Paghigugma sa Atong mga Pamilya

Ni Presidente Henry B. Eyring

Ikaduhang Magtatambag sa Unang Kapangulohan

Gipahaum gikan sa “Kaninyo Ihatag Ko ang Akong Kalinaw,” Liahona, Mayo 2017, 15–18.

Ang propeta nga si Alma misulti sa iyang mga katawhan nga kinahanglan nila ang ilang mga kasingkasing nga “nabugkos diha sa pagkahiusa ug diha sa gugma sa usagusa” (Mosiah 18:21). Usahay lisud ang pagbati og panaghiusa sa atong mga pamilya, apan ang Espiritu Santo makatabang kanato.

Sa dihang ang among anak nga lalaki naglukso-lukso sa iyang higdaanan. Milukso siya og maayo nga nagtuo ko nga maguba ang iyang higdaanan! Mibati ko og kapungot. Miduol ko ug gigunitan siya sa iyang abaga. Ako siyang gipabarug diin mag-abut ang among mga mata.

Dayon sa akong hunahuna akong nadungog ang hinay nga tingog sa Espiritu Santo nga misulti, “Ikaw naggunit og usa ka bantugan nga tawo.” Kini nga mga pulong mituhop sa akong kasingkasing. Hinay nakong gipahimutang ang akong anak balik sa iyang higdaanan ug nangayo og pasaylo.

Karon ang akong anak nga lalaki nahimong usa ka bantugan nga tawo. Mahangturon ang akong kamapasalamaton nga ang Espiritu Santo mitabang nako sa pag-tanaw niya sama sa pagtan-aw sa Langitnong Amahan kaniya—isip Iyang anak.

Maningkamot kita nga maminaw sa Espiritu Santo kon motan-aw kita sa usag usa, ug gani kon maghunahuna kita sa usag usa. Kini makatabang nako nga mobati og dugang nga gugma sa atong mga pamilya.

Paglambo diha sa Gugma

Guntinga ang mga gilis sa papel ug ibutang kini sa panaksan. Human nimo mahimo ang usa sa mga kalihokan, pagdugang og usa ka talikala [link] sa imong gikinadina nga kasingkasing.

Piloa ang gilis sa papel og katunga.
Bawga ang mga tumoy sa papel aron mura og kasingkasing kini nga tan-awon. I-staple o papitli kini.
Aron mahimo nga kadena, iliyok ang isig ka tumoy sa sunod nga kasingkasing sa sulod sa unang kasingkasing sa dili pa istepliran o papitlan.

Pangutan-a unsay imong mahimo aron makatabang.
Maghisgut mahitungod sa lingaw nga panumduman.
Pag-ampo alang sa usa ka tawo sa inyong pamilya.
Paghimo og mubo nga mahigugmaong sulat sa usa ka tawo.
Pangutana sa usa ka tawo mahitungod sa ilang adlaw.
Pagdala og mainom o matimo-timo sa usa ka tawo.
Sultihi ang usa ka tawo nga sila importante kanimo.
Pagdula o manglakaw og dungan.
Sulti og, “pasayloa ko,” kon gikinahanglan.