Kami Mibarug sa atubangan sa Parlyamento
Ang akong bana ug ako nagpuyo sa New Zealand sa 2012 sa dihang nagdebate ang Parlamento og usa ka balaodnon nga usbon ang pagpatin-aw sa kaminyoon ug sa pamilya. Among gibasa ang balaodnon ug nabalaka mahitungod sa unsa ang epekto niini sa kagawasan sa relihiyon ug sa kabalaan sa pagkainahan, pagkaamahan, ug sa kaminyoon.
Isip kabahin sa proseso, gidapit sa Parlamento ang tanan sa nasud sa pagpadala sa ilang mga opinyon mahitungod sa gisugyot nga balaodnon. Kami nasayud nga ang doktrina sa Ginoo sa kaminyoon ug pamilya tataw niini nga isyu, ug gibati namo nga kami kinahanglan nga mosulti. Kami nakabantay og usa ka kahon diha sa porma nga among mabutangan og tsek kon kami andam nga mobarug sa atubangan sa Parlamento aron sa pagpanalipod sa among baruganan. Ang akong bana ug ako nagtinan-away sa usag usa ug miingon, “Butangan nato og tsek ang kahon!”
Nakadawat kami og tubag pipila ka bulan ang milabay nga kami napili nga morepresentar sa atubangan sa usa ka komite sa Parlamento. Human sa daghang pag-ampo ug pagpuasa, ang akong bana mibati nga gigiyahan sa pagpakigbahin og mga hunahuna gikan ni Elder Dieter F. Uchtdorf,1 ug mibati ako og kusog nga pag-aghat sa pagbalik ngadto sa higayon sa dihang gipresentar ni Presidente Gordon B. Hinckley (1910–2008) “Ang Pamilya: Usa Ka Pamahayag ngadto sa Kalibutan” diha sa 1995 kinatibuk-ang miting sa Relief Society.2 Kaming duha mibati nga gigiyahan nga makahibalo unsa ang isulti; dili kini ikalimud. Kami usab nakahibalo nga kini mahimong malisud kaayo. Kami mihukom sa pagbutang sa tanan diha sa mga kamot sa Dios ug miingon, “Among buhaton unsay gusto nimo nga among buhaton; kami mosulti sa unsay gusto nimo nga among isulti,”3 bisan kon kini mahimong dili popular. Kami nahimong mas nabalaka mahitungod sa unsay ma-rekord sa langit batok sa unsay ma-rekord diha sa Parlamento.
Sa dihang miabut ang adlaw ug gitawag nila ang among mga ngalan, sila miingon kanamo nga kami adunay kapilian sa pagpresentar nga magbulag o mag-uban ba. Kami dayon nakahunahuna, “Unsa nga simbolo! Dayag lamang nga kami mosaka ug mopanalipud og dungan sa doktrina sa pamilya.”
Human kami mihatag sa among mga pahayag, ang mga miyembro sa Parlamento misugod sa ilang pagpangutana. Sila ingon og wala malipay sa unsay among gisulti, ug ang pagtubag sa ilang mga pangutana dili sayon. Sa katapusan ang among oras nahuman na, apan sa wala pa kami mobiya, kami mihatag sa matag miyembro sa Parlamento ug sa tigmantala og kopya sa among mga pahayag ug usa ka kopya sa “Ang Pamilya: Usa Ka Pamahayag ngadto sa Kalibutan.”
Usa kini ka malisud nga kasinatian, apan kini nakapausab sa among mga kinabuhi. Among nakat-unan nga kini posible (ug gikinahanglan) nga mosulti ngadto sa uban mahitungod sa doktrina sa Ginoo sa kaminyoon ug sa pamilya—ug nga kini mahimo uban sa kaisug, katin-aw ug kamabination. Nalig-on ang among relasyon sa Langitnong Amahan, ug ang among pagpamatuod sa doktrina sa pamilya mitubo. Kami nagpamatuod sa dakong mga panalangin ug kalipay nga miabut sa among mga kinabuhi isip resulta niini nga kasinatian.