Nagtan-aw sa Imong Kaugalingon diha sa Pamahayag sa Pamilya
Septyembre 2020
Pagbutang sa Imong Kaugalingon diha sa Pamahayag sa Pamilya
Mga litrato gikan sa Getty Images
Samtang ang mga kahimtang sa matag pamilya lahi sa ubang paagi, “Ang Pamilya: Usa Ka Pamahayag ngadto sa Kalibutan” naglangkob og mahangturong mga baruganan nga naghatag og usa ka hingpit nga sumbanan nga tumngon samtang kita naningkamot nga makab-ut ang atong balaanong potensyal. Ang mosunod nga mga pahina naglakip og mga panabut nga makatabang kanato sa pagsabut sa dinasig nga mga baruganan diha sa pamahayag sa pamilya. Kon atong gamiton kadtong mga baruganan diha sa atong mga kahimtang kutob sa labing maayo natong mga abilidad, kita mapanalanginan samtang kita molahutay sa pagpadayon sa unahan padulong sa kinabuhing dayon.
1. Ang matag usa kanato kabahin sa mahangturong pamilya nga adunay usa ka balaan nga katuyoan
Bisan unsa pa ang hitsura sa atong yutan-on nga pamilya, ang matag usa kanato “hinigugmang espiritu nga anak nga lalaki o babaye sa langitnong mga ginikanan” kinsa nahigugma kanato. Isip kabahin niining mahangturong pamilya, ang atong balaan nga katuyoan mao ang “paglambo ngadto sa kahingpitan ug sa katapusan makakab-ot sa [atong] walay katapusan nga kapalaran ingon nga mga manununod sa kinabuhing dayon.” (Gawas kon gipahibalo, ang mga kinutlo nagagikan sa “Ang Pamilya: Usa Ka Pamahayag ngadto sa Kalibutan.”)
Kitang tanan adunay diosnong kinaiyahan ug kapalaran
“Ang Espiritu gayud mao ang magapanghimatuod uban sa atong espiritu, nga kita mga anak sa Dios:
“Ug nga kon kita mga anak, nan mga manununod diay kita; mga manununod sa Dios, ug isigkamanununod uban kang Kristo” (Mga Taga-Roma 8:16–17).
2. Ang atong mortal nga pamilya nagtabang kanato sa pagkab-ot sa atong mahangturong kapalaran
Ang Dios mihatag kanato og mga pamilya sa pagtabang kanato nga makakat-on ug motubo samtang maningkamot kita sa “paglambo ngadto sa kahingpitan” ug makapanunod sa kinabuhing dayon. “Ang pamilya mahinungdanon ngadto sa plano sa Tiglalang,” ug bisan tuod walay pamilya nga hingpit, ang Dios makatabang kanato sa paglambo uban sa pamilya nga kita aduna.
Ang akong pamilya igo na sa Iyang mga katuyoan
Ni Miranda Gaubatz, Utah, USA
Ang akong pamilya dili ang unsay matawag nimo nga “sulundong” pamilya. Ang akong mga ginikanan nagbulag sa dihang ako 11 anyos, busa ako gipadako sa usa ka kugihan, maunungong walay bana nga inahan. Akong gibati nga kami lahi kaayo diha sa miting sa sakrament.
Isip usa ka tin-edyer, ako nakahinumdom nga namati sa usa ka leksyon sa “Ang Pamilya: Usa ka Pamahayag ngadto sa Kalibutan,” natandog ang pagbati samtang naminaw ako sa usa ka lider sa kabatan-onan nga nagpamatuod kabahin sa pamilya ug nakaangkon sa akong kaugalingong pagpamatuod nga ang akong gamay nga pamilya balaanon nga gitugot ug makahatag sa tanan nga akong gikinahanglan sulod niining mortal nga kinabuhi.
Bisan niana nga kahibalo, ako nahadlok sa pagtambong sa gikinahanglang klase nga Mahangturong mga Pamilya pipila ka tuig ang milabay didto sa Brigham Young University. Dili ako gustong motambong og mga klase nga makadungog mahitungod sa akong “layo nga mahimong sulundon” nga pamilya. Apan ang akong propesor misugod sa among unang klase uban niini nga pamahayag: “Nagsangyaw kita sa sulundon apan nagpuyo kita sa kalibutan ug nagsalig sa Pag-ula sa Manluluwas sa pagdugang sa kakulangan.”
Ako nahibalo nga ang pamilya mahinungdanon ngadto sa plano sa Langitnong Amahan. Bisan ang mga pamilya nga layo nga mahimong sulundon, sama sa akong nasinati isip usa ka tin-edyer, makatabang kanato sa pagkat-on ug paglambo. Ang Manluluwas Mismo gipadako sa usa ka yutan-ong ama-ama. Mapasalamaton kaayo ako nga si Jesukristo makadawat sa atong “dili sulundon” nga mga pamilya ug makahimo niini nga igo sa pagtuman sa Iyang mga katuyoan alang kanato.
