Mga Young Adult
3 Ka Lakang nga Giya sa Pag-alima sa Inyong Kahimsog sa Pangisip
Ang kaugtas, depresyon, ug kabalaka hinay-hinay nga makahimo og negatibong mga kausaban sa atong kinabuhi sa bisan unsang panahon. Aniay tulo ka mga paagi sa pag-alima sa inyong kahimsog sa pangisip.
Isip usa ka magtatambag sa kahimsog sa pangisip nga may 30 ka tuig na nga kasinatian, kanunay kong mahibulong sa abilidad sa mga tawo sa pag-atubang ug pagbuntog sa mga hagit. Nagpuyo kita sa malisud nga mga panahon. Ug ang kaugtas, depresyon, ug kabalaka hinay-hinay nga makahimo og negatibong mga kausaban sa atong kinabuhi kanunay, ilabi na sa panahon sa kinabuhi nga dili kaayo sigurado, sama sa pagka young adult. Kini nga mga kalisdanan usahay mohimo kanato nga naglibug ug nagduha-duha sa atong abilidad sa pagsugakod ug pagpadayon sa unahan.
Apan akong nakat-unan nga kon kita mogahin og panahon sa pag-atiman sa atong kahimsog sa pangisip, makaangkon kita og dugang nga kusog ug dugang nga kalig-on sa pag-atubang sa mga hagit. Adunay daghan nga mga butang nga atong mahimo alang sa atong kaugalingon aron sa paglig-on sa atong kapasidad sa pangisip aron mas mabuntog nato ang mga babag (ug matagamtam usab ang maayo nga mga panahon!). Aniay tulo lang ka dapit nga tutukan nga makatabang ninyo nga mapabilin ang inyong pangisip ug emosyonal nga kahimsog sa labing maayong kahimtang.
Ayaw Ipakaubos ang Gahum sa Gagmay ug Yano nga Espiritwal nga mga Butang
Kadtong gagmay nga espiritwal nga mga butang nga inyong mahimo kada adlaw aron mas maduol sa Langitnong Amahan maghatag og dakong gahum sa pagtabang kaninyo sa pag-alima sa inyong kahimsog sa pangisip kay sa inyong gihunahuna (tan-awa sa Alma 37:6–7). Ang espiritwal nga mga kinaiya wala magpasabut nga mawala ang atong mga hagit, apan kini mohatag kanato og kalig-on, katin-aw sa pangisip, mahangturong panglantaw, paglaum, ug kaisug sa pagpadayon sa unahan.
Kanunay akong mosulti sa mga kliyente sa pagpalambo og maayong mga kinaiya matag adlaw.” Kini naglakip sa makahuluganon nga inadlaw nga pag-ampo, inadlaw nga pagtuon sa kasulatan, pagserbisyo sa atong mga calling o mga responsibilidad sa Simbahan, pagtambong sa simbahan matag semana ug pag-adto sa templo kanunay, ug pagpaningkamot sa pagsunod sa mga pag-aghat sa Espiritu Santo.
Akong nakita kining gagmay ug yano nga espiritwal nga mga binuhatan nga nakapausab sa abilidad sa mga tawo sa pagsugakod ug pagbuntog sa mga hagit sa talagsaong mga paagi. Sa dihang ang akong mga kliyente mopasalig sa pagbuhat niining gagmay nga espiritwal nga mga kinaiya sa makanunayong paagi, sila mibati og mas dakong impluwensya gikan sa gahum sa Manluluwas diha sa ilang kinabuhi. Akong nakita kana nga gahum nga mipalambo sa ilang espiritwal ug kalig-on sa pangisip. Ug kana naghimo og dakong kalainan sa ilang abilidad sa pagpangita og kalipay ug sa pagpokus sa unsay importante gayud.
Si Elder David A. Bednar sa Korum sa Napulog Duha ka mga Apostoles mipamatuod bahin niini, nag-ingon, “Ang espirituhanong sumbanan sa gagmay ug yanong mga butang nga makahatag og dagkong mga butang makahimo og kalig-on ug pagkamakanunayon, nagkalig-on nga debosyon, ug mas kompleto nga pagkakabig ngadto ni Ginoong Jesukristo ug sa Iyang ebanghelyo.”1
Ayaw tuguti ang mga pagbati sa kakulang o kawalay kasiguroan makapugong kaninyo sa pagbuhat niining gagmay nga espirituhanong mga butang uban sa tinuod nga katuyoan (tan-awa sa Moroni 10:4). Kon nagtuo kamo, o bisan kon kamo lamang adunay tinguha sa pagtuo (tan-awa sa Alma 32:27) nga kining espirituhanong mga kinaiya makahatag kaninyo og kusog, pagkaayo, kalinaw ug paglaum, kini mahitabo.
Hinumdumi ang Pag-anad sa Pag-atiman sa Inyong Kaugalingon
Kitang tanan nakadungog mahitungod sa baruganan sa ebanghelyo nga pagbarug pinaagi sa kinaugalingong paningkamot. Kasagaran naghisgot kita mahitungod niining pinansyal o temporal nga mga panginahanglan. Apan ang usa sa labing importante nga bahin niini nga konsepto mao ang emosyonal nga pagbarug pinaagi sa kinaugalingong paningkamot—pag-atiman sa kaugalingon—nga importante alang sa pag-alima sa atong kahimsog sa pangisip.
Ingon nga kita mobuhat alang sa uban, nganong lisud man kaayo alang sa kadaghanan kanato sa paggahin og panahon alang sa atong kaugalingon? Tingali usahay ang ideya sa paggahin og panahon sa atong kaugalingon ingon og hinakog o murag usik sa panahon. Apan dili gayud kana tinuod! Ang pag-atiman sa kaugalingon dili hinakog! Kon kita mapakyas sa pag-atiman sa atong kaugalingon, unsa pa man ang atong mapaambit sa uban?
