhag ako nga ang pagkat-on kabahin ni Jesukristo makatabang kanako ngadto niini. Samtang nagtuon ako mahitungod sa Langitnong Amahan ug sa Manluluwas, kini nahimong klaro ngari kanako nga Sila nahibalo sa akong kasakit ug mibati sa akong kaguol. Ako misalig diha Kanila alang sa kalig-on kon ako mobati nga ako wala niini.
Ang ikatulo nga pag-aghat miabut gikan sa usa ka kinutlo gikan ni Presidente Gordon B. Hinckley: “Ang pagserbisyo mao ang labing maayo nga tambal alang sa kalooy sa kaugalingon, kahakog, kawalay paglaum, ug pag-inusara” (Mga Pagtulun-an sa mga Presidente sa Simbahan: Gordon B. Hinckley [2016], 239.) Samtang naghatag ako og importansya sa gawas ug sa pagserbisyo sa uban, sa kadugayan gibati nako ang ka mas malipayon, mas masaligon, ug mas may pagsalig sa Langitnong Amahan.
Akong nahuman ang akong misyon, apan ang depresyon mibalik pag-usab sa akong unang pipila ka mga bulan sa unibersidad. Ako bag-o lamang mibalhin gikan sa Zambia ngadto sa Malaysia ug layo sa panimalay nga walay mga higala o pamilya nga anaa sa duol. Wala gani ako masayud asa magsimbahan ang akong branch.
Gihuptan nako ang paglaum ug gibati ang pag-aghat nga magpuasa ug mag-ampo na usab alang sa paggiya. Gikan niana, ako gigiyahan ngadto sa pakighigala sa usa ka batang babaye diha sa akong klase kinsa mitabang kanako sa pagpangita sa labing duol nga branch. Samtang naglakaw ako padulong sa chapel nianang unang Dominggo, akong gibati ang Espiritu Santo nga mikuha sa akong palas-anon gikan kanako. Ako nasayud nga ako makasunod sa makaayo nga mga lakang nga akong gigamit sa akong misyon. Usab, ako misulti ngadto sa akong mga lider sa Simbahan alang sa panabang, mituon sa kinabuhi ug sa mga pagtulun-an sa Manluluwas, ug dayon mipunting sa pagserbisyo sa uban. Ako nakakaplag og mga tawo nga ikaistorya ug katabangan, nakatabang sa uban diha sa eskwelahan, ug midawat og calling sa simbahan.
Nakakat-on ako og daghan mahitungod sa mental nga kahimsog gikan sa pagsinati og depresyon. Mahimong nagkapuliki kita og maayo nga dili makasusi sa atong mga kaugalingon o niadtong naglibut kanato, apan kita kinahanglan nga mosulti ngadto sa uban mahitungod sa atong mga panlimbasug––alang sa kaayohan sa atong mga kaugalingon ug alang sa ila. Sala, kamingaw, kasubo, kasagmuyo, ug kaguol sa kasingkasing makaapekto sa matag usa kanato sa emosyonal, mental, ug espiritwal nga paagi. Ang usa sa labing malisud nga mga bahin sa depresyon mao nga bation nimo nga layo gikan sa Dios.
Apan wala gayud kita mag-inusara. Kon kita nanlimbasug, makatutok kita sa pagduol ngadto kang Kristo, kay Siya makahimo sa mahuyang nga mga butang nga malig-on (tan-awa sa Ether 12:27).
Nasayud ako nga ang Dios nahigugma kanato ug nga kita Iyang mga anak. Kon kita mosalig diha ni Jesukristo ug mosunod sa Iyang mga sugo, kita mapanalanginan ug malig-on. Tungod Kaniya, ako nagdawat og kalig-on pinaagi sa Iyang Pag-ula ug nagpadayon sa pagtagamtam sa mga panalangin sa kalinaw ug kalipay.
Akasiwa Wamunyima, Malaysia