3. “Ang pamilya” mahimong nagpasabut og labaw pa kay sa mga ginikanan ug mga bata lamang
Adunay daghang mga relasyon sa pamilya nga mahimong sagrado nga mga pagkatinugyanan. Igsoong mga lalaki, mga babaye, mga iyaan, mga uyoan, mga ig-agaw, mga ugangan, mga bayaw, ug uban pa makahimo sa pag-impluwensya sa talagsaong paagi. “Ang uban nga mga kapamilya kinahanglan nga motabang kon gikinahanglan.” Ang pagpalambo niining mga koneksyon sa pamilya makadala sa gikinahanglan nga suporta ug makahimo og bililhon nga mga relasyon.
Ikaw makapanalangin sa imong pamilya sa daghang mga tahas
Ni Sister Sharon Eubank, Unang Magtatambag sa Kinatibuk-ang Kapangulohan sa Relief Society
Ang mga kasulatan puno sa mga ehemplo sa matarung nga mga lalaki ug babaye kinsa mihimo og importanting kalainan diha sa mga kinabuhi sa ilang kapamilya. Si Abraham nakapausab sa kinabuhi ni Lot isip iyang uyoan. Si Jose sa Ehipto miluwas sa iyang mga igsoong lalaki ug sa ilang mga pamilya. Isip mga hamtong, ang managsoong Maria ug Marta mipanalangin sa usag usa ug sa ilang igsoong lalaki nga, si Lazaro. Si Ruth, isip usa ka umagad nga babaye, misuporta ni Noemi ug niana mahangturong napanalanginan agi og balos sa tambag ni Noemi. Si Elisabet ug Maria misuporta sa usag usa isip mga ig-agaw sa mga hagit nga nagpalibut sa ilang mga pagmabdos. Bisan si Zoram, kinsa dili kadugo, ingon ka matinud-anon nga suporta ngadto ni Nephi nga siya ug ang iyang mga anak gisagop sama og sila pamilya. Kining malukpanong pagtan-aw sa pamilya importante kaayo ngadto sa kadaghanan kinsa adunay daghan kaayong ikahatag apan mibati nga walay koneksyon tungod kay sila walay sukaranang pamilya nga gusto nila.
4. Ikaw makahimo og kalainan diha sa pagsugod o sa pagpahiuli og mahangturong pamilya
“Ang sagrado nga mga ordinansa ug mga pakigsaad nga anaa sa balaan nga mga templo naghimo niini nga posible alang sa tagsa-tagsa sa pagbalik ngadto sa presensya sa Dios ug alang sa mga pamilya nga magkahiusa sa kahangturan.” Sa kaalaot, usahay ang mga kaminyoon magbulag, ang mga pamilya mabungkag, o ang mga sumpay sa kadena sa mahangturong pamilya mabugto. Pinaagi niining “sagradong mga ordinansa ug mga pakigsaad,” kini “posible alang sa tagsa-tagsa sa pagbalik ngadto sa presensya sa Dios” bisan unsa pa ang mga kahimtang sa ilang pamilya. Uban sa panabang sa Dios, ang paghimo ug pagsunod sa sagradong mga pakigsaad kutob sa labing maayo nga mahimo sa imong abilidad makatabang kanimo sa pagmugna, pag-ayo, o paglig-on sa imong pamilya, sa mga paglaom nga usa ka adlaw maghiusa kanila sa kahangturan.
5. Ang kaminyoon usa ka panag-uban nga nagkinahanglan og hugot nga pagtuo ug pag-ampo
Ang pamahayag sa pamilya nagpamatuod nga ang mga bana ug mga asawa “adunay katungdanan sa pagtabang sa usag usa ingon nga magkauban.” Apan ang pagkahimong tinuod nga magkauban sa kaminyoon mahimong usa ka hagit. Ang atong pagmatuto, kultura, edukasyon, pinansyal nga mga kahimtang, mga kasinatian, ug daghan pa makaapekto kon unsaon nato pag-atubang ang mga relasyon ug unsaon nato pagdumala ang atong mga pamilya. Ang pamahayag nagtudlo nga “ang malampuson nga mga kaminyoon ug mga pamilya” natukod pinaagi sa hugot nga pagtuo, pag-ampo, paghinulsol, pagpasaylo, pagtahud, gugma, ug ubang mga baruganan nga samtang kita magtinambagay ug magtinabangay sa pagtubag sa atong tagsa-tagsa nga mga kahimtang.
6. Ang potensyal sa pagkaginikanan kabahin sa plano sa Dios aron mahimong sama Kaniya
Usa sa mga paagi nga kita mahimong mas mahisama sa atong langitnong mga ginikanan mao ang pinaagi sa pagsinati sa pagkaginikanan sa atong mga kaugalingon mismo. “Ang unang sugo nga gihatag sa Dios ngadto ni Adan ug Eva mao ang posibilidad alang kanila isip bana ug asawa nga mahimong mga ginikanan,” Samtang ang pagminyo ug pagbaton og mga anak dili kanunay mahitabo sumala sa atong mga plano, kana wala magpasabut nga dili kini kabahin sa plano sa Dios. Alang sa kadaghanan kanato, ang pag-andam uban sa hugot nga pagtuo ug paghulat sa Ginoo usa ka importante nga bahin sa unsay gusto sa Ginoo kanato nga mamahimo.
