Si Isaac ug ang Templo
Ang tagsulat nagpuyo sa Colorado, USA.
Si Isaac nag-untol-untol sa iyang lingkuranan. Mitan-aw siya sa gawas sa bintana sa awto. Mobisita sila ni Lola ug Lolo. Mobisita usab sila og laing butang nga talagsaon.
“Kanus-a man kita motan-aw sa bag-ong templo?” Nangutana si Isaac ni Mama.
“Ugma,” miingon siya.
Mipahiyom si Isaac.
Sa katapusan si Isaac ug ang iyang pamilya naabot na sa balay ni Lola ug Lolo.
Pagkasunod buntag, si Isaac nag-ilis sa iyang pang-Dominggo nga sinina. Ingon og kataw-anan nga nagsul-ob siya sa iyang kurbata sa tunga-tunga sa semana. Si Isaac namahaw uban sa iyang pamilya. Dayon midrayb sila paingon sa open house sa templo. Motan-aw sila sa sulod sa bag-ong templo sa dili pa kini ipahinungod.
“Nakakita ko sa templo!” Miingon si Isaac. Mitudlo siya sa puti nga gambalay [building] uban sa anghel Moroni sa ibabaw.
Dihay usa ka gambalay sa Simbahan tupad sa templo. Si Isaac ug ang iyang pamilya una nga miadto didto. Mitan-aw sila og usa ka video. Usa ka tawo ang mitabang nila sa pagbutang og puti nga hapin sa ilang mga sapatos.
Karon panahon na gayud aron mosulod sa templo! Si Isaac milakaw pasulod sa mga pultahan sa templo. Malipayon ang iyang kasingkasing.
Si Isaac nakakita og daghang mga dibuho [painting] diha sa mga bungbong. Pipila sa mga dibuho nagpakita sa mga tawo nga nag-ampo. Pipila sa mga dibuho nagpakita sa matahum nga mga tanom ug mga hayop.
Dayon si Isaac nakakita og usa ka dibuho nga iyang giganahan labaw sa tanan. Kadto usa ka dibuho ni Jesus! Si Jesus nagbarug nga gituyhad Iyang mga bukton.
“Ingon og giablihan ni Jesus ang Iyang mga bukton ngari kanako,” mihunghong si Isaac ngadto ni Papa.
“Si Jesus kanunay nagtuyhad sa Iyang mga bukton alang kanimo,” mihunghong og balik si Papa. “Siya nahigugma sa matag usa kanato.”
Si Isaac adunay maayong pagbati sa iyang kasingkasing. Gihunahuna niya nga naglakaw tapad ni Jesus sa templo. Gihunahuna niya nga si Jesus migakos kaniya.
Si Jesus nahigugma ni Isaac. Ug si Isaac nahigugma usab ni Jesus!