Sa Digital Lamang: Mga Young Adult

Ako Mipili nga Magpakabuhi. Ania Unsaon Nimo Pagtabang ang Usa ka Tawo nga Magpakabuhi Usab

Ni Shantelle Avery

Nakigbisog ako sa depresyon ug sa mga hunahuna nga maghikog. Ug ania ang mga paagi ang mga tawo sa tinuoray mitabang kanako nga magpakabuhi.

Mubo nga sulat sa editor: Ang paghikog mao ang usa ka malumo ug sensitibo nga hilisgutan diha sa mga indibidwal ug mga pamilya bisan asa. Kini nga tagsulat naghatag og mga sugyot kon giunsa sa uban pagtabang kaniya sa pakigbatok sa iyang bugno sa depresyon ug mga hunahuna sa paghikog. Bisan tuod og kini nga mga sugyot makatabang sa pagpangalagad niadtong kinsa nakigbisog, kini importanting hinumduman kanunay nga kon ikaw nawad-an/napakyas og usa ka tawo nga imong gimahal ngadto sa paghikog, ikaw dili mabasol.

Katorse ka higayon.

Katorse ka mga higayon mao ang gidugayon sa panahon sa usa ka butang nga kalit mosulod sa akong utok, makapahunahuna kanako nga ako dili makaagwanta. Matag usa niini nga mga higayon masakit, apan puno sa mga milagro nga makaluwas sa kinabuhi.

Ang usa sa labing sagad nga ipangutana sa mga tawo kon ilang mahibaloan ang akong pakigbisog mao, “Unsay akong mabuhat aron sa pagtabang?” Sa paningkamot sa pagtubag niini nga pangutana ug sa pagtabang sa uban sa ilang mga paningkamot sa pagpangalagad, gusto nakong ipakigbahin kini nga lista sa 14 ka labing makatabang nga mga butang nga nahimo sa mga tawo alang kanako nga naghatag kanako og kalig-on nga magpakabuhi.

1. Susiha dayon ang ilang kahilwasan. Kon ako mangayo og pakitabang, ang mga tawo nagtubag dihadiha dayon pinaagi sa mga pagpangutana sama sa: “Nag-inusara ka ba sa pagkakaron?” “Naghunahuna ka bang mobuhat og usa ka butang?” “Mahimo bang makig-istorya ako kanimo?” Kini nga mga pangutana makahimo kanila sa pagtimbang-timbang kon unsa ang nanghitabo ug sa paghukom kon sila kinahanglan ba nga motabang.

2. Siguroha nga wala sila mag-inusara. Ang pag-inusara makahimo lamang og mga hunahuna ug mga pagbati nga mosamot ka grabe hangtud nga kini ingon og dili na maagwanta. Sa akong huyang nga mga higayon, ang pamilya ug mga higala mitabang, pinaagi sa pag-ari sa akong balay aron sa pakig-istorya kanako o sa pagkuha kanako aron mokuyog kanila.

3. Pahayag og gugma. Ang tulo ka yanong mga pulong, “Gihigugma ko ikaw” nag-ingon, “Ako nagkinahanglan kanimo ug gusto nga magpakabuhi ka. Kon ikaw mawala, ako masakitan, busa palihug hupot lang.” Kadto nga mga pulong naghatag kanako og kalig-on ug nagdugang sa akong abilidad sa paglahutay.

4. Saari sila nga kini mahimong maarang-arang. Sa akong labing malisud nga panahon, hingpit akong nabutaan sa depresyon. Ang usa ka tawo nga nagpahinumdom kanako nga adunay paglaum, nga unsay akong gibati karon nga panahon dili maoy unsa ang akong bation sa hangtud, naghatag kanako og usa ka butang nga kahuptan pag-usab. Dili nako masabtan nga bisan unsang butanga mahimong posible nga maarang-arang, apan ako makasalig sa paglaum sa uban.

5. Paghatag og mainiton nga mga gakos. Kana nga matang sa pisikal nga kasuod naghatag og dihadiha dayon nga kahupayan sa akong nagngutngot nga kasingkasing. Gibati nako nga luwas diha sa paggakos sa uban ug ang makabuntog nga kaguol ug kahadlok mahupay sulod sa mubo nga higayon.

6. Tabangi sila sa pagtubag sa ilang pisikal nga mga panginahanglan. Sa dihang ang tanan sa akong kalibutan ingon og nahugno, ang pagtubag sa akong mga panginahanglan malisud. Ang akong bana naghimo kanako og pagkaon, nagpahinumdom kanako sa pag-inom og tubig, ug nagtabang kanako sa pagbuhat unsay gikinahanglan alang sa maayong pagkatulog sa gabii. Kining nag-unang mga panginahanglan direkta nga nagtabang sa pag-amuma alang sa imong mental nga kahimsog.

7. Balika, “Dili ako mohunong sa paghigugma kanimo. Ikaw wala maghasol kanako.” Niadtong labing malisud nga mga panahon, gusto kong madungog pa nga dili mawala kanako ang matag usa nga naglibut kanako pinaagi sa pagpangayo og panabang.

8. Kinahanglan nga anaa ka sa pagpaminaw ug sa pakig-istorya. Kon ako gilibutan sa kangitngit, adunay milyon ka mga hunahuna nga nagtuyok-tuyok sa akong alimpatakan. Usahay ang pakig-istorya nagtugot kanako sa pag-ila nga kadto nga mga hunahuna walay hinungdan. Sa ubang higayon, kini anaa sa mga tubag sa uban nga akong makaplagan ang katin-awan ug kalinaw.