Ang pag-atiman sa kaugalingon magsugod sa pagkahibalo sa inyong kaugalingong mga panginahanglan ug sa unsa ka daghan ang inyong mahatag. Ang pag-ila, pagsabut, ug pagdawat sa emosyon nga inyong gibati importante sa pagdiskobre unsa ang inyong mga panginahanglan. Aniay pipila ka anaron sa pagbuhat alang sa pag-atiman sa kaugalingon aron matuman ang inyong panginahanglan sa pangisip ug sa emosyon:
-
Atimana ang inyong lawas pinaagi sa pagkaon og tukmang pagkaon, igong pagkatulog, ug pag-ehersisyo kanunay.
-
Pag-ugmad og mga relasyon sa mga tawo nga inyong makaistorya ug mapaambitan sa inyong mga kabalaka ug sa inyong mga kalipay.
-
Pagtinguha og maayong kalingawan, mga ganahang buhaton, ug mga kalihokan nga makahatag kaninyo og kalipay ug pagbati sa kalampusan.
-
Pagsulat sa journal aron motabang ninyo sa pagpahayag sa inyong mga pagbati ug sa paghan-ay sa inyong mga hunahuna.
-
Paggahin og panahon sa gawas.
-
Pagtakda og maayong mga utlanan ug pagbalibad kon kamo adunay daghang gibuhat.
-
Mag-anad sa pagpasalamat. Ang kamapasalamaton motabang kanato aron malikayan ang pagbati nga makalolooy kita o mobasol sa uban sa atong mga kasub-anan. Sulayi ang pagsulat og tulo ka butang nga kamo mapasalamaton sa katapusan sa matag adlaw.
-
Usba ang negatibong mga hunahuna ug ang negatibong mga isulti sa kaugalingon ngadto sa positibong butang.
-
Hinumdumi kinsa kamo—usa ka balaan nga anak sa langitnong mga ginikanan. Kamo gihigugma ug gisuportahan sa daghan kaayo didto sa langit ug dinhi sa yuta.
-
Minusi ang panahon nga inyong gigahin sa social media (o hingpit kining likayi).
-
Pasayloa ang imong kaugalingon ug ang uban. Ang pagpadayon sa pagdumot o sa balik-balik nga paghinumdum sa nangaging mga sayop nagdugang sa wala kinahanglana nga palas-anon sa inyong mga abaga.
Ipaubos sa Inyong Kaugalingon ug Pangayo og Tabang
Walay usa kanato ang gilaumang makalahutay niining mortal nga panaw nga mag-inusara. Bisan kon kamo nagbarug pinaagi sa kinaugalingong paningkamot, ang pagpakiglambigit sa uban gikinahanglan aron maatiman ang inyong pangisip ug emosyonal nga mga panginahanglan. Ug kita adunay mga ginikanan, ubang mga sakop sa pamilya, mga higala, mga lider sa Simbahan, ug atong Langitnong Amahan, Jesukristo, ug Espiritu Santo sa paggiya, pagtudlo, ug pagtabang kanato sa atong panaw. Paggahin og panahon sa pagribyu sa inyong kasamtangang social network. Pangutan-a ang inyong kaugalingon:
-
Kamo ba adunay maayong mga relasyon sa uban?
-
Kamo ba makapangayo og dugang nga suporta gikan sa uban?
-
Kamo ba mipaminus sa inyong mga relasyon sa ubang tawo? O kamo ba makapangayo og tabang kon gikinahanglan ninyo kini?
Kasagaran, aron makatabang sa uban, kita kinahanglan nga masayud kon sila ba naglisud. Ayaw kahadlok, kaulaw, o pagduhaduha sa pagpangayo og tabang kon gikinahanglan ninyo kini, bisan kon kini mao ang pagtug-an sa usa ka tawo mahitungod sa inyong mga kabalaka o gani sa pagpangayo og tabang sa usa ka tawo. Kini nagkinahanglan gayud og kaisug ug kamapainubsanon sa pag-angkon nga kamo nagkinahanglan og tabang. Apan ang Langitnong Amahan kanunay mopanalangin kanato pinaagi sa uban samtang kita mopasulod kanila ug motugot kanila nga maanaa alang kanato.
Ang tinuod nga emosyonal nga pagbarug pinaagi sa kinaugalingong paningkamot magsugod pinaagi sa pagkahibalo sa atong mga limitasyon ug sa pagtinguha og tabang gawas sa atong kaugalingon sa pagpuno sa mga kakulangan. Gawas sa mga higala ug pamilya, ang inyong mga lider sa Simbahan mahimong motanyag usab kaninyo og tambag, giya, ug paglaum kon kamo nanginahanglan. Kon kamo makabenepisyo sa propesyonal nga pagtambag o medikal nga tabang aron mamaayo ang sitwasyon sa inyong pangisip, ang inyong bishop makaendorso usab kaninyo ngadto sa kwalipikado nga mga therapist.
Sama sa inyo kaayong nasayran, kita nagpuyo sa mahagiton nga mga panahon. Apan kita nagpuyo usab sa labing maayong panahon tungod sa gipahiuli nga ebanghelyo ni Jesukristo! Kita adunay kahibalo sa plano sa kaluwasan ug sa daghan kaayong mga himan nga makatabang sa paghatag nato og hingpit nga kalipay, paglaum, ug kalinaw bisan unsa pa ang atong mga kahimtang. Ug kon gamiton nato kini nga mga himan, kini motabang kanato nga makabalik ngadto sa atong Langitnong Amahan.