Dili Makaanak ug ang Among Pamilya sa Ward
Ni John McMullin, Alberta, Canada
Ang akong asawa, si Gennie, ug ako gusto kanunay og daghang mga bata. Kanunay. Apan human sa usa ka tuig nga pagpaningkamot, among nahibaloan ang medikal nga kahulugan sa dili makaanak.
Sa una, dihay daghang mga pag-ampo. Matag gabii kami maggunitay sa mga kamot ug mohangyo sa Langitnong Amahan sa pagpanalangin kanamo og anak nga among gipangandaman sulod sa among tibuok nga mga kinabuhi. Nagpuasa kami matag bulan, usahay sobra pa. Sa matag bulan nga kami dili momabdos mas malisud pa gani. Dili lamang nga walay bata nga among higugmaon, kini ingon og walay tubag sa among mga pag-ampo. Kini ingon og ang Dios nakadungog kanamo nga nangayo alang sa unsay among gusto sa tibuok namong mga kinabuhi, ug Siya miingon nga dili.
Misugod kami sa pagduha-duha sa among katakus. Sayon kini sa pagtuo nga Iyang gitagana ang Iyang espiritung mga anak nga matawo ngadto sa mas matinud-anong mga panimalay.
Ang pagtambong sa simbahan nahimong malisud. Malisud ang pagpaminaw mahitungod sa pag-ampo sa uban nga gitubag, ug unsa ka dako sa gugma sa Langitnong Amahan kanila.
Duha ka mga butang ang nakatabang kanamo nga magpadayon. Una, mihimo kami og mga pakigsaad ngadto sa Ginoo ug sa usag usa sa dihang kami gi-seal didto sa templo. Kami iya sa usag usa, ug nakahukom kami nga mag-uban sa karon ug sa mga kahangturan.
Ang ikaduha mao ang among pamilya sa ward. Napanalanginan kami og mga lider kinsa personal nga nakasinati og dili makaanak. Si Gennie dihay usa ka tigpangalagad nga sister kinsa nakasinati usab og dili makaanak ug dayag nga nakigsulti mahitungod sa mga kalisud sa walay anak diha sa simbahan. Kami nanlimbasug, apan nahibalo kami og uban diha sa komunidad sa among Simbahan nga nakigharong sa samang panlimbasug.
Sa gihapon kami walay daghang mga tubag. Sa gihapon kami walay mga anak, bisan human sa pagtabang sa mga doktor. Wala kami masayud sa mga katarungan sa Langitnong Amahan, apan tungod kay kami adunay mga pakigsaad, ug tungod kay kami adunay usa ka pamilya sa ward nga midawat ug misuporta kanamo, kami dihay panahon sa pagpalambo og dugang pailub ug hugot nga pagtuo (tan-awa sa Mga Hebreohanon 12:12–13).
Kami naghinam-hinam nga mahimong mga ginikanan. Ug samtang kami naghulat alang nianang malipayon nga adlaw, kami adunay usa ka dapit nga masakop dinhi sa Simbahan.
7. Ang gahum sa paglalang og kinabuhi gihatag ug gibantayan sa Dios
Diha sa pamahayag, ang mga Apostoles sa Ginoo “mopamatuod sa pagkabalaan sa kinabuhi.” Tungod kay ang kinabuhi sagrado, ang Dios naghatag og mga sugo kalabut sa paghatag ug pagkuha sa kinabuhi. Giunsa nato pagtahud kana nga gahum adunay malungtarong mga epekto alang sa kaayohan o kadautan sa atong mga kaugalingon ug sa katilingban.
8. Ang responsibilidad sa ginikanan hinatag sa Dios
Sa pagtabang kanato nga mahimong sama Kaniya, gihatagan sa Dios ang daghan kanato sa oportunidad ug responsibilidad sa pagkaginikanan. Kita may tulubagon ngadto Kaniya “sa pagtuman niini nga mga kapangakohan.” Apan kita makasalig usab sa Iyang panabang sa pagpangita og kalipay ug kalampusan sa kaminyoon ug kinabuhi sa pamilya samtang kita naningkamot sa pagmatuto sa atong mga anak diha sa paghigugma ug pagkamatarung ug sa pagsuporta kanila diha sa ilang mga hagit.
9. Kita makapanalipod sa plano sa Dios alang sa Iyang pamilya
Gikan pa sa sinugdanan sa kalibutan, kini ang atong tahas nga magpasiugda sa plano sa Amahan alang sa Iyang pamilya ug sa pagpanalipod niini batok sa pagkabungkag gikan sa sulod ug sa mga pagpang-atake gikan sa gawas. “Kami nagtawag sa may responsable nga mga lumulupyo ug mga opisyal sa gobyerno bisan asa sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya isip sukaranan nga yunit sa katilingban.” Ang pagsabot kon ngano ug giunsa mahinungdanon kaayo.