9. Pahinumdumi sila nga gikinahanglan lamang nila ang pagtagad sa mga butang sa tinagsa tagsa ug sa hinayhinay. Kon ako nasobrahan og kaguol, dili ako makapabilin sa kasamtangan nga panahon bisan unsaon pa nako sa pagpaninguha. Ang tanan nga akong kinahanglang buhaton sa umaabut magdungan og sulod sa akong hunahuna. Ang pagkaadunay usa ka tawo nga magpahinumdom kanako sa pagbuhi sa tanan niadtong mga butanga naghupay sa pipila niana nga mga kaugtas.

10. Pasaara sila kanimo nga sila mopabilin ug mopadayon sa pagtabang. Gamhanan ang mga saad. Ang pagsulti og kusog, “Ako mosaad nga dili ako mobuhat og bisan unsa nga butang” nagdala og dili katuohan nga kalig-on. Kini sa tinuod malisud kaayo ang pagsulti niadto nga mga pulong diha sa labing malisud nga mga higayon, apan kon kini akong isulti, ako nahibalo nga kinahanglan akong mohupot gayud. Ako nasayud nga ako dili makalapas sa akong saad.

11. Tabangi sila nga makakuha sa pisikal, emosyonal, propesyonal, ug espiritwal nga tabang nga ilang gikinahanglan, lakip ang pagpangayo og panalangin sa pagkapari, sa pakigmiting sa ilang bishop, pakigkita og usa ka doktor o magtatambag, o sa pag-adto sa ospital, kon gikinahanglan.

12. Ipakigbahin ang imong pagsalig diha kanila. Usa ka tawo kausa miingon ngari kanako, “Ikaw nakasinati na sa makadaghang panahon og labing mapait kaniadto, ug ikaw nakabangon sa matag higayon. Makahimo ka niana pag-usab.” Laing higala kausa mipasalig kanako, “Ikaw walay bisan unsa nga buhaton. Makahimo ka niini.” Ang ilang pagsalig kanako naghatag kanako og kalig-on. Kini nagtabang kanako sa pag-ila nga ako mas lig-on kay sa depresyon.

13. Pahinumdumi sila nga ikaw magmasulub-on kon mawala sila. Nakatabang kini kanako sa paghunahuna gawas sa akong kaugalingon ug sa paghinumdom niadtong akong gihigugma pag-ayo ug unsa sila ka masakitan kon ako mawala na.

14. Tabangi sila sa pag-ila nga ang pagkaayo posible sa kanunay. Ang usa sa labing makapahupay nga mga butang nga nasulti sukad sa usa ka tawo ngari kanako mao, “Wala ka kaayo mahilayo. Ikaw dili kaayo mahilayo kon ania pa gihapon ikaw dinhi.” Naghunahuna ako niana kasagaran karon, ilabi na kon ang mga bakak sa akong hunahuna nagsulti kanako nga ako hilabihan sa ka dautan nga dili na mamaayo.

Samtang ang katapusang pipila ka mga tuig misulay sa akong hugot nga pagtuo ug mihasol sa akong kalag, ako usab nakakita og mga milagro. Ang akong kinabuhi nausab pinaagi sa dili maihap, gamhanang mga ehemplo nga akong nakita sa “pagbangutan uban niadto nga nagbangutan … ug sa paghupay niadto nga nagkinahanglan sa kahupayan” (Mosiah 18:9). Nakabaton ako og kalooy ug pagsabut samtang ang akong mga mata naabli ngadto sa ubang mga hagit ug samtang ako nakig-uban sa ilang mga kaguol sa maanindot nga mga paagi. Mokuha ako og paglaum diha sa mga pulong ni Sister Reyna I. Aburto, “Magpamatuod ako kaninyo nga ‘sa dag-um ug kahayag,’ ang Ginoo magauban kanato, nga ang atong ‘mga kasakit [mahimo nga] mabuntog diha sa hingpit nga kalipay ni Kristo,’ ug ‘nga pinaagi sa grasya nga kita maluwas, human sa tanan nga atong mabuhat’” (“Sa Dag-um ug Kahayag, Ginoo, Ubani Ako!” Liahona, Nob. 2019, 59).

Akong nasaksihan ang makaayo nga gahum ni Jesukristo nga naglihok diha sa akong kinabuhi, naghatag kanako og kalig-on sa paglahutay ug abilidad sa pagpangita sa makaayo. Mahimo nga ikaw ang tawo nga motabang og usa ka laing tawo nga makakaplag niana nga kalig-on nga magpabilin.

Si Shantelle Avery usa ka mahalaron nga asawa ug mama nga anaa ra sa panimalay. Malingaw siya sa paggansilyo, pagkat-on ug pagbansay og potograpiya, ug paglakaw diha sa matahum nga kabukiran sa amihanang Idaho kauban sa iyang bana ug duha ka batan-ong mga anak. Iyang nakaplagan ang importanting katuyoan ug kalig-on sa pagpakigbahin sa iyang mga panlimbasug sa depresyon diha sa paningkamot sa pagtabang sa uban.

Unsay Akong Mahimo?

Kon ikaw nakaila og usa ka tawo kinsa nanlimbasug sa depresyon, tabangi ug itanyag ang imong suporta. Makakat-on ka usab og dugang pa diha sa Church’s suicide prevention nga website.

Pagdiskobre pa og Daghan

Makakaplag ka og daghan pa nga mga artikulo mahitungod sa mental nga kahimsog diha sa batan-ong mga hamtong [young adult] nga seksyon sa Septyembre 2020 nga Liahona.

Kini nga video sa Makapadasig nga Mensahe nagtubag sa mga isyu sa pagpugong sa paghikog, pag-istorya kalabut sa usa ka batan-ong lalaki kinsa mipili nga magpakabuhi.

Susiha ang YA Matag Semana, nga makit-an sa seksyon sa mga Young Adult sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kang mosumiter sa imong kaugalingon nga mga istorya, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kanimo!