Abril 2020 nga Kinatibuk-ang Komperensya

Ang tanang mga numero sa pahina gikan sa Mayo 2020 nga Liahona, anaa sa online sa liahona.ChurchofJesusChrist.org.

Unsaon Nato sa “Pagpaminaw Kaniya”?

Unsaon ninyo pag-summarize ang tibuok kalibutan nga komperensya nga may sobra sa 25 ka mga pakigpulong? Sa iyang panapos nga pakigpulong, si Presidente Russell M. Nelson mihimo niini uban sa “duha ka balaanong gitakda nga mga pulong: ‘Paminaw Kaniya.’ … Kami nag-ampo nga sugdan na usab ninyo ang tinud-anay nga maminaw, mamati, ug mopatalinghug sa mga pulong sa Manluluwas” (“Padayon Uban sa Hugot nga Pagtuo,” 114).

Tan-awa o basaha ang iyang pagpakigpulong ingon man usab ang mga pagpakigpulong niini nga mga mamumulong samtang padayon kamong maningkamot sa pagdapit ug pag-ila sa pagpadayag.

Si Elder Neil L. Andersen miingon: “Kita ‘makapaminaw Kaniya’ tungod sa panalangin sa dili ikatandi nga Pag-ula sa Manluluwas. … Ang pagtuo, kamasulundon, pagpaubos, ug tinuod nga katuyoan moabli sa mga bintana sa langit” (“Mga Espirituhanong Panumduman nga Angay Hinumduman,” 21).
Si Elder Quentin L. Cook mipahinumdom kanato nga ang “personal nga pagpadayag maanaa sa tanan kinsa mapaubsanong magtinguha og giya gikan sa Ginoo,” ug mipakigbahin siya og tulo ka mga baruganan nga mas makatabang kanato nga maandam alang sa pagpadayag (tan-awa sa “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi,” 98–99).
Si Elder Ricardo P. Giménez miingon, “Bisan og daghang mga tawo ang nagtuo ni Jesukristo, ang importante nga pangutana mao kon kita ba nagtuo Kaniya ug kon kita ba nagtuo sa mga butang nga Iyang gitudlo nato ug gisugo nga atong buhaton” (“Pagpangita og Kadangpan gikan sa mga Kalisud sa Kinabuhi,” 102).

Gusto Kong Mahimong Kabahin Niini!

Ni Lauren Soqui Bohman

Nagpuyo sa Oman, ang akong bana ug ako nagdali sa pagkuha sa among mga anak sa higdaanan aron makatan-aw kami sa buntag nga sesyon sa komperensya sa pikas nga bahin sa kalibutan. Kami naghinam-hinam sa pagsugod sa komperensya, nagtinguha niana nga paggiya ug kalinaw nga kami nasayud nga moabut gikan sa Langitnong Amahan pinaagi sa Iyang mga propeta ug mga disipulo.

Si Sister Joy D. Jones misulti kanato nga ang Ginoo nahigugma sa paningkamot, busa unsa ka dako nga paningkamot nga ako andam nga mohimo aron sa pagsunod sa Iyang ehemplo?

Si Presidente Henry B. Eyring nangutana unsa nga tahas ang atong buhaton sa punto niining hitabo sa kasaysayan.

Si Sister Bonnie H. Cordon ug si Elder Jeffrey R. Holland mihangyo kanato sa pagkonsiderar kon sa unsang paagi nga tuyoon nato sa pagpadan-ag ang atong kahayag.

Gibati nako kon unsa ka gusto nako nga mahimong kabahin sa kaayo nga paspas nga gipadayon sa Ginoo. Ang komperensya nakapadasig kanako sa pagbag-o sa akong mga paningkamot sa pagtabang sa akong mga anak sa ilang personal nga kalamboan, sa pagtinguha nga mahimong mas manggihunahunaon ug tinuod nga higala sa espirituhanon nga paagi, sa pagpahigayon sa mga buluhaton sa family history sama sa pagbutang sa mga datos, ug sa pagpangita sa bag-ong mamugnaong mga oportunidad sa pagserbisyo sa Dios pinaagi sa pagserbisyo sa Iyang mga anak.

Pamalandungi Kini …

Mga Gasa sa Kababayen-an ug Kalalakin-an

Kita mahimong gilibutan sa kultura sa pagpihig ug “ako usa ang una” nga mga mensahe, apan si Sister Jean B. Bingham mitudlo nga ang kalalakin-an ug kababayen-an kinahanglang andam nga mosunod sa balaang sundanan sa pagtrabaho nga magkahiusa:

“Ang mga babaye adunay lahi, balaang mga gasa ug gihatagan og talagsaong mga responsibilidad, apan kadto dili labaw—o ubos—kaimportante kay sa mga gasa ug mga responsibilidad sa mga lalaki. Ang tanan gidesinyo ug gikinahanglan sa pagpahinabo sa balaang plano sa Langitnong Amahan sa paghatag sa matag usa sa Iyang mga anak sa labing maayong oportunidad sa pagtuman sa iyang balaang potensyal” (tan-awa sa “Nagkahiusa sa Pagtuman sa Buhat sa Dios,” 63).

Andam ba kita sa paghatag og bili sa usag usa isip mahinungdanong magkauban sa buhat sa kaluwasan?