Ang Labing Importante nga Trabaho
Ang tagsulat nagpuyo sa Utah, USA.
“Ako ania kaninyo ingon nga mag-aalagad” (Lucas 22:27).
Si Amelia ganahan nga mobisita ni Lola. Ganahan siyang magdula og dulaan nga mga hayop ug maggakos sa dakong humok nga habol ni Lola. Apan karon dili alang sa pagdula. Karon alang sa pagtabang.
Padulong sa balay ni Lola, ang mga igsoong babaye ni Amelia naghisgot mahitungod kon unsa nga mga trabaho ang gusto nilang buhaton.
Si Sarah gustong manilhig. Si Emily gustong mag-mop. Ug si Mama mihangyo ni Alyssa sa paglimpyo sa mga bintana.
“Ako diay?” Nangutana si Amelia. “Motabang ba ko sa pagpamaspas og abog?”
“Ako adunay espesyal nga trabaho alang nimo,” miingon si Mama. “Ako nagkinahanglan nimo sa pagpaminaw.”
Si Amelia naghulat. “OK, naminaw ko. Unsa kana?”
“Mao kana ang trabaho!” Misulti si Mama nga nagkatawa. “Paminaw lang. Lingkod uban ni Lola ug paminaw samtang mag-istorya siya. Tingali mao kini ang labing importante nga trabaho nga atong butahon sa tibuok adlaw.”
Sa unsang paagi ang pagpaminaw mao ang labing importante nga trabaho? Si Amelia naghunahuna. Ingon og ang pagpamaspas og abog ang mas tinuod nga trabaho! Apan si Amelia andam nga mosulay.
Si Lola nalipay nga nakakita nila. Ang tanan gawas ni Amelia nagsugod sa ilang mga trabaho. Si Amelia miadto ug milingkod tupad ni Lola sa sopa. Si Amelia nakamatikod sa butang [stuffed] nga kuneho diha sa suok. “Ganahan ko sa imong kuneho,” miingon siya.
Mipahiyom si Lola. “Nasultihan na ba tika mahitungod sa akong igsoong lalaki nga sila si Mel ug sa batang kuneho?”
Nasurprisa si Amelia. “Usa ka tinuod nga kuneho?”
Mitando si Lola. “Wala kini ginikanan nga iyang nakitan. Gigakos niya kini sulod sa iyang sinina aron kini mahimong luwas.” Si Lola misulti ni Amelia mahitungod sa tangkal sa kuneho nga gitukod ni Mel.
Kana nga istorya nagpahinumdom ni Lola sa ubang mga istorya. Misulti siya mahitungod sa usa ka binuhi nga nating baka nga ginganlan niya og Star. Misakay siya kaniadto sa likod ni Star! Miagik-ik si Amelia samtang iyang gihunahuna si Lola nga nagsakay sa usa ka nating baka. Dili sayon ang paghunahuna kaniya isip usa ka batang babaye.
Si Lola sige lang gyud og istorya. Siya misulti pag-usab sa istorya sa kuneho. Sa laing higayon, siya mihunong gani sa tunga-tunga sa usa ka istorya ug misugod sa sinugdanan.
Si Amelia naningkamot nga maminaw, apan anam-anam na siyang gikapoy. Si Mama ug ang ubang mga babaye nagtrabaho pa gihapon.
Lisud ang maglingkod ug maminaw! Apan mipahiyom si Lola. Ingon og malipayon siya sa pagpaambit sa iyang mga istorya.
Pipila ka minutos ang milabay, misulod si Mama. “Humana tanan! Andam na tang molakaw.”
“Nindot kaayo kadto,” miingon si Lola kang Amelia. “Nalipay ko nga nakig-istorya kanimo!”
Gigakus pag-ayo ni Amelia ang iyang lola. Nakakita siya og mga luha sa mga mata ni Lola.
“Unsay problema?” Nangutana si Amelia.
“Walay problema,” miingon si Lola. “Salamat sa pagpakig-istorya kanako. Gihigugma ko ikaw.”
Si Amelia mibati nga mainiton. “Gihigugma ko usab ikaw usab,” miingon siya. “Mobalik ko pag-usab sa dili madugay.”
Sa pagpauli, si Alyssa nangutana, “Kumusta ang pagpaminaw, Amelia?”
“Mas lisud kay sa akong gihunahuna. Nagtuo ko nga nahuman na ko og paminaw sa wala pa nahuman si Lola og istorya!”.
“Maayo kaayo ka!” Miingon si Mama.
“Salamat,” miingon si Amelia. “Pipila sa mga istorya nga iyang gisulti makalingaw. Kamo nakahibalo ba nga si Lola adunay usa ka binuhi nga nating baka?”
“Sama sa usa ka bata nga baka?” Nangutana si Sarah.
“Oo! Si Lola misakay niini kaniadto,” miingon si Amelia, nga nagyango-yango. “Ang iyang ngalan mao si Star.”
Si Amelia miistorya kanila sa tanan nga ubang mga istorya ni Lola. Nindot kaayo kadto nga makakat-on og daghan kabahin niya.
Mingisi si Emily. “Tingali mahimong magbaylo kita og trabaho sa sunod higayon. Gusto ko og kahigayunan nga makapaminaw!”