Si Danna ug ang Eksamin sa Math
Makatabang ba ang usa ka bersikulo sa kasulatan sa Math ni Danna?
“Pag-ampo kanunay, nga kamo mahimo nga magmadaugon” (Doktrina ug mga Pakigsaad 10:5).
“Danna,” mitawag si Mamá. “Andam ka na ba alang sa eskwela? Oras na para sa kasulatan!”
“Padulong na!” Gisulod ni Danna ang iyang libro sa math sa hayag kaayo og kolor nga bag ug gisagbay kini sa iyang abaga.
Si Danna ug ang iyang pamilya nagsag-ulo og usa ka bag-o nga bersikulo sa kasulatan kada semana. Matag adlaw sa dili pa mobiya alang sa eskwelahan, magpraktis sila sa pagsulti niini og dungan. Miingon si mama nga ang pagkat-on og bag-ong kasulatan sama sa usa ka bag-ong higala. “Sa higayon nga maanaa na kini sa imong kasingkasing, naa kini diha kon imo kining kinahanglanon.”
Si Danna ug ang iyang manghud nga babaye nagbarug sa may pultahan ug gibalik-balik ang bersikulo alang niini nga semana. Gikan kadto sa Doktrina ug mga Pakigsaad.
“‘Pag-ampo kanunay, aron ikaw mahimo nga magmadaugon,’” nagdungan sila sa pagsulti.
“Unsa ang kahulogan sa ‘magmadaugon’?” Nangutana ang igsoon ni Danna si Tatianna.
“Nagpasabut kini nga kamo makahimo og lisud nga mga butang!” Miingon si Danna.
Mitando si Mamá. “Kon kita mag-ampo, ang Langitnong Amahan motabang kanato.”
Gibalik-balik ni Danna ang kasulatan sa iyang hunahuna samtang siya nagdali paingon sa eskwelahan.
Sa kaulahian nianang adlawa, ang magtutudlo ni Danna nagbarug atubangan sa pultahan sa klasehanan tupad sa bughaw ug puti nga bandera sa Guatemala. “Oras na para sa inyong eksamin sa math,” miingon si Señora Morales. Misugod siya sa pagpasa og mga tinumpi nga mga papel.
Ganahan si Danna sa math. Ug maayo siya niini! Nagtuon siya og maayo alang sa eksamin, ug nasayud siya nga makahimo siya og maayo niini.
Gikuha ni Danna ang iyang lapis ug misugod sa pagtrabaho. Maayo ang iyang gibati mahitungod sa iyang mga tubag. Dayon miabut siya sa katapusang hugpong sa mga problema. Kini lisud kaayo. Dili siya makahinumdom kon unsaon kini paghimo!
Mibati si Danna og kakulba. Unsaon niya sa paghuman sa iyang eksamin sa math? Iyang gigunitan ang iyang lapis ug gibasa pag-usab ang sunod nga problema.
Dayon dunay misantup sa iyang hunahuna. “Pag-ampo kanunay, aron ikaw mahimo nga magmadaugon …”
Miginhawa si Danna og lawom. Gipiyong niya ang iyang mga mata ug militok og hilom nga pag-ampo diha sa iyang kasingkasing. Langitnong Amahan, palihug tabangi ko nga makahinumdom unsay akong nakat-unan. Palihug tabangi ko nga makabuhat og maayo niining eksamin.
Gitan-aw ni Danna ang luyo sa iyang papel. Gitan-aw niya ang mga problema nga iya nang nasulbad. Dayon mitan-aw siya pag-usab sa mga lisud. Nagsugod siya og kahinumdom sa kon unsaon kini sa pagbuhat! Nawala ang iyang kakulba. Miginhawa usab siya og lawom ug mitrabaho.
Human sa eskwela, si Danna naghinam-hinam sa pagsulti sa iyang pamilya mahitungod sa unsay nahitabo.
“Sa sinugdanan dili ko makahinumdom kon unsaon sa pagsulbad sa problema,” miingon si Danna. “Apan nakahunahuna dayon ko sa kasulatan nga atong gisag-ulo. Nag-ampo ko, ug ang Langitnong Amahan mitabang kanako.”
“Maayo kaayo!” Miingon si Mamá.
“Nagmadaugon ka!” Miingon si Tatianna.
Mikatawa si Danna. “Nahimo nako! Bisan unsa ang akong makuha nga grado, kahibalo ko nga akong gihimo ang akong pinakamaayo.” Iyang gigakus og maayo si Mama ug si Tatianna. Dili na siya makahulat aron makita kon unsa nga higala diha sa kasulatan ang ilang buhaton sa sunod semana!