Unsaon Nako Pag-istorya ang Akong mga Anak mahitungod sa Kamahinungdanon sa mga Babaye ug Lalaki?

Mga paghulagway pinaagi ni Katie Payne

25 na katuig nang milabay sumad niining bulana nga ang propeta sa Dios mipaambit sa “Ang Pamilya: Usa Ka Pamahayag ngadto sa Kalibutan” diha sa Miting sa Kinatibuk-ang Relief Society sa Tibuok Simbahan. Ania ang pipila ka importanting mga butang nga atong mahibaloan gikan niana nga pamahayag.

5 ka Kamatuoran nga Hisgutan

• Matag usa kanato usa ka anak “sa langitnong mga ginikanan.” Kana nga kamatuoran nagpahinumdom kanato nga ang mga babaye ug lalaki importante nga bahin sa plano sa kalipay. Sa unsang paagi nga ang kalibutan mahimong mas maayong dapit kon ang tanang lalaki ug babaye, batang mga babaye ug lalaki, nagtahud sa usag usa ingon nga parehas nga bililhon ug gikinahanglan?

• Ang kababayen-an ug kalalakin-an adunay usa ka “balaan nga padulngan.” Nagpasabut kini nga ang mga batang lalaki ug babaye adunay kahigayunan nga magpuyo sa usa ka hingpit nga langitnong panimalay sa umaabut. Unsa ang pipila ka maayong mga pagpili nga makatabang ninyo aron makab-ot ang inyong balaan nga kapalaran?

• Ang mga bana ug asawa kinahanglang “[mo]higugma ug [mo]amuma sa usag usa.” Unsa ang pipila ka paagi nga mahimo ninyong buhaton sa paghigugma ug pag-amuma sa uban?

• Ang mga amahan ug inahan mahimong makatabang sa ilang mga pamilya sa lain-laing mga paagi, apan sila kinahanglan nga magtambayayong “ingon nga patas nga magkauban [equal].” Kanus-a man ninyo nakita ang kababayen-an ug kalalakin-an nga nagkahiusang nagtinabangay sa pagtrabaho sa usa ka butang nga importante?

• Ang mga ginikanan kinahanglang mopadako sa ilang mga anak “sa paghigugma ug pagkamatarung.” Unsa ang pipila ka maayong mga butang nga inyong nakat-unan gikan sa usa ka inahan, apohan nga babaye, o sa laing babaye? Unsa ang pipila ka maayong butang nga inyong nakat-unan gikan sa usa ka amahan, apohan nga lalaki, o sa laing lalaki?

4 ka mga Ideya nga Kalihokan

• Pangita og lain-laing mga himan nga parehong makatabang sa pagbuhat og butang. Sama pananglit, ang kutsilyo ug tinidor managlahi kaayo, apan ang duha makatabang nimo nga mokaon sa pagkaon. Ang kalalakin-an ug kababayen-an managlahi, apan sila parehong importante. Ug kon sila magtinabangay, makahimo sila og katingalahang mga butang.

• Kolori ang mga pahina diha sa Higala nga magasin karong bulana nga mopakita sa kababayen-an ug kalalakin-an kinsa motabang sa pagpangulo sa Simbahan.

• Paghimo og tumong nga makatabang sa inyong pamilya sa pagpakita og dugang nga pagtahud ug kamabination ngadto sa kababayen-an ug kalalakin-an.

• Paghunahuna og usa ka tawo kinsa wala masayud nga sila importante ug gihigugma. Unsaon nimo pagtabang kanila nga makasabut nga sila hinigugma nga anak sa langitnong mga ginikanan?

Dugang nga Makatabang nga mga Kapanguhaan alang sa Kabataan

• “Maayo nga Ideya” (Sept. 2020 Higala)

• “Paghigugma sa Atong mga Pamilya” (Sept. 2020 Higala)

• “Akong Notebook sa Kinatibuk-ang Komperensya” (Sept. 2020 Higala)

• “Ang Mga Kababayen-an Kinsa Mitabang sa Pagpangulo sa Simbahan” (Sept. 2020 Higala)