Sa Digital Lamang: Mga Young Adult

Sa Katapusan Ako Miangkon Nga Ako Adunay Depresyon. Si Kristo Mitabang Kanako Pagpagawas gikan sa Sobrang Kaguol

Ni Nephi Tangalin

Akong gilimud sulod sa dugay nga panahon nga ako nagkinahanglan og tabang, apan ang Manluluwas mihatag kanako sa paglaum ug kahayag nga akong gikinahanglan.

Ang sobrang kaguol ingon og miabut nga wala damha. Misugod ako sa pagbati og kakulba ug sobrang kaguol mahitungod sa wala masulbad nga mga problema sa akong kinabuhi. Ako nawad-an og pagsalig sa akong kaugalingon, ako misugod sa pagduhaduha sa akong tinuohan, ug ang lista nagpadayon. Bisan og kini gamay nga mga kalisud mahimong dako, ug ang akong maayo nga kinabuhi nahimong makuyaw kaayo.

Akong gibati nga ingon og nakig-away og mga panulay sulod sa akong hunahuna.

Ang sobrang kaguol ingon og mitabon kanako. Ug samtang kini nga mga pagbati kanunay nga nagkagrabe, misugod ako sa pagpangutana sa akong kaugalingon og mga butang sama sa, “Unsa kaha kon mawala na ako dinhi? Ang mga tawo kaha mabalaka?” Ug ang mga panulay sa akong hunahuna motubag, “Ikaw abug lamang diha sa tibuok kalibutan. Gani walay bisan usa nga makamatikod kon ikaw mawala na.”

Kini nga mga hunahuna nakapahiugnok kanako uban sa kahadlok.

Apan samtang kanunay akong nag-atubang niini diha sa akong hunahuna, normal akong milihok. Nakigsulti ako ngadto sa akong pamilya sama og ang tanan maayo ra—tungod sa kahadlok, akong gitago ang akong mga pagbati gikan sa uban. Akong gibati ingon og dili ako makapakigbahin kon unsa kakuyaw ang akong hunahuna.

Dinha usab ako sa paglimud nga sa tinuoray adunay butang nga sayop. Gisultihan nako ang akong kaugalingon nga ako dili makabaton og depresyon. Dili ako gusto nga moangkon niini nga ako nagkinahanglan og tabang. Nahadlok kaayo ako nga kon ang mga tawo mahibalo unsay akong gihunahuna ug gibati, sila mosalikway kanako o maghunahuna nga ako huyang o buang. Akong gibati ang hilabihang kaulaw sa pagkadili makagawas sa sobrang kaguol.

Sa Katapusan Ako Miangkon nga Nagkinahanglan Ako og Tabang

Ako mipadayon nga ingon niini hangtud usa ka adlaw, akong nakaplagan ang kahupayan gikan sa mga pulong ni Elder Jeffrey R. Holland. Siya miingon: “Kon kamo may appendicitis, ang Dios nagpaabut nga kamo mangayo og panalangin sa pagkapari ug magpa-check up sa pinakamaayong doktor. Mao usab sa mga problema sa emosyon. Ang atong Amahan sa Langit naglaum kanato sa paggamit sa tanang talagsaong mga gasa nga Iyang gihatag niining mahimayaong dispensasyon” (“Sama sa Usa ka Sudlanan nga Nabuak,” Liahona, Nob. 2013, 41).

Kining makapatandog nga mensahe mitabang kanako sa katapusan sa pagdawat nga ako nagsinati sa tinuoray og mental nga sakit ug nga dili ikaulaw ang pagkinahanglan og tabang. Labing importante, napahinumduman ako nga ako dili huyang ug nga ako mahimong mamaayo.

Nianang gabhiona, ako namulong sa labing sinsero nga pag-ampo nga sukad akong nasulti sa akong kinabuhi. Nagbakho, nagpaubos ako sa akong kaugalingon ug gibu-bu ang akong kasingkasing ngadto sa Langitnong Amahan. Nangayo ako Kaniya og giya nga masayud unsay kinahanglan nakong buhaton.

Human niana nga pag-ampo, gibati nako ang pag-aghat nga makigsulti ngadto sa akong bishop. Siya mabination ug masinabtanon—wala ako magpaabut og bisan unsa nga kulang. Ug dihadiha dayon mitabang siya kanako nga mobati og kalinaw ug dako nga kahupayan gikan sa akong mahigugmaong Amahan sa Langit. Mitabang siya kanako nga makahibalo nga ang Manluluwas misabut sa tanan nga akong gisinati, bisan og wala nako masabti ang tanan sa akong kaugalingon mismo. Siya usab mitabang kanako sa paggamit sa mga himan nga akong gikinahanglan.

