Ang akong Anak, ang Basahon ni Mormon, ug Ako
Sama nga ang Manluluwas nangalagad ug nagtudlo sa tinagsa-tagsa, Siya motabang kanato sa pagtudlo sa atong mga anak sa tinagsa-tagsa.
Paghulagway pinaagi ni Allen Garns
Usa ka adlaw akong gitan-aw ang usa ka interbyu uban ni Brother Tad R. Callister, kinsa mao ang Kinatibuk-ang Presidente sa Sunday School. Samtang nagsulat ko, duna koy usa ka impresyon kon unsaon sa pag-ayo sa akong relasyon uban sa akong anak, nga si John. Nadasig ko nga kinahanglan kami nga mobasa sa tibuok Basahon ni Mormon sa dili pa ang iyang bunyag sa mosunod nga unom ka bulan.
Kini nga mga impresyon klaro kaayo nga gani ako nakahibalo kon asa nga kwarto kami magbasa ug unsa nga oras kami magbasa. Mibati sab ko og lahi kaayo nga impresyon nga kinahanglan among humanon ang pagbasa didto sa mga luna sa Meridian Idaho Temple.
Samtang magbasa kami sa matag gabii, ang among relasyon nagkanindot. Aduna na kami dugang nga pailub sa usag usa, mas magkasinabtanay na kami sa panglantaw sa usag usa, ug kanunay namo nga mabati ang presensya sa Espiritu Santo.
Sa gabii sa wala pa namo mahuman ang basahon, gibasa namo ang saad ni Moroni nga kon kami mangutana sa Dios sa kinasingkasing, uban sa tinuod nga katuyoan, nga may hugot nga pagtuo kang Kristo, kon ang Basahon ni Mormon tinuod, kami mahibalo sa kamatuoran niini pinaagi sa gahum sa Espiritu Santo (tan-awa diha sa Moroni 10:4–5). Nabati namo ang kumpirmasyon nga ang Basahon ni Mormon tinuod, nga si Joseph Smith usa ka propeta, ug nga ang Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta.
Pagkasunod adlaw kami naglingkod sa lingkuranan sa nataran sa templo. Nagtan-aw kami sa estatuwa ni anghel Moroni ug gibasa pag-usab ang katapusan nga pagpamatuod. Sukad nianang adlawa, si John naghisgut sa makadaghang okasyon sa panahon nga kami nagbasa sa Basahon ni Mormon diha sa templo. Karon sa matag higayon nga motambong ko sa templo, makita nako ang lingkuranan ug mapamalandungan ang espesyal nga gutlo ni John ug nako sa dihang nakompleto namo ang among dinasig nga tumong.
Si Presidente Henry B. Eyring, Ikaduhang Magtatambag sa Unang Kapangulohan, miingon, “Ang maalamong ginikanan makasabut nga ang oportunidad anaa sa paggiya sa matag bata, ug sa ilang mga kaugalingon, nga mas hingpit nga modawat sa pagdapit sa Ginoo nga moduol Kaniya.”1
Sa akong hunahuna dunay bili sa hugpong sa mga pulong nga “ang matag bata.” Sama nga ang Manluluwas nangalagad ug nagtudlo sa tinagsa-tagsa, Siya motabang kanato sa pagtudlo sa atong mga anak sa tinagsa-tagsa.
Ang espirituhanong direksyon nga akong nadawat sa pagbasa uban ni John mipakita nako nga ang Ginoo mas nakaila sa akong mga anak labaw pa kay kanako. Nasayud ko nga kon ako maminaw ug mosunod sa Iyang tambag, Siya mohatag kanako og direksyon sa unsang paagi ako makatabang sa paggiya ug paggiya sa matag usa sa akong mga anak balik ngadto Kaniya.