Paggamit sa Tanang mga Himan sa Dios

Akong nakat-unan nga ang mga isyu sa mental nga kahimsog mapagaan pinaagi sa hugot nga pagtuo ug sa makaayo nga gahum ni Jesukristo, sa tinuod, apan kana nga pagkaayo usahay nagkinahanglan nga madugangan og ubang mga kapanguhaan usab. Akong gibati ang kalig-on ug paglaum ug kahayag nga miabut gikan sa espiritwal ug temporal nga mga himan. Aniay pipila ka mga gibuhat nga nagdala og kahayag ngadto sa akong kinabuhi sa matag adlaw nga mahimo usab ninyong sulayan:

1. Sugdi ug tapusa ang imong adlaw uban sa sinsero nga pag-ampo—pangutana og piho nga mga pangutana, tinguhaa ang paggiya, ug ipahayag ang pasalamat.

2. Hibaloi ug dawata nga OK kini nga maguol ug mohilak usahay, ayaw lamang itugot ang kasubo nga molamoy kaninyo! Pakigsulti ngadto sa usa ka kasaligan nga higala o minahal sa pagtabang og bayaw kanimo sa malisud nga mga adlaw.

3. Kon ikaw matulog sa gabii, pagmapasigarbuhon sa imong kaugalingon nga nakalabang ngadto sa laing adlaw! Pahinumdumi ang imong kaugalingon nga ikaw lig-on.

4. Basa og mga kasulatan ug mga pakigpulong sa kinatibuk-ang komperensya o gani makapabayaw nga pagtabang sa kaugalingon nga mga basahon aron pagbaid sa imong hunahuna ug sa imong hugot nga pagtuo diha ni Jesukristo.

5. Sulti ngadto sa imong kasaligan nga mga higala, sakop sa pamilya, o sa imong bishop alang sa suporta. Makatabang siya kanimo sa pagpangita og usa ka magtatambag kon gikinahanglan.

6. Hibaloi nga walay sayop sa pagpangita og propesyonal nga tabang! Ang mga propesyonal mahimong makatabang og maayo sa pagkat-on sa pagbuntog ug pagdumala sa mga panlimbasug og mental nga kahimsog. Ang pagpahimulos sa walay bayad nga programa sa pagtambag didto sa akong unibersidad hilabihan kaayong nakatabang kanako.

7. Ayaw og kaulaw sa pagkunsulta og doktor o sa pag-inom og panguntra sa depresyon [antidepressant] nga mga tambal—kini mga himan nga gihatag sa Langitnong Amahan alang kanato nga mamaayo.

8. Pagbuhat og family history ug buhat sa templo aron sa pagtabang kanimo sa paghinumdom nga ang uban nga atua lapas sa tabil nag-ampo usab alang sa imong pagkaayo! Ang pakigpulong ni Elder Dale G. Renlund, “Buhat sa Family History ug sa Templo: Pagsilyo ug Pagkaayo” naghatag og dugang nga panabut ngadto sa gisaad nga mga panalangin sa paghimo sa buhat sa templo.

Paghupot Sa Kahayag ni Kristo

Dugay na kaayo ako wala maghunahuna nga kini posible nga makadungog sa tingog sa Espiritu o makabati sa gugma sa Dios taliwala sa depresyon. Gibati nako nga ako kanunay naglutaw diha sa bung-aw sa kangitngit. Apan usa ka gamay nga kahayag gikan sa Manluluwas mitabang kanako sa paghupot og paglaum. Ug pinaagi sa pagsulti mahitungod sa akong mga panlimbasug, akong nahibaloan nga daghan usab sa akong mga higala nagsinati og mga panlimbasug sa mental nga kahimsog––ug kami nagtinabangay sa pagpasalig sa usag usa nga kami wala mag-inusara.

Kinsa ako sa wala pa ako mangayo og panabang sa Langitnong Amahan ug kinsa ako karon duha ka managlahi kaayo nga mga tawo. Dili unta ako makabaton og hugot nga pagtuo ug pagpamatuod nga ako karon aduna diha ni Jesukristo kon dili pa tungod niana nga panahon sa sobrang kaguol nga akong nasinati. Ako labaw ka mapasalamaton alang sa kahayag nga Iyang gidala ngari sa akong kinabuhi nga nagtabang kanako sa pagbuntog sa mga panulay ug sa mga kahadlok diha sa akong hunahuna. Ako nasayud nga Siya nag-antus alang sa tanan natong mga kasakit ug nga Siya nakasabut sa eksakto kon unsay atong gisinati (tan-awa sa Alma 7:11–14) ug uban Kaniya, kita kanunay makahupot ngadto sa paglaum ug sa kahayag.

Si Nephi Tangalin nagpuyo sa Pilipinas. Siya sa pagka-karon usa ka estudyante sa creative writing ug nagserbisyo isip sekretarya sa Young Women sa iyang ward. Ang iyang kinabuhi nasentro sa mga basahon, mga litrato, dibuho [painting], ug mga salida. Naglaum siya nga motrabaho sa telebisyon o pelikula sa umaabut.

Pagdiskobre pa og Daghan

Makakaplag ka og daghan pa nga mga artikulo mahitungod sa mental nga kahimsog diha sa batan-ong mga hamtong [young adult] nga seksyon sa Septyembre 2020 nga Liahona.

Susiha ang YA Matag Semana, nga makit-an sa seksyon sa mga Young Adult sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kang mosumiter sa imong kaugalingon nga mga istorya, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kanimo!